ROMA 8 - BUKO SIPUNENAN

Puririmanua ka bagat Ketsat

¹ Kineneiget taan ioorak sia ukum sikuddu ka bagat Kristus Jesus.

² Ketsat sipasiaake purimanuaiat poi ka bagat Kristus Jesus amasiujaake sita ka ukum jo samba kamateiat.

³ Apa poi sitaioi igalaiake Surukat kalulut gulaita sirimanua, aikoiniakean Togania Taikamanua ka bagat akkula simakere ka sirimanua sijo, samba kalulut jo, aiorakngakean ukuman ka jo ka bagat akkula,

⁴ bule ipuaili puroipoat kiddiet Surukat ka tubuta, sita sipuririmanua taan siripot akkula, tapoi siripot Ketsatnan le.

⁵ Aipoi sia sipuririmanua siripot akkula, masipaatu siripot akkula; sia sipuririmanua siripot Ketsat, masipaatu siripot Ketsat.

⁶ Pupaatuanan akkula poi kamateiat le, tapoi pupaatuanan Ketsat ia te purimanuaiat samba aban.

⁷ Oto pupaatuanan akkula, ia te pasaggangan ka Taikamanua, aipoi ta mususum nia ka Surukat Taikamanua; ta poi momoi igalaiake nia.

⁸ Sia sipuririmanua siripot akkula, ta iooba sia Taikamanua.

⁹ Tapoi kam geti ta sipuririmanua ka bagat akkula, tapoi ka bagat Ketsat le, ke bulatnia bai mukkuddu Ketsat Taikamanua ka bagamui. Tapoi kasei si ta anai Ketsat Kristus, ta bakkat Kristus nia.

¹⁰ Tapoi ke ai Kristus ka bagamui, mamatei tedda kam kalulut jo, ketsat geti muririmanua le kalulut puroipoat.

¹¹ Ke mukuddu Ketsat Taikamanua sipasisusuruake Jesus ka simamatei ka bagamui, oto nia sipasisusuruake Kristus ka simamatei masisuruake leu tubumui simamateiet kalulut Ketsatnia sikuddu ka bagamui.

¹² Oto sasaraina, sipuutakngan le sita, tapoi ta ka akkula, bule tapurimanua siripot akkula.

¹³ Aipoi ke siripot akkula nupurimanua kam, mamatei le kam; tapoi ke siripot Ketsat, mateiakemuian sigalai tubumui, purimanuamuian.

¹⁴ Sangamberi sirimanua pinalulut Ketsat Taikamanua, sia te tatogat Taikamanua.

¹⁵ Aipoi ta Ketsat pupagugulenan sikau kam minca muloto anusilo kam, Ketsat sikau kam ibailiu tatogat Taikamanua le. Ka bagat Ketsat nenda tapusoga: “Abba, Ukkuiku!”

¹⁶ Ketsat nene te pasamba ketsatta masimunengake, tatogat Taikamnua le sita.

¹⁷ Samba ke toga sita, sipasiikep leu sita, tibonannia: sipasiikep palelengan Taikamanua, tasilo nia pasamba Kristus, aipoi ke samba tapasiorik kam Kristus, tulalatsatnake leu sita pasamba nia.

Pulatsanan sitaitatata ka gogoi sibabara

¹⁸ Siripot pinaatuku, pangoringan ka tetere kineneiget, ta isisiripoki tupakereake nia ka pulatsanan patoilaket ka sita geti.

¹⁹ Bulat amarrepdepman poi bagada sangamberi sibaraakenen masingena katutoilakatda tatogat Taikamanua.

²⁰ Aipoi sangamberi sibaraakenen amusupman ka kaaanau, ta ke teunia, ka teu Taikamnua sipasisusupmake le,

²¹ Tapoi ka bagat pukakaronan, aipor sibaraakenen tuujaake leu ka paoreat pulangokat, tuguru ka puujaat pulatsanan tatogat Taikamanua.

²² Taagai poi, aili teret kineneiget sangamberi sibaraakenen kere muhoihoi samba kere masiorik besit pususule.

²³ Ta sarat sia, sita leu sipasisilo bua pusisikebbukat sibara ka Ketsat, muhoihoi leu sita ka paatuatta ka bagat pangenaatta ibailiu sita toga, ia te pasiarau tubuta.

²⁴ Kalulut pukakaronan le atasilo puaragat. Tapoi pukakaronan siitco, taan pukakaronan; aipoi ke atuitcoan apananta pei le takakatoni nia?

²⁵ Tapoi ke takaroni kam staiitcoketta, ngenaaketangan nia ka om baga.

²⁶ Kisedda leu Ketsat masirom sita ka bagat gulai tubuta. Aipoi ta taagai kipa siripokatnia manindou; tapoi Ketsat le maninindou punu tubuta ka Taikamanua ka bagat puhohoihoi sitaioi tutiboake.

²⁷ Samba Taikamanua siagai masiitco paatuat sirimanua, iagai pinaatut Ketsat, aipoi siripot siobat Taikamanua le itiddouake sirimanua sipunenan.

²⁸ Kineneiget taagai kam, ai le mugagalai Taikamanua ka bagat sangamberinia masibaraake katuerukat ka sia sipununtuki nia baga, ia te sia sinogei teu bagat Taikamanua.

²⁹ Aipoi sia sipilit Taikamanua ka panandaatnia, sia leu aiteuake ka panandaatnia ibailiu sia makere ka tularat Togania, bule Togania nenda bailiu sikebbukat ka sasarainania simigi.

³⁰ Samba sia siteuakenennia panandaatnia, sia leu te sogaietnia. Samba sia sinogainia, sia leu te paroipoetnia. Samba sia siparoiponia, sia leu te latsatnakenennia.

Nuntut bagat Taikamanua ka bagat Jesus Kristus

³¹ Oto kipangan le takukua ka pagalaiat sangamberinia nene? Ke Taikamanua masipaalei sita, kaseian le sisaggangi sita?

³² Nia sitaikiliu Togania, tapoi aibuluake le nia punu tubuta sangamberita, malangan pa ta ipanguruatnake sangamberinia bagei leu ka sita?

³³ Kasei te masipangangandu sipilit taikamanua? Taikamanua le poi sisineseatnake sia.

³⁴ Kasei te masioorakngake ukum? Kristus Jesus le, simamatei, sitususuru pei bagei, sipukukuddu kai kattoet Taikamanua, sipasititiddouake sita leu.

³⁵ Kasei te masipasasaraake sita ka nuntut bagat Kristus? Paoreat ele gejat baga ele pangukurat, ele pulajeat ele pugebakat, ele kalotoakenen, ele lanjau?

³⁶ Kele sitususurat: “Kalulut ekeu ramateiake kai sanganantat gogoi; kean le biribiri jajaket le raaddeake kai.”

³⁷ Tapoi ka bagat sangamberinia nene mamanang le sita simakope kalulut nia sipununtuki sita baga.

³⁸ Amatoneman poi bagaku, kamateiat ele purimanuaiat, malaika ele sibara gege, sibabara kineneiget ele sibabara geti, ele apa pa simagege,

³⁹ sikuddu ka pata ele taikabaga, ele apa pa bagei, ta momoi ipasaraake sita ka nuntut bagat Taikamanua ka bagat Kristus Jesus Tuhanta.