ROMA 9 - BUKO SIPUNENAN

Pamiliat Taikamanua ka bangsa Israel

¹ Bulat sibulatnia le kutitiboi ka bagat Kristus, ta kubobokoi. Bagai bagaku leu masimunengake ka bagat Ketsat Sipunenan,

² kopenia reureu bagaku, samba taipuaarinia oringen paatuatku.

³ Pat obakungan tutelei aku samba tuareu ka Kristus kalulut sasarainangku, sabangsaku ka puakkulakat.

⁴ Tai Israel le poi sia, sibailiuakenen bailiu toga, samba arasiloan pulatsanan samba palelengan, samba Surukat, puaranan samba sibala.

⁵ Punuteteura taikebbukatta le sia, ka sia le kabraiat Kristus siripot pusirimanuaat. Sisaliu sangamberinia le nia. Tuumunake le Taikamanua teret buruburu! Amen.

⁶ Tapoi tiboiet Taikamanua ta musisiboboi. Aipoi ta sangamberi tai Israel oniakenen Israel,

⁷ samba ta sangamberi punuteteu Abrahama addeakenen togat Abraham, tapoi: “Sibara kai Isak le oniakenen punuteteunu.”

⁸ Katukolobatnia: Ta tatoga siripot akkula oniakenen tatogat Taikamanua, tapoi tatogat palelengan le oniakenen punuteteu sipulelelek.

⁹ Aipoi kise le tiboiet palelengan: “Ka tetere kele nene momoi aku minca, samba aian kai Sara sara toga simanteu.”

¹⁰ Ta sarat nenda, tapoi si Rebeka leu sibara ka sara sirimanua le aipusuruket, ia te si Isak taikebbukatta.

¹¹ Aipoi enan tapei amututu matada tatoga nenda samba tapei aragalai simaeru ele sikatai, – bule ituronake isiat Taikamanua pagalaiat pamiliatnia, ta sipubobongen ka galajet tapoi ka pasogaiatnia le –

¹² aikua kai Rebeka: “Toga sikebbukat le ibabailiu pagugulet sisule,”

¹³ kele sitususurat: “Kupununtuki baga si Jakob, kupulagaki baga si Esau?”

¹⁴ Oto kipangan le takukua? Sitaimaroipo le pa Taikamanua? Ta kisedda!

¹⁵ Aikuangan poi kai Mose: “Kupukakateki baga kasei siobaku kupukateki baga, samba kupukikilibi baga siobaku kupikilibi baga.”

¹⁶ Oto pagalaiat nene ta sibara ka teu bagat sirimanua ele sigalai sirimanua, tapoi ka kiliu bagat Taikamanua le.

¹⁷ Aipoi aikua Surat Sipunenan kai Parao: “Ia te lulunia akurioake ekeu, bule kupatoila gegeku ka tubum, samba bule itupaarep oningku ka sangalio polak.”

¹⁸ Oto ipukateki le baga siobania ipukateki samba ikelaake paatuatda kasei siobania ikelaake paatuat.

Golut Taikamanua samba erut bagania

¹⁹ Kineneiget nukukuangan te kam ka mataku, “Ke kise bai nia, apangan le lulunia iseseleake sirimanua Taikamanua? Kasei poi momoi masisakkala teu bagania?”

²⁰ Kasei te ekeu ale sirimanua nooba masisiddot Taikamanua? Momoi pa ikua sigalai ka sipasigagalai nia, “Kise kodda anugalai aku?”

²¹ Ta pa anai geget tukang pario ka polak ottot masigalai ka sangatatappania nenda masibailiuake nia sara bibilet simalainge samba sara simagulai lainge?

²² Kise leu te Taikamanua. Ioba masipatoila golunia samba masipaagai ronnia, tapoi aiomake le bagania simakope ka tubuda pugolukietnia, sinarekngakenen kaunen ka pulangokat;

²³ samba ioba leu ipatoila kayot pulatsanannia ka tubuda pukatekietnia baga sinarekngakenen kaunen ka pulatsanan,

²⁴ ia te sita, sinogainia, ta sarat bangsa Jahudi, tapoi sibara ka bangsa bagei leu,

²⁵ kele sikuania ka bukot nabi Hosea: “Sia ta bangsaku kuooniake bangsaku, samba taikikilibet bagaku, kuoniake kilibet bagaku,”

²⁶ samba ka kudduat sikuania ka matada: “Ta bangsaku kam,” sedda ikua ka matada: “Tatogat Taikamanua sipuririmanua.”

²⁷ Si Jesaya leu amusoga pagalaiat tai Israel: “Kenanen kele ngai ka koat igida bangsa Israel, sarat goiso muririmanua.

²⁸ Aipoi maruei le ienungake ukuman simaroipo ka polak nene si Tuhan.”

²⁹ Samba kele sikuat Jesaya siboiki: “Ke bai ta ilegeiake si Tuhan Sebaot punuteteuta, aibailiuan sita kele Sodom samba kele Gomora.”

Puaragatda sabangsa bagei samba kapepeatda tai Israel

³⁰ Oto apangan le kuanenta? Nene le: Sia sabangsa bagei sitaikukuruake puroipoat, arasesengan puroipoat, ia te puroipoat kalulut tonem baga.

³¹ Tai Israel geti kenanen rakukuru surukat puroipoat, ta asege sia ka puroipoat.

³² Apa lulu? Ta poi kalulut tonem baga rakukuru nia, kalulut galajetda le, tusoksokrangan tebai ka bukku katusoksongan,

³³ kele sitususurat: “Bulatnia kugalakngake ka Sion sara bukku tuluiet samba sara bukku katusoksongan, samba kasei sikatonemi nia, ta tupakakaila.”