Sip. 5 - BUKO SIPUNENAN

¹ Bui' imaola ka ngungum, samba bui' imaola patuatnu ibelaake titiboat kamatat Taikamanua, kalulut Taikamanua ai ka manua samba ekeu ai ka polak; kalulut nenda, eddangan itaimaigi titiboatnu.

² Kalulut kele pangamutet ibaraake maigi gejat baga, kisedda leu patiboat sitapaluluat kalulut igit titiboat.

³ Ke mupalelengan ekeu katubut Taikamanua, bui' nusaklaake nugalaiakenia, kalulut ta ioba bagaNia ka sirimanua sitaagai patuat. Galaiake le palelengannu.

⁴ Maeru peile ta mupalelengan ekeu, ka pupalelengan tapoi ta tugagalaiake.

⁵ Bui' iambit ekeu ngungum kabagat jo, samba bui' nupanibo kamatat pakoinien Taikamanua, masele ekeu. Bulat mugolu pa Taikamanua ka sangamberi titiboatnu samba ipakatai sigalai kabeinu?

⁶ Kalulut kele igit pangamutet, kisedda te igit titiboat siboboi. Tapoi kau numaloto ka Taikamanua.

Pusisiboiat pukaioat

⁷ Ke nuinco ka sara laggai rapaorei sirimanua simage samba surukat kesedda leu tupakatai puroipoat, bui' imakisei bagam ka pagalaiat nenda, kalulut sara simabuak tiboi tubu masipasikeli sabagei, kisedda leuet bulat simabuak tiboi tubu masipasikeli sia.

⁸ Sara puukutungan ka laggai kele nenda iate, ke laggai nenda masisuru rimatania.

⁹ Kasei matutu baga ka bulagat ta sesege bagania ka bulagat, samba kasei matutu baga ka pukaioat ta sesege bagania ka puuktungannia. Nene leu siboboi.

¹⁰ Kabagat tutuppaina pukaioat, tupainangan leu sirimanua sisappruakenia. Samba aponia uktuk sibakkatnia, ta pa sarat masiitco le?

¹¹ Masanang peperepnia sirimanua sipugagalai, kenanen maigi ele goiso le ikokom; tapoi puektengan sirimanua simakaio ta iobaakenia iperep.

¹² Ai pangoringan sireuteuake baga siitcoku ka tei matatsului: pukaioat sikoirikeakenen sibakkatnia ibailiu le kamateiatnia.

¹³ Samba pukaioat nenda masubu le kalulut pangoringan, bailiu berisara katubunia uktuk togania.

¹⁴ Kele ibela ka suruket inania, kisedda leu geti ituitui, sibulutut kele kateteret ioi, samba ta isisilo sibara besit tubunia berisara momoi iambit kabagat kabeinia.

¹⁵ Nene leu pangoringan sireureuake baga. Kele ioi, kisedda leu geti ituitui. Samba aponia puuktungan sirimanua siboiki sipubebesik tubu masijarik rusa?

¹⁶ Beringan ka sanganantat purimanuaiatnia ainia kabagat pugepgeman samba pureureugat baga, masisilo maigi gejat baga, pangoringan samba pubelekat baga.

¹⁷ Itco pei, addeakenenku simaeru samba sipasesese iate, ke mukom sirimanua samba muangka baga kabagat sangamberi galajet sigalaiakenennia kabagat besit tubu ka tei matat sulu ka burut purimanuaiat sitete', sipanguruatakenen Taikamanua katubunia, kalulut nenda puuktungannia.

¹⁸ Ka senen sirimanua sipanguruatakenen Taikamanua pukaioat samba gege parimanuakenennia, bule isilo puuktungannia, samba bule ipuangka baga kabagat besit tubunia – nenda leu panguruat Taikamanua.

¹⁹ Ta mareirei irepdep rurania, kalulut iobaake le nia Taikamanua mugeja baga ka siobat bagania.