Sip. 12 - BUKO SIPUNENAN

¹ Repdep le geti Sipasibabaraake ekeu kateteret silainge pei le ekeu, kepei bara gogoi pugejaat baga samba imalegre rura sikuam: “Taanai pusanangan kaku ka bagania!”

² kepei magepgep sulu samba pato, laggo samba panyanyat, samba sangamberi tanai rusa moii minca lepat urat,

³ kateteret sipasijajago lalep mugeret tubu, samba sangamberi sirimanua simaron tubu mukokoukou teitei, samba sangamberi tainanalep sipanunundu muari kalulut tatania tudduketra, samba masiitco sangamberinia ibailiu maramun,

⁴ samba sangamberi matatbaliu ka bebet enungan tuluplup, samba nau panundukat ibailiu masaggo, samba sangamberi nganga ibailiu kele ipunau uma', samba sangamberi tainanalep sipuurai mulukkuk,

⁵ ialeu et sirimanua ibailiu bulat maloto, samba pulotokat ai ka enungan, loinat badam mubotcoket, giritnangan tubunia sit ka besit tubu samba ereu mokom taan babara minca – kalulut sirimanua mei kakudduat sitaitatata samba sangamberi geri musaibat ka enungan,

⁶ Kepei tutakkiake palenggui perak samba turagatake alito mas, kepei tugatcaake tappaiat kababat bubuakat samba roda pangaisu tupakatai kauddut uggungan,

⁷ samba abu ibailiu polak kele siboiki samba ketsat toili ka Taikamanua sipununtukinia baga.

⁸ Pusiboboboi ka sangamberi pusiboboboi, ngangan Sipungangantoman, ka sangamberinia iate siboboi le.

Pangampulat tiboiet

⁹ Kapusikuat paatuatnia si Pungangantoman, igelaiake leu bagei ka paamian nenda puaagai. Ipaatu, isibo samba maigi iruruake urai sabau.

¹⁰ Si Pungangantoman ibesiake le ibara titiboat pusanangan samba masisurat titiboat sineseat ka puroipoat.

¹¹ Titiboat sirimanua simasiku paatuat kele tutura simalauru samba parurukatnia kele pamanta sipattaakenen, siaket sara sipasijajago.

¹² Ia leu et, togakku, suksuk le! Masigalai sara buko taanai puteteratnia, samba maigi masigelai masisaggoake tubu le.

¹³ Kapangampulat tiboiet kasenen siarep iate: kalotoake le geti Taikamanua samba pusiddonan le kasangamberi surukatNia, iate Nene galaiakenen senen sirimanua.

¹⁴ Kalulut iambit le geti Taikamanua senen galaitubuta simalipput ka pasiukuman; galai tubu sikatai samba simaeru.