ROMA 15 - BUKO SIPUNENAN

Kau tapaatu sabagei, bui sarat tubuta

¹ Sita simaron tonem baga, kau tabairat kam pugulaiatda simagulai tonem baga, bui sarat tubuta tapasikeli.

² Senenta kau tapasanang kam saaleita katuerukatda masikau imaron tonem bagada.

³ Beri Kristus leu ta aigaba pusanangan tubunia, tapoi kele sitususurat, “Paloloiatda, siloloiakenenda ka tubum, aisappoam aku.”

⁴ Aipoi sangamberi sitususurat siburu, sibailiu nganturat ka sita le aitusurat, bule kalulut om baga samba pusuibiat sibara ka Surat Sipunenan bara ka sita pukakaronan.

⁵ Bule Taikamanua bakkat puoman baga samba pusubiat, masipanguruatnake ka kam pusaraat paatuatu pasasambamui, siripot obaket Kristus Jesus,

⁶ bule ka pusaraat paatuat samba sara nganga kam masilatsanake Taikamanua, Ukkui Tuhanta Jesus Kristus.

Katuareman Simaeru uktukda tai Jahudi samba leu bangsa bagei

⁷ Oto paletsai kam pasasambamui, kele Kristus leu aisiloan sita, katulatsanan Taikamnua.

⁸ Nene le kukua ka matamui, kalulut pubulanan Taikamanua, Kristus aibailiuan sipuku sipususunat masiriuriuake palelengan ka taikebbukatta,

⁹ samba ioi ka sabangsa bagei ralatsatnake Taikamanua kalulut katet bagania kele sitususurat ka Surat Sipunenan, “Ia te lulunia kuumunake ekeu ka talagada bangsa bagei, samba kuuraiake urai pasiumun masiumun onim.”

¹⁰ Samba ikua minca, “Pugora kam baga kam tai bangsa, sambamui bangsat Taikamanua.”

¹¹ Samba minca, “Umun kam si Tuhan, kam sangamberi bangsa, samba sangamberi muntogat bangsa masiumun nia.”

¹² Samba ikua minca si Jesaya, “Bebela te geti ungat Isai, tususuru nia masipaneinei tai bangsa, samba ka tubunangan le rapukakaronan tai bangsa.”

¹³ Bule Taikamanua bakkat pukakaronan, masisutnake ka paatuatmui angkat baga samba aban ka bagat tonem bagamui, bule kalulut ron Ketsat Sipunenan memei iuurau pukakaronanmui.

Lulunia aikoiniake suratnia si Paulus

¹⁴ Kam sasarainangku, maro bagaku asutnan simaeru ka kam, asutnan puaagaimui, samba momoian nupanganturu kam pasasambamui.

¹⁵ Kenanen kisedda, kalulut kiliu baga sipanguruatnakenen Taikamanua kaku, maeme pei le aku masisuratnake goiso ka kam, kele masiparepdep kam,

¹⁶ ia te babailiuna aku pagugulet Kristus Jesus ka sabangsa bagei, masipasikeli Katuareman Simaeru sibara ka Taikamanua, bule sia sabangsa bagei bailiu buluakenen siloket Taikamanua, silinaakenen Ketsat Sipunenan.

¹⁷ Oto ka bagat Kristus Jesus momoian kuumunake tubuku ka pagalaiat sigalaiku ka Taikamanua.

¹⁸ Aipoi ta maeme aku masitiboi apa pa bagei, sarat sigalai Kristus ka tubuku le, ia te papakeina aku masinana sabangsa bagei ka purereddet, ka tiboiet samba ka galajet,

¹⁹ sironakenen kerek samba kiseiet samba geget Ketsat Sipunenan. Kisedda te barania ka Jerusalem samba sangariringannia pat aili ka Ilirikum akupaarepman sangamuinenia Katuareman Simaeru pagalaiat Kristus.

²⁰ Ka bagat masipaarep Katuareman Simaeru akubesiakean masisegeake nia ka kudduat sitapei atupaarep onin Kristus, bui kurioake apa apa ka bongen sigalakngakenenda sabagei,

²¹ tapoi siripot sitususurat ka Surat Sipunenan le, “Sia, sitaipasisisilo pei le katuareman pagalaiat nia, raiitco nia; samba sia, sitaipasiaarep, raagai geti.”

Ngelei bagat Paulus mei ka Roma

²² Ia te lulunia isasaila aku moi masibalou kam.

²³ Tapoi kineneiget taan poi anai kudduat pugalajatku ka tobbou nene, samba piga ngarurangan pa akubesiake masibalou kam,

²⁴ kukaroni ka puenungananku mei ka Spanyol, momi kutusappai paaili ka kam, samba kam le masitaroake aku sedda, lepa kusegeake bagaku goiso masiitco kam.

²⁵ Kineneiget, ai le aku memei ka Jerusalem masitaroake panguruat ka sia sipunenan.

²⁶ Araeuakean poi paamian ka Makedonia samba Akhaya masikau paroman ka sia simageba ka talagada sipunenan ka Jerusalem.

²⁷ Sibara ka paatuatda le arateuake nia, tapoi utakda leu. Aipoi ke amueneuan sia sabangsa bagei ka bibilet puketsananda tai yahudia, mateu leu sia sabangsa bagei masirom tai Jahudi ka bibilet putubuatda.

²⁸ Alepaan geti kupasikeli nene, samba akusegeakean ka sia buat panguruatda sabangsa bagei, ei aku ka Spanyol baraku ka kam.

²⁹ Samba kuagai, ke moi aku masibalou kam, sun panukanan Kristus le ooiku.

³⁰ Tapoi kutiddou ka kam sasaraina, kalulut Tuhanta Jesus Kristus samba kalulut nuntut bagat Ketsat, nuromake kam aku ka bagat pasaggangan ka bagat masitiddouake aku Taikamanua,

³¹ bule kubela ka kabeira sitaimatonem baga ka Judea, samba pasikelatku ka Jerusalem rasilo sipulelelek sia sipunenan sedda,

³² bule ka angkat baga kuoi ka kam ka teu bagat Taikamanua, mugora baga sambata.

³³ Bule Taikamanua bakkat paabanan masipaalei kam sangamberimui! Amen.