ROMA 4 - BUKO SIPUNENAN

Abraham uluiet kalulut tonem bagania

¹ Oto apa kuanenta pagalaiat si Abraham, ukkuita ka puakkulakat, aponia aisese?

² Aipoi ke kalulut sigalainia bai si Abraham ituparoipo nia, oto mateu iatsiake tubunia; tapoi ta ka matat Taikamanua.

³ Kipa poi aikua Surat Sipunenan? “Matonemnangan bagat Abraham ka Taikamanua; tonem bagania nene te aiaddeake Taikamanua sibailiu katuroipoatnia.”

⁴ Ka sipugagalai, upa siloketnia ta tuaaddeake panguruat, tapoi siripot siloketnia le.

⁵ Ka sia sitaikaroake pugagalai geti, tapoi ikatonemi le Taikamanua siparoipo sirimanua sijo, tonem bagania nenda te bailiu katuroipoat.

⁶ Beri si David leu aikuangan uktukda pinaroipot Taikamanua ta sibara ka pugagalainia:

⁷ “Mauktuk sia sirimanua siappeakenen pinasabaunia, samba atutabboan jonia.

⁸ Mauktuk sirimanua sitaiaaddeakenen Tuhan ka tubunia jonia.”

⁹ Oto tiboiet puuktungan nene sarat ka tubuda sipususunat le, ele samba ka sitaipususunat leu? Atakuangan, kai Abraham tonem bagania le aiaddeake Taikamanua bailiu katuroipoatnia.

¹⁰ Pigamoi aituaddeake ka tubunia? Ka teteret atusunatnan nia, ele ka teteret tapei atusunat? Ta ka teteret atusunatnan nia, ka teteret tapei atusunat le.

¹¹ Lepa pusunatnangan, kele toggaiat puroipoat kalulut tonem baga enan pei le ta mususunat nia. Kisedda te aibailiu nia ukkui ka sangamberi simatonem baga sitaipususunat, bule ka sia leu tonem bagada tuaddeake katuroipoat.

¹² Abraham bailiu ukkui leu ka sia sipususunat, ta pususunatnia le, tapoi masitut leu tonem bagat ukkuita si Abraham ka teteret tapei amusunat nia.

Palelengan Taikamanua tusilo kalulut tonem baga

¹³ Aipoi ta kalulut Surukat aikau Taikamanua palelengan kai Abraham samba ka sapunuteteunia ibailiu nia sipasiikep polak nene, tapoi kalulut puroipoat sibara ka tonem baga le.

¹⁴ Ke bai sarat sia sipasigagalaiake Surukat le masiikepmake palelengan Taikamanua, siboboian le tonem baga samba palelengan bailiu si ta galai.

¹⁵ Aipoi Surukat, masibaraake golu, tapoi ke ta anai Surukat, ta leu anai pasipasasabau.

¹⁶ Ia te lulunia puroipoat sibara ka tonem baga le, ibailiu nia panguruat katet baga, bailiu maron palelengan nenda ka sangamberi punuteteu Abraham, ta sarat ka sia sipususurukat, tapoi ka sia leu siputotonem baga kele tonem bagat Abraham. Aipoi si Abraham ukkuita sangamberita,

¹⁷ kele sitususurat ka Surat Sipunenan: “Akubailiuakean ekeu ukkira maigi bangsa.” Kise te palelengan Taikamanua kai Abraham. Matonemnangan bagania ka Taikamanua, sirimanuaake simamatei samba ka tiboietnia ibaraake si ta anai bailiu ai.

¹⁸ Kenanen taan anai karonan, tapoi riuriu le ikaroni samba matonem bagania babailiuna nia ukkuira maigi bangsa, siripot sikua ka Surat Sipunenan, “Kise te geti igida sapunuteteunu.”

¹⁹ Ta ipagugulai tonem bagania iitco tubunia bulat amabajaan, aiailingan poi sangotu ngarura bajania, kisedda leu si Sara taan mususuruket.

²⁰ Tapoi ka palelengan Taikamanua ta ipaguguilak tonem bagania, memei le maroron tonem bagania samba iumunake Taikamanua,

²¹ bulat tonem le bagania momoi ibaraake Taikamanua pinaleleknia.

²² Kalulut nene iaddeake ka tubunia Taikamanua bailiu katuroipoatnia.

²³ Tiboiet “iaddeake ka tubunia,” ta sarat kai Abraham aitusuratnake,

²⁴ tapoi samba ka sita leu; aipoi ka sita leu iaddeake Taikamanua, kalulut tonem bagata ka tubunia, sipasisusuruake Jesus, Tuhanta ka simamatei,

²⁵ ia te Jesus sinegeakenen kalulut jota, samba sisuruakenen masiparoipo sita.