ROMA 3 - BUKO SIPUNENAN

¹ Oto aponia pusasaliura tai Jahudi? Ele apa kauta nia sunat?

² Bulat maigi samba sene ngamata. Siboiki: Ka sia le kasegekat tiboiet Taikamanua.

³ Tapoi kipa, ke ai ka talagada taimatonem baga, momoi pa taimatonem bagada ipakatai topit Taikamanua?

⁴ Bulat ta momoi! Simaroipo le Taikamanua, sirimanua geti simaboko le, kele sitususurat ka Surat Sipunenan: “Bule imakoinong roipom ka bagat tiboietnu: samba numamanang ke tuukum ekeu.”

⁵ Tapoi ke taimaroipota masipakoinong roipot Taikamanua, kipa takukua? Takukua pa ta maroipo Taikamanua ke iukum sita? (Manibo aku ka pusisirimanua.)

⁶ Bulat ta momoi! Ke kisedda bai, kipangan le iooi iukum taikapolak nene Taikamanua?

⁷ Tapoi ke kalulut taimaroipoku memei matotoila pubulanan Taikamanua sibailiu katulatsanannia, tuukumake pei le kodda aku kele sirimanua sijo?

⁸ Angoi ta takua kele sikuada sabagei masigegei sita, rakua atakua, “Kauan tagalai kam sikatai, bule ibara simaeru.” Sirimanua kele nene mateuan iukum sia Taikamanua.

Sangamberi sirimanua sijo le

⁹ Oto kipangan? Ai pa pusasaliura ka sabangsa bagei? Bulat ta anai! Aipoi atapakoinongan ka panandaatnia tai Jahudi ele bangsa bagei, sangamberida ai le sia ka kupkumen jo,

¹⁰ kele sitususurat ka Surat Sipunenan: “Ta anai simaroipo, beri sara;

¹¹ ta anai beri sara siagai paatuat, ta anai beri sara sigaba Taikamanua.

¹² Sangamberida atusoipman, sangamberida amusiboboian, ta anai sigalai simaeru, beri sara ta anai.

¹³ Pangoilokatda samba le ratei sipunganganga; lilada rapakei masipataju, ka tei biboda ai lagat ulou.

¹⁴ Ngungunda sun pateleiat samba tiboiet simapongit.

¹⁵ Manangka rereda masipiliake logau.

¹⁶ Karagatat samba pugejaat baga ragalak ka enunganda,

¹⁷ samba enungan paabanan ta raagai.

¹⁸ Loto ka Taikamanua ta anai ka sia.”

¹⁹ Tapoi ataagaian, sangamberi sinoboi ka Surukat, ka sia sikuddu ka kupkumen Surukat le ititiboi nia, bule ipetpetnake senen ngungu samba sangamberi taikapolak bailiu muutak ka Taikamanua.

²⁰ Kalulut ta anai beri sara sirimanua momi maroipo ka matat Taikamanua ka pasigagalaiake Surukat, aipoi Surukat ia te pasiagai jo le.

Kalulut tonem baga le ituparoroipo sirimanua

²¹ Tapoi kineneiget amatoilaan ta kalulut pasigagalaiake Surukat iparoipo sirimanua Taikamanua, aimunengakean leu ka buko Surukat samba suratda tai nabi,

²² ia te kalulut tonem baga ka Jesus Kristus le iparoroipo sirimanua Taikamanua sangamberi sirimanua simatonem baga. Ta poi anai pabaggeiatnia.

²³ Sangamberida poi amajongan samba taan anai ka tubuda pulatsanan Taikamanua.

²⁴ Oto ka kiliu bagat Taikamanuangan le ramaroroipo, panguruatnia kalulut panebuiat ka bagat Kristus Jesus.

²⁵ Kristus Jesus aikauan Taikamanua bailiu enungan paabanan kalulut tonem baga ka logaunia. Aigalai nene, masipatoila roiponia, kalulut ta aiaddeake sangamberi jo sipuaaili siburu ka teteret aiomake bagania.

²⁶ Nene masipatoila puroipoatnia ka tetere kineneiget, bule imatoila simaroipo le nia samba iparoipo sirimanua simatonem baga ka Jesus.

²⁷ Oto apangan le atsiakenenta? Taan anai. Kalulut apa? Kalulut pasigagalaiake Surukat? Taa. Sarat kalulut tonem baga le.

²⁸ Oto ukkaakenenta: Kalulut tonem baga le ituparoroipo sirimanua, ta kalulut pasigagalaiake Surukat.

²⁹ Ele sarat Taikamanuanda tai Jahudi le Taikamanua? Ta Taikamanuanda leu bangsa bagei? Bulatnia, Taikamanuanda leu sabangsa bagei.

³⁰ Sara le Taikamanua, nia le siparoipo tai Jahudi sipususunat kalulut tonem baga, nia leu masiparoroipo bangsa bagei taipususunat kalulut tonem baga.

³¹ Ke kisedda bai, tapakakataian le pa Surukat kalulut tonem baga? Bulat ta momoi! Bailoknia, ronakenenta le.