ROMA 1 - BUKO SIPUNENAN

Salam ka paamian

¹ Sibara kai Paulus, pagugulet Jesus Kristus, sinogai bailiu apostel samba sisaraakenen masipaarep Katuareman Simaeru sibara ka Taikamanua.

² Katuareman Simaeru ia te pinalelek Taikamanua siburu pei le ka tai nabinia ka Surat Sipunenan,

³ pagalaiat Togania, Tuhanta Jesus Kristus. Siripot pusirimanuaat mututu mata ka muntogat David,

⁴ samba siripot putaikamanuaat sipunenan Togat Taikamanua le nia sipulugege, simakokoinong ka katususurunia ka simamatei.

⁵ Kalulut nia leu akusilo kai kiliu baga samba puaapostel, masipalulu sangamberi bangsa mureddet ka oninia.

⁶ Kam leu ai kam ka bagat addeatda sinogai Jesus Kristus.

⁷ Kukoiniake surat nene ka kam sangamberimui sikuddu ka Roma, kilibet bagat Taikamanua, sinogai bailiu sipunenan: Kiliu baga ka kam samba aban sibara ka Taikamanua Ukkuita samba sibara kai Tuhan Jesus Kristus masipaalei kam.

Repdep bagat Paulus masibalou paamian Roma

⁸ Muboiki kukua sura ka Taikamanuangku kalulut Jesus Kristus kalulut kam sangamberimui, aipoi amaarepman ka sangalio polak pagalaiat tonem bagamui.

⁹ Aipoi Taikamanua le, sireddetku ka sangamuinet paatuatku ka bagat masipaarep Katuareman Simaeru pagalaiat Togania, ia te simunengake taipuaarinia kurepdep kam senen panindogatku;

¹⁰ kutiddou bule ka teu bagat Taikamanua bara kaku oggak ioi kubalou kam.

¹¹ Marepdepman bagaku masiitco kam, bule ioi kuake ka kam panguruat puketsanan masironake kam.

¹² Tibonannia, bule tapasuibi kam pasasambata ka bagat tonem bagata, tonem bagamui samba tonem bagaku.

¹³ Bule nuagai kam nia sasaraina, mareireian akukiddi moi masibalou kam – tapoi teret kineneiget sarat ai le sailania – bule kusilo leu bua ka talagamui, keleu ka talagat bangsa bagei.

¹⁴ Amuutakngan aku ka tai Grika samba ka bangsa bagei; ka simaagai paatuat samba ka sitaimaagai paatuat.

¹⁵ Ia te kubebesiake masingantomanake Katuareman Simaeru ka kam leu sikuddu ka Roma.

Ronnia Katuareman Simaeru

¹⁶ Bulat tonem le bagaku ka Katuareman Simaeru, nia le poi ron Taikamanua masiarauake senen simatonem baga, boiki tai Jahudi samba bangsa bagei leu.

¹⁷ Aipoi ka bagat Katuareman Simaeru matoila kipa iparoipo sirimanu Taikamanua, ia te sibara ka tonem baga riuriu mutonem baga, kele sitususurat, “Simaroipo baga muririmanua sia kalulut tonem baga.”

Golut Taikamanua kalulut jot sirimanua

¹⁸ Ipatotoila poi golunia Taikamanua sibara ka sorga ka sangamberi jo samba katai sirimanua, sipetpetnake pubulanan kalulut katai.

¹⁹ Aipoi apa siooi raagai pagalaiat Taikamanua, matoila le ka sia; Taikamanua poi amasipatoila nia ka sia.

²⁰ Barania ka pasibaraat polak, sitaimaiitco ka pagalaiat tubunia, ia te gegenia sitaitatata samba putataikamanuania, momoi tuitco ka paatuat ka sangamberi sibaraakenen. Oto ta momoi rapakele taiagairania.

²¹ Kenanen poi raagai Taikamanua, tapoi ta rasuru nia simateu ka Taikamanua, ele rasuraki nia. Bailoknia le, sarat si ta galai le rapaatu, samba paatuatda sitaiagai apa pa bailiu magepgep.

²² Ka bagada simasiku paatuatnan sia, oto si ta anai siagai.

²³ Pulatsanan Taikamanua sitaitatata, rasili ka tularat simakere ka sirimanua simatataket, ka uma, ka tarimeu siepat rere ele ka leiti sipugugurui.

²⁴ Ia te lulunia aisegeake sia Taikamanua ka siobat bagada ka pulolinan, pat palolitrangan tubuda pasasambada.

²⁵ Pubulanan Taikamanua rasili ka boko, sibaraakenen le rapanindogi samba rasuru silit Sipasibabara, bulat umunakenen teret buruburu. Amen

²⁶ Kalulut nene segeakenangan sia Taikamanua ka pubotbonan kailaakenen. Aipoi tainanalepda rasili le patabbarat tubu sipasesese ka sitaipasesese.

²⁷ Kisedda leu taimanteu, taan ka tainanalepda ratabbaraake tubuda siripot sipasesese, ka pasasambada taimanteuan le ipujujuluu pubotbonanda, bailiu galairangan pakailaat pasasambada taimanteu. Kalulut nene silorangan ukuman ka tubuda siripot joda.

²⁸ Kalulut ta rabesiake masiagai Taikamanua, segeakenangan sia Taikamanua ka pupaatuanan sikatai, bailiu ragalaiake sitaimateu tugalaiake.

²⁹ Sun le ka paatuatda sangamberi pukoilunan, pukakatai, alau baga samba katai baga; sun sisit baga, pamamatei, pajoggolat, patajuat, lagat baga. Raoba masitiboi

³⁰ samba masipaloloi sabagei, sipulagaki baga Taikamanua, taiagai arat, simabuak paatuat, simaoddoi, maagai ka sikatai, sipuarak eppu;

³¹ si ta paatuat, sipuarak palelengan, sitaiagai nuntut samba katet baga.

³² Kenanen raagai ukum Taikamanua, ia te senen sigalaiake sangamberi nene, mateu le tuukum matei, tapoi ia leu et ragalaiake, samba ioba leu et bagada ragalaiake nia sabagei.