Sip. 7 - BUKO SIPUNENAN

Sikut patuat simaeru

¹ Oni simasingin peile maeru ka tula simakeppu saki, samba gogoi kamateiat peile maeru ka gogoi pututukat mata.

² Mei ka lalep sipurereureu baga peile maeru bele peile ka lalep pupupunenan, kalulut ka lalep pureuteugat baga le pangampulat tetere sirimanua; siripotnia sirimanua sipuririmanua buita rapuletsei nene.

³ Mureureu baga peile maeru bele peile muga'ga, kalulut pumataat simasulei sibaraake pusanangan patuat.

⁴ Sirimanua simasiku patuat ioba mukuddu ka lalep pureureugat baga, tapoi sirimanua sitaiagai patuat ioba mukuddu ka lalep puangkakat baga.

⁵ Masiarep paasekat sirimanua simasiku patuat peile maeru bele peile masiarep uraira sirimanua sitaiagai patuat.

⁶ Kalulut kele nau imalabo rui ka tei koali, kisedda te rapuga'ga sirimanua sitaiagai patuat. Nene leu siboboi.

⁷ Bulatnia te, pasiraraurau masitaiagaiake patuat sirimanua simasiku patuat, samba bulagat sibara ka enungan sitaimaroipo masipakatai patuat.

⁸ Maeru peile kalepakat sara aponia pa bele peile ka panandaatnia. Maeru peile ombaga bele peile buak patuat.

⁹ Bui' imaruei mugolu kabagat patuat, kalulut golu mukuddu le kabagat ukduk sirimanua sitaiagai patuat.

¹⁰ Bui' nukua: “Angoi maeru peile teteret siburu ka tetere kineneiget?” Kalulut ta kalulut pusisikut patuat nuparerereake pagalait nene.

¹¹ Sikut patuat makere le erunia ka bakkat ikepakenen samba sibailiun puuktungan ka sangamberi sirimanua sipasiitco matasulu.

¹² Kalulut pasikeliat sikut patuat iate kele pasikeliat bulagat. Samba mauktuk te sipasiagai, sikut patuat masijago purimanuaiat sibakkatinia.

¹³ Lelekake galajet Taikamanua! Kasei pa momoi masiroipoake aponia soikoilutakenenNia?

¹⁴ Ka gogoi simaeru puangka kam baga, tapoi ka gogoi pangoringan repdep kam, gogoi pangoringan leu sibaraakenen Taikamanua le kele leuet gogoi simaeru, bule ta rasese sirimanua sara teterenia ka sibabara.

¹⁵ Kabagat pusisiboiat purimanuaiatku akuitcoan sangambneri nene: ai sirimanua simatopit simasusubu ka putopinannia, ai sirimanua sikatai simaburu murimanua kabagat pukakatainia.

¹⁶ Bui' makope numatopit, bui' nupuparaboat simakope sikut patuat; angoi nususubuake tubum?

¹⁷ Bui' makope numakatai, bui' numataiagai patuat! Angoi nuoba matei ke tapei teterenia?

¹⁸ Bulat maeru ke nuungkaake sara, samba ta nuobaake bagei, kalulut sirimanua sikalotoake Taikamanua bela le karuania nene.

¹⁹ Sikut patuat masikau ka sibakkatnia bulat maigi puroron bele peile ka sipulu sipuute ka laggai.

²⁰ Bulatnia te, ka polak taanai sirimanua simatopit: sigalai simaeru samba sitaigalaiake jo!

²¹ Samba leu bui' nulelekake sangamberi tiboiet sitiboakenen sirimanua, bule bui' nuarep ipateleiji ekeu paguguletnu.

²² Kalulut iagai patuatnu, mareirei leuet nupateleiji sirimanua sabagei.

Pasikukukru sikut patuat sibaraake belet baga

²³ Ka sangamberinia nene akusibongan bule kuaili sikut patuat. Kuakungannia: “Kusesese te sikut patuat,” tapoi mareunan le sikut patuat katubukku.

²⁴ Aponia sibabara, nenda mareunan samba makeru, bulat makeru, kasei momoi sisesenia?

²⁵ Kuipoake le patuatku bule kuagainia, masilelekake, samba masigaba sikut patuat samba pubulanan, samba leu masiagai pukakatai nenda iate taiagai patuat samba kelat patuat nenda iate purorokat.

²⁶ Samba sesekungan sara bulat simapongit bele peile kamateiat: tainanalep iate jarik, patuatnia iate sesere samba kabeinia iate appra. Sirimanua kilibet bagat Taikamanua tuareu katubunia, tapoi sirimanua sijo ilaba le sia.

²⁷ Itcopei, nene le akusese, sikuat Sipungantoman: Aitusasaraake sisara ka bagei bule tusese pubulanan,

²⁸ gabaetku peile tapoi ta akusese, Kusese sara simanteu katalagat sangaribu, tapoi ta akusese sara sinanalep katalagatda.

²⁹ Itcopei, sarat nene le akusese: Aibaraakean Taikamanua sirimanua simaroipo baga, tapoi maigi le ragaba pasailaat.