ROMA 10 - BUKO SIPUNENAN

¹ Ale sasaraina, kiddiet bagaku samba panindogatku ka Taikamanua ia te bule rasese puaragat.

² Aipoi momoi kumunengake pagalaiat tubuda, bulat maron sia masisuru Taikamanua, tapoi ta ka bagat puaagai.

³ Kalulut taiagaira puroipoat Taikamanua samba sarat puroipoatda sarada le rakakaroake, taireddetrangan puroipoat Taikamanua.

⁴ Kristus le poi kalepakat Surukat, katuroipoatda senen simatonem baga.

Puroipoat kalulut tonem baga

⁵ Aipoi aisuratnakean si Mose pagalaiat puroipoat kalulut Surukat: “Sia sipasigagalaiake nia, muririmanua kalulunia.”

⁶ Tapoi puroipoat sipubobongan ka tonem baga masikua: “Bui nukua ka bagam: Kasei te tusasakai ka sorga?” tibonannia: masigorosotnake Kristus;

⁷ ele: “Kasei te tugogorosot ka taikabaga?”, tibonannia: masisakaiake Kristus ka talagat simamatei.

⁸ Tapoi kipa aikua? Kise le: “Malegere le tiboiet tubum, ai nia ka ngungum samba ka paatuatnu.” Ia te tiboiet tonem baga, sipaarepmai.

⁹ Aipoi ke numunengake ka ngungum, Jesus ia te Tuhan, samba nukatonemi kapaatuatnu susuruakena nia Taikamanua ka simamatei, maaraunungan.

¹⁰ Aipoi mutonem baga ka paatuat masikau ka puroipoat, samba masimuneng ka ngungu masikau ka puaragat.

¹¹ Aikuangan poi Surat Sipunenan: “Kasei sikatonemi nia, ta tupakakaila.”

¹² Ta ana poi pabaggeiatnia tai Jahudi ele bangsa bagei. Aipoi Taikamanua sisara nene, Tuhan ka sangamberi le, simaanggai ka sangamberi sipusosoga ka tubunia.

¹³ Aipoi senen sipasisosogai onin Tuhan, maarau nia.

¹⁴ Tapoi kipa iooi rasogai nia, ke ta rakatonemi nia? Kipa iooi rakatonemi nia, ke ta raarep pagalaiat nia? Kipa iooi raarep pagalaiat nia, ke ta anai sipaarep nia?

¹⁵ Samba kipa iooi rapaarep nia, ke ta tukoiniake sia? Kele sitususurat: “Pate lainge kaooira sipasiaambit Katuareman Simaeru!”

¹⁶ Tapoi ta sangamberi sirimanua masisilo Katuareman Simaeru nenda. Aikua poi si Jesaya, “Tuhan, kasei amasikatonemi pinaarepmai?”

¹⁷ Oto ka pasiaarep le ibabara tonem baga, tapoi pasiaarep kalulut ai sipaarep pagalaiat Kristus.

¹⁸ Tapoi kunounou: Bulatnia pa tapei araarep? Araarepman! Aipoi ka Surat Sipunenan atusurat: “Amaarepman ka sangalio polak nganganda, samba tiboetda asegean ka tutut polak.”

¹⁹ Tapoi kunounou minca: Tapei pa raagai tai Israel? Boiki aikua si Mose, “Kubailiuake kam mututu baga ka tubuda sirimanua sitaioonakenen bangsa, samba masingoingoiake bagamui ka tubuda bangsa sitaiagai paatuat.”

²⁰ Samba ka bagat eme le si Jesaya masikua, “Arasesengan aku sitaigaba aku. Akupatoilaan tubuku ka tubuda sitairere aku.”

²¹ Tapoi ka pagalaiat tai Israel aikua, “Sanganantat gogoi le kutotoiake kabeiku ka tubuda sitaimareddet samba simaron nganga.”