Rut 2 - BUKO SIPUNENAN

Si Rut mugalai ka monen Boas

¹ Ai sara saepputnia si Naomi sibara karubeiat sakalimeu si Elimelekh. Sirimanua nenda makayonia samba siabeu tiboitubu. Oninia si Boas.

² Kasara gogoi kuanangan si Rut ka tubut Naomi, “Ina, kuoba mei ka mone mamipi gandum, buleu bara sibebele kakabeira si pasimomonei, kupaatu aisia siobaake kugalaiake kele nenda.” Aleginangannia si Naomi, “Kauan togakku, eddangan nuei!”

³ Iageti einangan leu et si Rut kamone, masipipi gandum masitut sia si pasimomonei, samba masipipi gandum. Apasese einia le ka monen Boas.

⁴ Tak amauju oi si Boas barania ka Betlehem samba ikau paroroiat katubudda sipasimomonei. Kuanangan, “Bule si Tuhan masipaalei kam, Alegiddangan si pasimomonei, bule si Tuhan masibujai si tuan.”

⁵ Lepa nounounangan sapaguguletnia si Boas, “Kasei sinanalep nenda?”

⁶ Aleginangannia siuteake sipugagalai nenda, “Nia sinanalep tai Moab, siooi sibau pasamba si Naomi si bara ka laggai Moab.

⁷ Aitiddou katubukku bule kuobaakenia masitut sipasimomonei bule ipipi gandum simasasaragai, barania simansep peile pugalainangan sitaipuari kineiget alepaan ipugalai aian nia muari kasapou.”

⁸ Lepa nenda kuanangan si Boas katubut Rut: “Arepake boiki, togakku! Buian nuei masiruruake jelai ka mone ka bagei samba buian nutuitui sene, tapoi senean te palegre ka sapaguguletku tainanalep.

⁹ Itco le ka mone sigetaira sirimanua nenda. Tut le teiteira tainanalep nenda. Kalulut akupatonean ka sapaguguletku taimanteu bule ta rageugeu ekeu. Ke maonggou ekeu, kenan ka tappaiat samba lo oinan siseiulura sapaguguletku nenda.”

¹⁰ Masiarep nenda, purekkuknangan si Rut kamatat Boas samba kuanangan, “Tuan tamateuaku masisilo, sigalainu simakope eru kele nene, si toile aku sitaimateu masisilo ukut bagam nene.”

¹¹ Aleginangannia si Boas, “Akuarepman sangamberinia sigalainu kaatubutda saeppum kateteret aitata si manteunu, Kuagaian anukaddiuake saeppum samba laggainu, moi samba pasamba katubut sirimanua taiagaietnu.

¹² Bule si Tuhan masisiliake sangamberi erunu, bule ekeu leu et masisilo iake simateu nusilo sibara kai Tuhan Taikamanuanda tai Israel, lulut amoian poi ekeu mukunem ka tubuNia.”

¹³ Kuanangannia si Rut, “Tuan maeru ekeu katubukku, kenanen aku nene tak sipugagalai katubum, erunu Tuan sikau masipusuibi bagakku.”

¹⁴ Kele aiaili teteret pukoman, kuanangan si Boas kamatat Rut, “Konan mukom. Aikoi Roti samba suusuunia.” Iageti pukomnangan si Rut pasambadda si pasimomonei. Kaunangan leu et si Boas kai Rut gandum silepa rarak, pukomnangan si Rut pat ektek, lepa aipukom ai peile sipulelegei.

¹⁵ Kele aitusuru ipasiruruake minca, parentaakenangan sapaguguletnia si Boas: “Katalagat sangamberi legei nenda leu momoi iruruakenia, bui' nugeugeu kamnia;

¹⁶ samba leu buita nupali' kam nugolok kam goiso ka apprat jelai nenda ka sia samba galakmuiannia, bule iruruakenia; bui' nugolu kamnia.”

¹⁷ Pat aili kasoibokat sarat masipi'pik gandum aigalai si Rut. Lepa aibobo loinania bele igolok ngambenia kaloinania, pele airuruakenia iginia pulunga kilogram.

¹⁸ Lepa toilinia kalaggai, ambitnangan gandum siruruakenannia, samba koinongakenangan ka talikunia igit siruruakenennia. Kaunangan leu et katalikunia legei kan, kateteret aipukom.

¹⁹ Lepa kuanangan si Naomi katubunia, “Kaipa anusese sangamberinia nene? Kasei ka mone anupugalai gogoi nene? Bule Taikamanua masibujai sirimanua sipasigagalai topit ka tubum!” Iageti poiliatnangannia si Rut katubut Naomi, kudduatnia masipipi gandum iate ka monen Boas.

²⁰ Kuanangannia si Naomi, “Si Boas nene saepputta bulat simalegre katubutta. Kuanangan si Naomi, bulat iate masipuuku sita. Bule ibujainia si Tuhan. Si Tuhan masisutnake palelenganNia ka tubudda sia sipuririmanua samba leu ka tubudda sia simamatei.”

²¹ Lepa kuanangan minca si Rut, “Ina, sirimanua nenda leu masikua bule kupasipipi simariuriu masiruruake gandum pasamba sia sipugagalai sabagei pat sapru itumonei buat gandum.”

²² Kuanangannia si Naomi, “Oo, kirenangan maerupeile nupasipipi gandum pasamba sipugagalai tainanalep bagei ka monen Boas. Ke mei ekeu kamonenda sabagei babara ragegeugeu ekeu sedda!”

²³ Kalulut nenda, ka sia si Rut itut le sipugagalai tainanalep sabagei mei ka monen Boas. Pasipipinangan gandum sedda teret sangamberi gandum, sappru itumonei – bara nia ka pasimoneiat siboiki teret sappru. Samba ujunia nenda, ikukuddu si Rut ka talikunia.