ROMA 7 - BUKO SIPUNENAN

Puririmanuanda tai Kristen tupasikatnake ka pukekebbukat

¹ Ta pa nuagai kam sasaraina (aipoi ka sia siagai surukat le kupaninibo), sarat ka teteret ai pei le muririmanua sirimanua le ikukupkup nia surakat?

² Aipoi sinanalep sipusisimanteu, iappara nia surukat ka simanteunia ujut ai pei le muririmanua simanteunia. Tapoi ke amateian geti simanteunia bela nia ka surukat siappara nia ka simanteunia.

³ Oto ke musimanteu nia ka simanteu bagei ai pei le muririmanua simanteunia, sipaeelet le nia tuoniake; tapoi ke amateian geti simanteunia bela nia ka surukat, taan sipaeelet nia, ke mutalimou nia ka simanteu bagei.

⁴ Kisedda leu te kam sasaraina, amateian kam ka Surukat kalulut tubut Kristus, bule ibailiu kam bakkatnia, nia sisuruakenen ka simamatei, bule tapubua ka Taikamanua.

⁵ Ka teteret ai pei le sita muririmanua ka bagat akkula, mugalai le pubotbonan jo ka bagat laddou tubuta sibaraakenen Surukat, sibuaake kamateiat.

⁶ Tapoi kineneiget abelangan sita ka Surukat, aipoi amateian sita ka bagania sikabe sita siburu, ka enungan sibauan le siripot Ketsat tapupagugulet, taan kele siburu masitut siripot takat Surukat.

Surukat samba jo

⁷ Ke kise bai nia, kipangan le takukua? Jo le Surukat? Ja kisedda! Bailoknia, kalulut Surukat le agaitangan jo. Ta kuaagai aponia kiddi baga, ke ta Surukat masikua: “Bui imakiddi bagam!”

⁸ Tapoi ka bagat Surukat, jo masitutuake sene ngamata pubotbonan ka bagat tubuku; aipoi ta bai anai Surukat, matei le jo.

⁹ Siburu taipususurukat akupurimanua. Tapoi kele aioi Surukat, purimanuanangan ka sia jo,

¹⁰ aku geti matei. Toila aimatoila kaku, nenda Surukat siripokatnia sipasikakau ka purimanuaiat, bailiu sipasikakau ka kamateiatnan le.

¹¹ Aipoi ka bagat Surukat, oinangan ipataju aku jo samba kalulut Surukat mateiakenangan aku.

¹² Oto sipunenan le Surukat, parenta leu sipunenan, maroipo samba maeru.

¹³ Ke kise bai nia, simaeru nene bailiu kamateiat le kaku? Ta kisedda! Tapoi bule imatoila pujojonia, pakeinangan simaeru nene jo masibaraake kamateiat kaku, bule kalulut parentat Taikamanua, memei matotoila galai tubunia bulat jo le nia.

Pasaggangan Surukat samba jo ka bagat sirimanua

¹⁴ Ataagaian poi, Surukat puketsanan le; aku sipuaakkula le, atusakiakean ka kupkumen jo.

¹⁵ Apa poi sigalaiku, ta kuagai. Aipoi ta siobaku nenda akugalai, kasitsitnakenenku le ia te akugalai.

¹⁶ Ke sitaioobaketku kugalai, kuseseake maeru le Surukat.

¹⁷ Oto taan aku amasigalaiake, jo sikuddu ka tubuku le amasigalaiake.

¹⁸ Kuagai poi, ta anai ka tubuku, tibonannia ka bagat pusisirimanuangku, ta anai beri sara simaeru. Puooba ka simaeru geti ai, tapoi masigalaiake ta anai.

¹⁹ Aipoi ta siobaku, ia te simaeru, kugagalai, sitaioobaketku le, ia te sikatai, kugagalai.

²⁰ Oto ke sitaioobaketku le kugalai, taan aku masigagalaiake nia, jo sikuddu ka tubuku le masigagalaiake.

²¹ Oto sesekungan kele sibailiu aturan: Ke kukiddi masigalai simaeru, sarat sikatai le muoottou kaku.

²² Ka bagat paatuatku geti kuoba Surukat Taikamanua,

²³ tapoi ka bagat laddou tubuku kuitco surukat bagei sipasasaggak ka surukat sikuddu ka paatuatku, bailiu aku kabeket surukat jo sikuddu ka bagat laddou tubuku.

²⁴ Apangan te aku sirimanua uktuk! Kaseian le masibebelaake aku ka tubu simamateiet nene?

²⁵ Sura le ka Taikamanua kalulut Jesus Kristus Tuhanta!

²⁶ Oto ka paatuatku geti kurereddet Surukat Taikamanua, tapoi ka bagat akkulaku geti surukat jo le kurereddet.