ROMA 5 - BUKO SIPUNENAN

Buat puroipoat kalulut tonem baga

¹ Oto atuparoipongan poi sita ka enungan tonem baga, apaabanan sita ka Taikamanua kalulut Tuhanta, Jesus Kristus.

² Kalulut tonem bagata ka Jesus leu momoian tananam kiliu bagat Taikamanua; ka bagat kiliu baga nene te tapurimanua kineneiget. Oto maangka bagata ka bagat pukakaronan masisilo pulatsanan Taikamanua.

³ Tapoi ta sarat nenda, ka bagat gejat baga leu maangka bagata, taagai poi gejat baga nene ibaraake om baga,

⁴ samba om baga ibaraake soppi samba soppi ibaraake pukakaronan.

⁵ Samba pukakaronan ta ipabubuji baga, aipoi nuntut bagat Taikamanua atuurungan ka paatuatta kalulut Ketsat Sipunenan sipanguruatnakenen ka sita.

⁶ Aipoi ka teteret ai sita mulululuk, sedda te aimatei Kristus punu tubuta sijo ka tetere siteuakenen Taikamanua.

⁷ Beringan punu tubut sirimanua simaroipo, ta malabbei ramatei sirimanua; tapoi punu tubut sirimanua simatopit ai leu simaeme matei.

⁸ Tapoi Taikamanua aipatoilaan nuntut bagania ka sita, aipoi ka teteret ai pei le sita mujojo, amateian Kristus punu tubuta.

⁹ Sara pei kineneiget atuparoipongan sita kalulut logaunia, bulatnia maarauan sita ka golut Taikamanua.

¹⁰ Aipoi ke ka teteret saggak pei le sita apaabanan sita ka Taikamanua kalulut kamateiat Togania, sara pei kineneiget sita siabanakenennia, bulat iaarauake kalulut purimanuaiat Kristus.

¹¹ Ta sarat nenda. Sara pei tapuangka baga ka Taikamanua kalulut Jesus Kristus, Tuhanta, kalulut nia le poi atasilo kam paabanan.

Adam samba Kristus

¹² Kele kipa aituguru jo ka polak nene kalulut sara sirimanua samba kamateiat kalulut jo, kisedda te aipuaili kamateiat ka sangamberi sirimanua, sangamberidangan poi amasigalaiake jo.

¹³ Aipoi enan tapei anai Surukat, aian jo ka polak. Tapoi ta tuaddeake jo ke ta anai Surukat.

¹⁴ Kenanen kisedda amurimatangan kamateiat barania ka teteret Adam aili ka teteret Mose samba leu ka sia sitaigalaiake jo simakere kele sigalaiakenen Adam. Adam ia te tularat tubut siooi geti.

¹⁵ Tapoi kiliu bagat Taikamanua ta makere ka pasisasabau Adam. Aipoi ke kalulut pasisasabau sara sirimanua, bailiu sangamberi sirimanua matei, sara pei beunannia kiliu bagat Taikamanua samba panguruatnia, siuruakenennia ka sangamberi sirimanua kalulut sara sirimanua, ia te Jesus Kristus.

¹⁶ Samba panguruat ta leu makere nia ka jot sara sirimanua. Aipoi pasiukuman ka sara pasisasabau ia te ukum pulangokat, tapoi panguruat kiliu baga ka igit pasisasabau ia te sikau ka katuroipoat.

¹⁷ Ke kalulut jot sara sirimanua, puritmatanangan kamateiat kalulut sara sirimanua, sara pei ramaroipo sia sipasisilo kiliu baga sitaimagulai samba panguruat puroipoat bulat muririmanua samba muririmata sia kalulut sara sirimanua, ia te Jesus Kristus.

¹⁸ Oto kele kalulut sara pasisasabau, sangamberi sirimanua iorak ukuman, kisedda leu te kalulut sara galajet puroipoat sangamberi sirimanua masisilo puroipoat rapurimanua.

¹⁹ Kele leu kalulut taimareddet sara sirimanua sangamberi sirimanua bailiu sijo, kisedda leu et kalulut reddet sara sirimanua, sangamberi bailiu simaroipo.

²⁰ Tuppai minca guru Surukat, bule memei iurau igit pasisasabau; tapoi kaipa iurau jo, memei mabura leu et kiliu baga,

²¹ bule kele ipurimata jo ka bagat kamateiat, kisedda leu ipurimata kiliu baga kalulut puroipoat sieei ka purimanuaiat sitaitatata, kalulut Jesus Kristus, Tuhanta.