ROMA 13 - BUKO SIPUNENAN

Purereddet ka sapamarenta

¹ Senen sirimanua buita marredet ka pamarenta siuteake nia, ta poi anai pamarenta sitaibabara ka Taikamanua; samba sapamarenta sibabara nene, Taikamanua le airioake sia.

² Oto kasei sisiddot pamarenta, sirioakenen Taikamanua le aisiddot samba sigalaiake nene, masisilo ukum ka tubunia.

³ Aipoi pamarenta ta kalotoakenenda sipasigagalaiake simaeru, sipasigagalaiake sikatai le masikakalotoake. Nuoba ta muloto ka tubut pamarenta? Galaiake simaeru, silonungan katuumunan sibara ka sia.

⁴ Aipoi pagugulet Taikamanua le pamarenta katuerukatnu. Nugalai geti sikatai, kalotoakenungan nia, ta poi siboboi rabebeila lanjau. Pagugulet Taikamanua le pamarenta sipasilulumunake golut Taikamanua ka tubuda sigalai sikatai.

⁵ Ia te tabebesiake mureddet, ta sarat kalulut golut Taikamanua, tapoi samba leu kalulut bagai bagata.

⁶ Ia te lulunia leu et nukakau kam juran. Aipoi sia sipasikeli nene pagugulet Taikamanua le sia.

⁷ Kau kam ka sangamberi sirimanua simateu kaunenmui: juran ka simateu masisilo juran, cukai ka simateu masisilo cukai; loto ka simateu masisilo loto samba paroroiat ka simateu masisilo paroroiat.

Nuntut baga ia te kasunan Surukat

⁸ Bui nupuutak kam apa pa ka tubut kasei pa, tapoi kau le nupanuntu kam baga pasasambamui. Kasei poi masipununtuki baga saalei, aigalaiakean bagat Surukat.

⁹ Aipoi sikuat Surukat: bui nupaelet, bui nupamatei, bui nupanangkou, bui imakiddi bagam, samba surukat apa pa bagei, atulopuruakean ka bagat tiboiet nene: Pununtuki baga aleinu sirimanua kele nuntut bagam ka tubum!

¹⁰ Nuntut baga ta igagalaiake sikatai ka saalei; oto nuntut baga ia te kasunan Surukat.

¹¹ Besiake kam masigalaiake nene, anuagaian poi kam tetere kineneiget, ia te aiailingan teterenia ka kam tusuru ka peperem. Aipoi kineneiget puaragat amalegerengAn ka sita bele pei le ka teteret atataddaake mutonem baga.

¹² Tusasabauan le soibo, amalegerengan tago. Kauan tagolok kam sangamberi galajet pugepgeman, tapakei kam pamatei pupatokat.

¹³ Kau tapuparaboat kam simasuru simateu ka tago; bui masosot pukokom samba pulolo, bui ka puoloman tubu samba pubotbonan, bui ka pagolukat samba sisit baga.

¹⁴ Tapoi pakei le kam Tuhan Jesus Kristus ka tubumui samba bui nututturi kam siobat tubumui masitutuake pubotbonannia.