Sip. 1 - BUKO SIPUNENAN

Sangamberinia siboboi le

¹ Nene te tiboiet Sipungangantoman, togat David, rimata ka Jerusalem.

² Aikua Sipungangantoman, pusiboboiat, sangamberinia iate siboboi le.

³ Aponia lulunia ibesiake tubunia sirimanau ka tei sulu?

⁴ Tuitui muntogat sisara samba oi muntogat bagei, tapoi polak mariuriu le ibara.

⁵ Bela sulu, bele sulu, lepa paboddotnangan iailiake kudduat ibela minca.

⁶ Boroi rusa ka isit ka kaiaman, lepa bokkonangan iei ka bare, riuriru le ipasibokko, samba toili minca.

⁷ Sangamberi bagat oinan muguruk ka koat, tapoi koat ta masusun; kaipa ipuguruk bagat oinan, sedda te ipuguguruk simariuriu.

⁸ Sangamberinia magelaet, pat taioinangan ratiboakenia sirimanua; mata ta'maengtek masiitco, talinga ta' sesegebaga masiarep.

⁹ Aponia sipuaaili babara geti minca, samba apaonia atugalaian tugalai geti minca; ta' anai sibau sibabara ka tei sulu.

¹⁰ Ai leu pa momoi tukua: “Itco, nene sibau?” Tapoi nenda aian kateteret siburu peile, kepei bara sita.

¹¹ Repdemen ka gogoi situsasabau taanai, samba ka gogoi ka mata ka sibabara leu geti taan babara, taan babara repdemen ka tubutda sipuririmanua kalepakatnia.

Pasikukukru pusikuat paatuat iate siboboi le

¹² Aku Sipungangantoman, iate rimatada tai Israel ka Jerusalem.

¹³ Kumuineake le paatuatku masigaba samba masilelekake kabagat pusikuat paatuat senengamata sipuaaili katei manua. Nenda galajet sigejaake baga siaket Taikamanua katubut sangamberi tatogat sirimanua sisaggoiji tubu.

¹⁴ Akuitsoan sangamberi galaiet sigalaiakenen sirimanua katei sulu, tapoi itso, sangamberinia nenda iate siboboi samba besiakenen masijarik rusa le.

¹⁵ Simakoilut ta'momoi turoipoake, samba sitaanai ta'momoi tuadde.

¹⁶ Manibo le aku kapaatuat: “Itso pei, akuurauan samba akutuppaian pusikuat paatuat bele pei kasangamberi sirimanua sipupaparenta ka Jerusalem kepei aku, samba paatuatku maigingan aibakkati pusikuat paatuat samba puaagai.

¹⁷ Akumuineakean paatuatku masiagaikolou pusikuat paatuat samba puaagai, putaiaagai samba pukelakat paatuat. Tapoi kuagai le, nene leu et iate besiakenen masijarik rusa,

¹⁸ aipoi kabagat iginia pusikuat paatuat maigi leu et saggot paatuat, samba kasei masituppai igit puaagai, masituppai igit pureureugat baga.