Sip. 11 - BUKO SIPUNENAN

Pasiddonan pusikuat paatuat

¹ Baijukake rotim ka oinan, iageti lepa nenda uju imauju sesenungannia minca.

² Kau le rubeiat ka sipitu, sama leu ka sibalu sirimanua, lalut tanuagai pugejaat baga aponia sipuaaili geti ka polak.

³ Ke' bai tanai rusa mainep, iageti bele urat; samba ke'bai mabukkat loina ka isit ka kaiaman ele ka bare, kakudduat ka belekat loina nenda, sedda te ikukuddu.

⁴ Kasei geti mariuriu masipuletsei rusa ta' mangungurep; samba kasei geti mariuriu masiitco tanai rusa ta' masimomonei.

⁵ Kele taiagainu pueenungnia rusa samba sangamberi tolat ka bagat suruket sara sinanalep sipususuruket, kisedda te taiaagainu galaiet Taikamanua sigalai sangamberi galaiakenen.

⁶ Karapake karamennu ka simanceman, samba bui ipuari ipugalai kabeinu ka sinago, kalulut ta'nuagai Nene ele nenda geti tueeddet, ele karuania makere le erunia.

⁷ Toro nenda masiangkaake baga samba masiitco sulu nenda maeru ka mata;

⁸ kalulut nenda ke' mananta rurania sirimanua, eddangan ipuangka baga ka bagania, tapoi kau le irepdep geti gogoi simagepgep, kalulut maigi. Senen sangamberi siooi iate siboboi le

Panganturat ka tailange samba ka taiokko

⁹ Pugora kam baga, ale tailainge, kabau tubum, eddangania ipugora bagam ka teteret silainge ekeu, samba tutnake siobat bagam samba kasiobat matam, tapoi agai le, kalulut ka sangamberinia Nene iambit te geti ekeu Taikamanua ka pasiukuman!

¹⁰ Ribbaiake pureureugat baga ka paatuatnu samba areuake pangoringan ka tubum, kalulut pubabautubu samba torot puririmanua iate pusiboboiat le.