Rut 3 - BUKO SIPUNENAN

Si Rut musimanteu

¹ Pasat nene, kuanangan si Naomi kamatat Rut, “Kubesiake bule nupulalep minca samba numaungtuk.

² Mugalai ekeu pasamba tainanalep ka monen Boas, ele? Si Boas nenda saepputta simalegre katubutta. Oto, arepake! Soibo nene ei nia masipera gandum ka monenia.

³ Purauan kineneiget, kaunungan pusinginan pakeinungan leppei simakopelainge. Lepa ei ekeu kai Boas kapasiperakat gandum. Lepa eggenungan ilepa ipukom samba ipulo, tapoi bui iagainia ai ekeu sedda.

⁴ Lelekakenuangan kaipa iei merep. Ke amerepannia, ei ekeu sedda bukkaiakenungan sobbenia, lepa perep ekeu kabebet rerenia. Lepa geti Ai leu ikua kamatam aponia galaiakenennu.”

⁵ Aleginangannia si Rut, “Kauan ina, kugalaiake sangamberinia sikuam.”

⁶ Lepa ei si Rut kakudduat pugalaiat pasibobokat loinat gandum. Sedda galaiakenangan sangamberi sikuat talikunia.

⁷ Kele ailepa ipukom samba ipulo si Boas, sege bagania samba maangkanangan leu bagania. Lepa ei nia merep kalegret pasirurukat gandum. Simengmeng oi si Rut golok akenangan sobbet Boas, lepa perep akenangan tubunia kabebet reret Boas.

⁸ Tengamoi, sigege tugegenangan si Boas, bule ibeliuake tubunia. Itconangan sara sinanalep sipeperep ainia kabebet rerenia, tugegenangan.

⁹ “Kuanangan katubunia, kasei ekeu?” Aleginangannia si Rut, “Aku si Rut tuan! Si Tuan ia te saeppumai simalagre katubumai, sipuuku puririmanuangku. Kau imakate bagam tuan nuala aku ibailui sinanalepnu.”

¹⁰ Kunangan si Boas, “Bule si Tuhan masipanukani ekeu.” Pakireakepei katubukku kele sigalainu ka tubut talikum, iageti sigalainu kineneiget masipakoinong nuntut bagam bulat sabeu. Momoi le nugaba simanteu sibautubu, katalagatda simakayo ele simageba, tapoi taanugalaiake kele nenda.

¹¹ Lulut nenda bui imakarat bagam. Sangamberinia tiddougetnu, kugalaiaake; kalulut sangamberitda ka laggai nene, araagaian, ekeu nene sara sinanalep simaeru paraboat le.

¹² Kirenangan aisesengan, purimanuaiatnu puukuketku le, kalulut aku nene saeppum simalegre katubum. Tapoi aipeile sirimanua sabagei sipuuku purimanuaiatnu. Samba ia te saeppu, bele peile kele aku.

¹³ Sene boiki nukukuddu soibo nene. Mancep geti nounoukungannia buleu ioba masigalaiake puukuket nene katubum ele ta. Ke ioba kauan; tapoi ke taioba geti, puukukungan ekeu kalulut si Tuhan sipuririmanua. Kineneiget perepakean ekeu sene pat pato.”

¹⁴ Iageti perep nia si Rut kabebet reret Boas. Kapatokat peile suru si Rut bui raitconia sirimanua. Aipoi si Boas ta ioba raagainia berisara sirimanua ai oi kakudduat nenda.

¹⁵ Kuanangannia si Boas katubut Rut, “Golok salendangnu samba nganangakenungannia sene.” Iageti goloknangan salendangnia samba nganangakenangannia. Lepa uruakenangan si Boas ele dua pulu nga kilo gandum pa' kabagat salendang. Lepa akkatakenangan nia ka tatat Rut. Lepa nenda ei si Boas ka laggai.

¹⁶ Kele aisege si Rut kalalep talikunia, nounounangannia talikunia, “Ekeu leu nene Rut?” Iageti legreakenangan tubunia si Rut, samba tiboinangan sangamberinia sigalaiakenen Boas katubunia.

¹⁷ Samba kuanangan minca si Rut, “Sangamberi gandum nene siaket Boas katubukku, aikua, tamomoi nutoili ka inam ke taanai abbinennu.”

¹⁸ Iageti kuanangan si Naomi, “Ngena le, toggaku, teteret nuinco kipa ilepa sangamberinia nene. Ta imemengmengake sangamberinia nene si Boas, ketapei lepa puukuketnia nene gogoi nene leu et.”