ROMA 16 - BUKO SIPUNENAN

Salam

¹ Kusegeake ka kam maniuta si Febe, sipasirorom ka paamian Kengkrea,

² bule nusilo kam nia ka bagat Tuhant, kipa simateu ka sia sipunenan, samba romake kam nia ke itiddou apa pa paromanmui. Aipoi nia ka sia maigingan sirimanua airomake samba aku leu.

³ Segeake kam salamku kai Priska samba Akwila, alei pagalaiakenenku ka bagat Kristus Jesus.

⁴ Arabuluakean poi enganda punu tubuku. Ta sarat aku musura baga ka tubuda, tapoi samba sapaamian sibara ka bangsa bagei.

⁵ Salam leu ka paamian sikuddu ka lalepda. Salam kai Epenetus, saraina kilibet bagaku, bua siboiki ka Kristus ka ka Asia.

⁶ Salam kai Maria sipusasaggo tubu kalulut kam.

⁷ Salam kai Andronikus samba Junias, saaleiku sangamuntogat, samba aleiku tupenjaraake, simaeru katuareman le sia ka talagada tai apostel, samba sia le boiki amukristen kaku.

⁸ Salam kai Ampliatus kilibet bagaku ka bagat Tuhan.

⁹ Salam kai Urbanus, alei pagalaiakenenmai ka bagat Kristus, samba salam kai Stakhis, kilibet bagaku.

¹⁰ Salam kai Apeles, siomake pasisiboat ka bagat Kristus. Salam ka sia sikuddu ka lalep Aristobulus.

¹¹ Salam kai Herodian, aleiku sangamuntogat. Salam ka sia sangamberi sikuddu ka lalep Narkisus, ka bagat Tuhan.

¹² Salam kai Trifena samba Trifosa, simomoake tubu mugalai kai Tuhan. Salam kai Persis, kilibet bagaku, simomoake tubunia mugalai kai Tuhan.

¹³ Salam kai Rufus, sipili ka bagat Tuhan, samba salam ka inania samba inangku leu kaku.

¹⁴ Salam kai Asinkritus, Flegon, Hermes, Patrobas, Hermes samba sangamberi sasaraina sipaalei sia.

¹⁵ Salam kai Filologus samba Julia, Nereus samba maniuniu, samba Olimpas, samba leu ka sangamberi sipunenan sipaalei sia.

¹⁶ Pasalam kam pasasambamui ka bagat pasiggungan sipunenan. Salam ka kam sibara ka sangamberi paamian Kristus.

Repdemen

¹⁷ Tapoi kutiddou simakope ka kam sasaraina, bule nupasikeli kam tubumui ka tubuda sibaraake pasaraat samba kabelekat baga sipasasaggak ka nganturat sigelaimui. Kau nuareuake kam tubumui ka tubuda!

¹⁸ Aipoi sirimanua kele nene ta Kristus Tuhanta rapuuku, balugura le. Samba kalulut tiboietda simananam samba paalakat baga rapataju sirimanua simalina paatuat.

¹⁹ Aipoi amaarepman reddetmui ka sangamberi sirimanua. Ia te imaangka bagaku pagalaiat kam. Kubesiake le numasiku kam paatuat ka simaeru, tapoi malina ka sikatai.

²⁰ Bule Taikamanua bakkat paabanan maruei ikau si Setan nupaperaki kam nia. Kilau bagat Tuhanta Jesus masipaalei kam.

²¹ Salam ka kam sibara kai Timoteus, alei pagalaiakenenku, samba sibara kai Lukius, Jason samba Sosipater, saaleiku sangamuntogat.

²² Salam ka bagat Tuhanta ka kam sibara kaku Tertius, sipasisusuratnake surat nene.

²³ Salam ka kam sibara kai Gayus, sipasirarauma aku samba sapaamian ka lalepnia. Salam ka kam sibara kai Erastus, bendahara kota, samba sibara kai Kwartus, sarainanta. [

²⁴ Kiliu bagat Tuhanta Jesus Kristus, masipaalei kam sangamberimui! Amen.]

Umun ka Taikamanua

²⁵ Pulatsanan le ka Taikamanua, simagege masironake kam siripot Katuareman Simaeru singantomanakenenku samba katuareman pagalaiat Jesus Kristus, siripot pasitoilakat pakeleat simengmengakenen piga ngotu ngarura pa ujunia;

²⁶ tapoi kineneiget atupatoilaan samba siripot parentat Taikamanua sitaitatata, aisegeakean bukoda tai nabi ka sangamberi bangsa, masipalulu sia rareddet mutonem baga.

²⁷ Sarat ka tubunia le Taikamanua simasun sikut paatuat, kalulut Jesus Kristus; pulatsanan teret buruburu! Amen.