ROMA 2 - BUKO SIPUNENAN

Maroipo le ukum Taikamanua

¹ Kalulut nene taan momoi nubela, ale sirimanua sipasiuukum sabagei, kenanen kasei pa ekeu. Aipoi ka pasiuukumnu sabagei, tubum le anuukumake, kalulut ekeu sipasiuukum sabagei, masigagalaiake leu kele sigalaira.

² Tapoi taagai kam, ukuman Taikamanua ka tubuda sipasigagalaiake kele nene, maroipo le.

³ Oto ekeu, ale sirimanua, sipasiuukum sabagei sigalaiake kele nene, tapoi beri ekeu leu masigagalaiake, ka bagam pa bebela ekeu ka ukuman Taikamanua?

⁴ Ele nupuaarak le pa beunan anggai bagania, erut bagania samba om bagania? Ta nuagai, anggai bagat Taikamanua nene ia te masipalulu ekeu ka katubaugat paatuat?

⁵ Tapoi kalulut kelat paatuatnu samba taiobanu masibau paatuat, anururuakean te ka tubum golu, ka gogoi pasitoilakat golu samba ukuman Taikamanua simaroipo.

⁶ Aipoi isisiliake le Taikamanua ka senen sirimanua siripot sigalaira;

⁷ ia te purimanuaiat sitaitatata ka sia simaom baga masigalai simaeru, masigaba pulatsanan, pubeunanan samba sitaimasusuet.

⁸ Tapoi ka sia sigaba puuktungan tubu, sitaireddet pubulanan, tapoi situtnake sikatai, golu samba ukuman Taikamanua le rasisilo.

⁹ Paoreat samba gejat baga le oringenda senen sirimanua sigalai sikatai, boiki tai Jahudi, samba leu bangsa bagei.

¹⁰ Tapoi pulatsanan, pubeunanan samba aban le siloketda sangamberi sirimanua sigalai simaeru, boiki tai Jahudi, samba leu bangsa bagei.

¹¹ Aipoi ta irarasei sirimanua Taikamanua.

¹² Sia sigalai jo taipususurukat, malimai le sia ka taipususurukat; samba sia sigalai jo ka kupkumen Surukat, iukum sia Surukat.

¹³ Aipoi ta sipasiaarep Surukat simaroipo ka matat Taikamanua, sipasigagalaiake Surukat le iparoroipo.

¹⁴ Ke bangsa bagei sitaipususurukat masigalaiake ka teu bagada siniboi Surukat, kenanen ta anai ka sia Surukat, tubudangan te aibailiu Surukat ka sia.

¹⁵ Ka bagat nene poi rapakoinong katususuratnia bagat Surukat ka paatuatda, samba bagai bagada leu masimunengake, samba paatuatda kau masinganduake, kau masisakkeri.

¹⁶ Sangamberinia nene matotoila geti ka gogoi sialu, ka teteret iukumake Taikamanua simalipput ka paatuat sirimanua kalulut Jesus Kristus, siripot Katuareman Simaeru sinegeakenenku.

Tai Jahudi samba Surukat

¹⁷ Nuoniake tubum Jahudi samba mukaronan ka Surukat, samba masiatsiake Taikamanua;

¹⁸ samba nuagai siobania, samba kalulut pasigegelai ka bagat Surukat nuagai kipa bulat simaeru;

¹⁹ samba amaroan bagam sipalulu simapeset ekeu samba panoroi ka sikuddu ka gepgep,

²⁰ sipanganturu simagulai paatuat, sipasigegelaiake sibau tubu. Aipoi ka bagat Surukat amaroan bagam ibara kekeu sene ngamata puaagai samba pubulanan.

²¹ Oto ekeu sipanganturu sabagei, ta koi nupanganganturu tubum? Ekeu sipasingangantomanake, “Bui nupanangkou,” tapoi manangkou le ekeu kekeu?

²² Ekeu sipasikukua, “Bui nupaelet,” paeelet koi ekeu? Masitsit ekeu ka buluat, nuraraurau kodda lalep pasibuluat?

²³ Nuatsiake Surukat, lepa nupaloloi koi Taikamanua ka pasisasabau Surukat?

²⁴ Kele sitususurat ka Surat Sipunenan, “Kalulut kam, tupaloloi onin Taikamanua ka talagat bangsa bagei.”

²⁵ Sunat ai leu uktuknia ke nutut Surukat. Tapoi ke nupasabau geti Surukat, bailiu kele taipususunatnan le ekeu.

²⁶ Oto ke sia bangsa bagei sitaipususunat masireddet ngangan Surukat, ta pa atuaddekean makere kele sipususunat?

²⁷ Ke kise bai nia, sia sitaipususunat, tapoi ragalaiake siripot Surukat, siangan le masiuukum kam, kam sibara ukum sitususurat samba sipususunat, tapoi nupasabae kam Surukat.

²⁸ Aipoi oniakenen bulat Jahudi, ta Jahudi ka oni, samba oniakenen bulat sunat, ta sunat simatotoila ka akkula.

²⁹ Tapoi Jahudi sipulelelek ia te sipupaatuat Jahudi samba sunat sipulelelek ia te sunat paatuat sibaraakenen Ketsat Taikamanua, ta sibara ka aturan sinurat. Katuumunnia sibara ka Taikamanua le, ta sibara ka sirimanua.