Sip. 2 - BUKO SIPUNENAN

¹ Manibo le aku kapaatuat: “Konan, kuoba le kusibo muangkabaga! Nanam le pusanangan! Tapoi itso, nenda leuet siboboi.”

² Bailiu agaikungannia, pagalaiat “Muga'ga iate putaiaagai samba pusanangan ta'anai lulunia.”

³ Itubbui le puoobaku mutopit, kubesiake le musanang pasamba mulo anggur samba mugaugau. Kukua le nendangan enungan simaeru ka sirimanua masinanam puririmanuania sitete ka polak nene.

⁴ Kugalaiake le sangamberi galaiet sabeu, masirioake pulalemanku, masipauremi monen anggurku,

⁵ kubesiake le kugalai pamonemone samba siureman, samba masiureminia pasamba senengamata loinat buat kaju;

⁶ kugaigai le uggungan pasisubui siureman samba mone nenda.

⁷ Maigi le kusaki pakoinien taimanteu samba tainanalep, samba ai pakoiniet sipututumata ka lalepku; maigi leu jaui samba kambingku sisaliu peile igit tarimeura sabagei sipubpoki kaku ka Jerusalem.

⁸ Kururuake leu perak samba mas panguruat sibara ka tairimata ka laggai sisaggangienku. Sipuurai taimanteu samba tainanalep siangkaake bagakku pasamba sangamberi uraira. Siobat bagakku le kubakkati igit sinanalepku kabebe.

⁹ Kisededda leuet bailiunangan aku siabeu bele peile beura murimanua sipuboboiki ke pei aku ka Jerusalem; kabagat nenda pusikuat paatuatku mariuriu le ipukuddu ka tubukku.

¹⁰ Ta'kusasakkeri matakku ka obaket matakku, samba ta'kuomake paatuatku ka senen angkat baga, aipoi maangka le bagat paatuatku kelulut ka sangamberi saggot tubuku. Nenda te buat sangamberi saggot tubukku.

¹¹ Kateteret kulelekake senen galaiet sigalai kabeiku samba senen besiakenen sigalaiakenenku addeat ka saggot tubu, itso le, ka sangamberinia iate siboboi le samba besit tubu masijarik rusa; kirenangan taanai puuktungan ka tei sulu.

¹² Lepa pitsakungan masiitso pusikuat paatuat, putaiaagai samba pukelakat paatuat, aipoi apania ragagalaiake sirimanua masisili rimata? sarat aponia sigalaiakenen sirimanua.

¹³ Akuitcoan, pusikuat paatuat masisaliu putaiaagai, kele toro ikalaake gepgep.

¹⁴ Matatda simasikupaatuat ai ka utenia, beringan sirimania sitaiagai paatuat muenung le ka pugepgeman, tapoi kuagai leuet, enungan puririmanua nene iorak le sia simakere.

¹⁵ Iageti kuakungan kapaatuatku: “Enungan puririmanuanda sitaiagai paatuat leuet ioorak aku. Apa lulunia kumasisiku paatuat?” Lepa kuakungan kapaatuatku, nene leuet siboboi le.

¹⁶ Kalulut ta'anai repdemen sitaimasususu, ka sirimanua simasiku paatuat, samba leu ka sitaiagai patuat, aipoi ka gogoi ka sibabara sangamberinia amaburuan tukalipogi. Samba sirimanua simasiku paatuat leu matei leuet kele sirimanua sitaiagai paatuat.

¹⁷ Kalulut nenda malagabagakku ka puririmanua, kalulut kukua le masibesiki aponia sigalaiakenen ka tei sulu, aipoi kasangamberinia iate siboboi le samba besiakenen masijarik rusa.

¹⁸ Malaga bagakku ka senen besiakenen sigalaiku ka saggot tubu ka tei matat sulu, aipoi buita kugalakake le ka sirimanua siooi lepat aku.

¹⁹ Samba kasei pa masiaagai, sirimania nenda simasikupaatuat ele sitaiagai paatuat? Kenanen bai kisedda muririmate geti nia ka senen besiakenen sigalaiku ka tei matat sulu ka besit tubu pasamba pasipapakei pusikuat paatuat. Nene leuet siboboi le.

²⁰ Kabagat nene taddanangan imatete paatuatku ka senen besiakenen sigalaiku ka besit tubu ka tei sulu.

²¹ Aipoi, ke' ai sirimanua simasaggo tubu kabagat sikut paatuat, puaagai samba puaagai kasara galaiakenen, iageti buita igalakake rubeiatnia ka sirimanua sitaimasoggo tubu kabagat nenda. Nene leuet pusiboboboi samba pugejaat baga sabeu.

²² Aponia uktuknia aisese sirimanua ka senen besiakenen sigalainia pasamba besit tubunia ka tei sulu samba kasiobat bagania.

²³ Sanganantat puririmanuania sun le pureureugat baga samba pugagalainia sun le besit paatuat, mandeaan kateteret sinoibo paatuatnia ta' masanang. Nene leu siboboi le.

²⁴ Ta'anai simaeru kasirimanua, ke' tamukom samba mulo samba musanang ka bagat besit tubunia. Kuagai, nene leu sibara kakabei Taikamanua.

²⁵ Kasei momoi mukom samba masanang ke' ta'anaiNia.

²⁶ Kalulut katubut sirimanua obaketNia ikau pusikuat paatuat, puaagai samba puangkakat baga, tapoi sirimania sijo ikoiniake masiruruake samba masitabbui apa-pa' samba kalepakatnia kaunangannia ka sirimanua kilibet bagat Taikamanua. Nene leuet pusiboboiat le samba besiakenen masijarik rusa.