Sip. 3 - BUKO SIPUNENAN

Ka sangamberinia ai teterenia

¹ Ka sangamberinia ai teterenia, ka senen aponia pa ka tei polak ai teterenia.

² Ai tetere pututukat mata, ai tetere lamateiat, ai tetere pasiureman, ai tetere masiburau silepa urep;

³ Ai tetere masimatei, ai tetere masialeake; ai tetere masiragat, ai tetere masigalai;

⁴ ai tetere musou, ai tetere mugaga; ai tetere musougeri; ai tetere muturu;

⁵ ai tetere masiribbaiake bukku, ai tetere masiruruake bukku, ai tetere palakkai, ai tetere masikeraake tubu palakkai;

⁶ ai tetere masigaba, ai tetere tuobaake timarugi; ai tetere masikoiri, ai tetere masiribbaiake;

⁷ ai tetere masibiritake, ai tetere manuilak; ai tetere mutangoan, ai tetere manibo;

⁸ ai tetere mununtu baga, ai tetere mulaga baga; ai tetere pasaggak, ai tetere aban.

⁹ Aponia uktuknia sipugagalai ka sigalainia kabagat besit tubu?

¹⁰ Akuitcoan galajet siaket Taikamanua katubut tatphgat sirimanua sisaggoake tubunia.

¹¹ Nia masigalai sangamberinia malainge ka teterenia, samba leu ikau le sitaimasusu kabagat patuatda. Tapoi tamomoi isinouginia sirimanua galajet sigalaiakenen Taikamanua barania kapanandaat pat aili kalepakat.

¹² Kuagai, taanai ka sia bulat simaeru bele pei muangka baga samba masinanam pusanangan kabagat purimanuaiatda.

¹³ Samba senen sirimanua momoi rapukom, mulo samba masinanam pusanangan kabagat sangamberi besit tubunia, nenda leu iate siaket Taikamanua.

¹⁴ Kuagai, sangamberi sigalai Taikamanua mariuriu le ibara teret buruburu; nenda tamomoi ruruppai samba tamomoi tubeleki; Taikamanua masigalai kisedda, bule ramaloto sirimanua katubuNia.

¹⁵ Sibabara kineneiget, siburu peile aiat, samba sibabara geti amaburuan aibara; samba Taikamahua masigaba situsasabau.

Taimaroiponia kabagat puririmanua

¹⁶ Itcokungan leu ka tei matat sulu: ka kudduat pasiukuman, sedda leu taanai tusese katuroipoat, samba ka kudduat katuroipoat, sedda leu tusese sitaimaroipo.

¹⁷ Kuakungan ka patuatku: “Iukum le Taikamanua sirimanua simatopit samba leu sirimanua sitaimaroipo, kalulut ka sangamberinia samba sangamberi galajet ai teterenia.”

¹⁸ Pagalaiat tatogat sirimanua kukua le kapaatuat: “Isibo le sia Taikamanua samba ipatoila katubutda, sia nene tarimeu le'.”

¹⁹ Kalulut enungan puririmanuan sirimanua makere le enungan puririmanuan tarimeu, enungan puririmanua simakere iorak le sia; kele imatei sisara, kisedda leu bagei. Ka ruania ai enga simakere, samba sirimanua taanai pabaggeiatnia ka tarimeu, kalulut sangamberinia iate siboboi le.

²⁰ Karuania masiailiake kudduat simakere; karuania sibara ka abu samba karuania toili minca ka abu.

²¹ Kasei siagainia, tusasakai pa engan sirimanua ka pata samba engan tarimeu tugorosot ka tei polak.

²² Kuitconia taanai bulat simaeru ka sirimanua bele pei muangka baga ka galaiakenennia, kalulut nenda te puuktungannia. Kalulut kasei te masipatotoila katubunia aponia sipuaaili geti ka lepania?