Rut 4 - BUKO SIPUNENAN

Si Boas mutalimou kai Rut

¹ Iageti ei si Boas kakudduat paailiat ka gugurukat laggai. Kele ai kuddu sedda tusabaunangan sara sirimanua simanteu, kuanen Boas bakkat saepput Elimelekh. Lepa sogainangannia si Boas, “Sarainangku, konan boiki tapukuddu sene!” Oinangan leu et sirimanua nenda, lepa pukuddunangan.

² Lepa nananangan sia si Boas pulu sia sikebbukat laggai rapukuddu simakere sedda. Kela arapukuddu,

³ kuanangan si Boas katubudda sia sipueeppu simalegre katubunia, “Atoilingan si Naomi bara nia ka laggai Moab. Ai polak sakalimeuta si Elimelekh saepputta ioba isakiakenia.

⁴ Kupaatu bui tanuagai pagalaiatnia nenda. Kenuoba nusakinia, kuanungannia kamatadda sipukukuddu sene. Ketaa, kuanungannia simakolou, kalulut ruattangan le sipubabakkat masigalaiake nenda, tapoi ekeu peile maron ke tapakereakenia kaku.” Alegidangannia sirimanua nenda, “Oo, kusasaki.”

⁵ Iageti kuanangan si Boas, “Kauan ke kiseddangan bai. Tapoi kenusaki polak nenda kai Naomi, alanungan leu et si Rut, sinanalepra tai Moab silumangakeken togat Naomi. Kalulut polak nenda bui taibailiu bakkatda sia sipurereddenan katubut sirimanua sitatata nenda.”

⁶ Aleginangannia sirimanua nenda, kele kisedda bai tamatarek aku. Kineiget kuakean le puboboiki pubabakkatku ka polak nenda. Taanai lulunia kusaki polak nenda, aipoi tasipurereddenan katubukku masiikepake. Maeru pei le nusaki nia.

⁷ Kateteret nenda, keai sirimanua sipasisakiake ele sipasisiliake ikepakenennia, iageti masiparon pagalaiat nenda, simatukelenia sipasisakiake bui taigolok tarangainia lepa kaurangannia ka tubutda sipasisasaki. Kise te galaknia ka tai Israel enungan raparon pagalaiat pasakiat polak.

⁸ Kele aikuania ka tubut Boas, “Ekeuan le masisasaki,” lepa goloknangan tarangainia kaunangannia katubut Boas.

⁹ Iageti kuanangannia si Boas ka tubudda sikebbukat laggai samba kasirimanua sabagei siooi sedda, “Gogoi nene kam sangamberimui sibailiu simunengake sasakikku kai Naomi sangamberinia ikepakenennia sakalimeu si Elimekekh samba tatogania ia te si Kilyon samba si Mahlon.

¹⁰ Kisedda leu et alakungan si Rut, sinanalep sibara ka Moab, silumangakenen Mahlon nenda ibailiunia sinanalepku. Samba leu et polak nenda ibailiu bakkatda sipueppu katubutda sitatata nenda. Samba punuteteunia leu et ai sia katalagatda saeppunia samba kalaggainia. Repdep kam sasaraina, gogoi nene kam sibailiu sipasimunengake.”

¹¹ Sia sikebbukat laggai samba sirimanua sabagei siparuru sedda masikua, “Oo, kai sipasimunengake. Bule si Tuhan masibailiuake si nanalepnu nenda kele si Rahel samba si Lea sipasitutuake matatda tatogat Jakob. Bule ta magulai pupuririmanua le ekeu katalagatda ka muntogat Efrata samba siabeu tiboitubu ka Betlehem.

¹² Bule tatoga akenen Tuhan katubum geti, ka sinanalep sibau tubu nene bailiuakenangan keluargam kele Peres, togat Jehuda samba Tamar.”

Si Boas samba Punuteteunia

¹³ Iageti si Boas alanangan si Rut ibailiu sinanalepnia. Si Tuhan masipanukani si Rut bailiu pusuruketnangan lepa tutuakenangan sara mata tatoga simanteu.

¹⁴ Kuarangan tainanalep ka tubut Naomi, “Tuumunake le si Tuhan! Ka gogoi nene ai akean kekeu sara punuteteunu simanteu sipasikeli ekeu. Bule toga nenda ibailiu siabeu ka Israel!

¹⁵ Talikum nenda bulat manuntu bagania katubum. Akenangan siooi iake katubum sisaliu sangamberi akenenda si pitu tatoga taimanteu. Kineneiget ai akean ka tubum sara punuteteunu simanteu leuet, sipasiake geti ron tubu sibau katubum samba si pasikeli ekeu ka ujut pubajakatnu.”

¹⁶ Alanangan si Naomi toga nenda lepa pasikelinangannia ka sun nuntut baga.

¹⁷ Tainanalep pabebeakenenda lalep masioniake toga nenda si Obet. Katubut senen sirimanua rakua, “Si Naomi aian togania simanteu!” Si Obet nene te kalepakatnia ibailiu ukkui Isai, samba si Isai ukkui David.

Tiboi tubut muntogat David

¹⁸ Nene te muntogat Peres: togat Peres iate si Hezron,

¹⁹ togat Hezron iate si Ram, togat Ram iate si Aminadab,

²⁰ togat Aminadab iate si Nahason, togat Nahason iate si Salmon,

²¹ togat Salmon iate si Boas, togat Boas iate si Obed,

²² togat Obed iate si Isai samba si David togat Isai.