Sip. 6 - BUKO SIPUNENAN

¹ Ai sara pangoringan akuitco ka tei matatsulu, bulat siorei sirimanua:

² ka sirimanua sikau Taikamanua pukaioat, pubebeunan, bailiu berisara simagulai ka siobat bagania, tapoi ka sirimanua nenda ta aikau Taikamanua gege inanamnia, tapoi sirimanua sabagei le masinanam! Nene te pusiboboiat samba pangoringan simapongit.

³ Ke sara sirimanua bara togania sangotu samba murimanua simaburu pat maiginangan rurannia, tapoi ta sesege bagania ka pusanangan, beringan leu taaisese purateiat, kuakungannia, toga simakakatai ka suruket peile maeru ka sirimanua nene.

⁴ Kalulut aibara toga simakakatai ka suruket nenda iate ka pusisiboiat samba mutuitui kabagat pugepgeman, samba oninia tutabbo pugepgeman.

⁵ Samba leu taaiitco matatsulu samba ta iagai aponia pa. Masanang peilenia bele peile ka sirimanua siboiki.

⁶ Kenanen murimanuannia ruangaminca kabagat sangaribu ngarura, ke ta inanam pusanangan: tapa sangamberinia masiailiake sara kudduat?

⁷ Sangamberi besit tubu sirimanua iate uktuk ngungunia, tapoi obaket bagania ta sesege.

⁸ Kalulut aponia pabaggeiat sirimanua simasiku patuat ka sitaiagai patuat? Aponia pabaggeiat sirimanua simageba siagai murimanua kamatat sirimanua?

⁹ Maeru peile sarat masiitco bele peile ka pasitutut botbot tubbu. Nene leu pusiboboiat samba galajet masijarik rusa.

¹⁰ Kenanen aponia pa sibabara, amaburuan tukua oninia. Samba atuagaian kasei sirimanuaiate, iate tamomoi ibaraake pakaroat ka simaron peile katubunia.

¹¹ Kalulut makokope le' igi titiboat, makokope le' igit pusisiboiat. Aponia katukaunannia ka sirimanua?

¹² Kalulut kasei siagainia aponia simaeru ka sirimanua ka sanganantat tetere sitete' ka purimanuaiatnia ka pusisiboiat, enungiennia kele ailiggou? Kasei momoi masikua ka sirimanua aponia sipuaaili geti katei matatsulu kalepatnia?