Pugap. 8 - BUKO SIPUNENAN

^1a Si Saulus leu pasese ka bagania aramateiake Stefanus.

Ikukuru paamian si Saulus

^1b Ia leu ne gogoinia bara pangukurat simapali ka paamian ka Jerusalem. Pusaburangan sangamberida ka sangalio tobbou Judea samba Samaria, legeina le tai apostel.

² Alarangan tubut Stefanus sia simatopit, rateiakerangan nia samba rasoibi nia simakope.

³ Si Saulus geti riuriu le ipakatai paamian, ei nia ka senen lalep, giritnangan sia taimanteu samba tainanalep masikau sia ka penjara.

Katuareman Simaeru tusegeake ka Samaria

⁴ Oto sia sipusasabu, ei sia masigejengi sangalio laggai pagalu masipaarep Katuareman Simaeru.

⁵ Si Pilipus geti ka inan laggai Samaria le aiei, segeakenangan ka matada sedda pagalaiat Kristus.

⁶ Kele araarep ngantoman Pilipus samba araitco kiseiet sigalainia, kere bagada sangamberida masilelekngake siniboinia.

⁷ Aipoi maigi sia pinasaileu sanitu abelangan ketsat sikatai ka tubuda samba mugerei sabeu nganga; maigi sia simasakit samba simajegeu aialeake.

⁸ Maangkanangan bagada simakope ka laggai nenda.

⁹ Ka laggai nenda ai sara sirimanua sipuoni si Simon, maujungan aigalai kiseiet bagada tai Samaria kalulut tawania, samba ikau tubunia sirimanua ta anai siaili nia.

¹⁰ Sangamberi sirimanua taigoiso samba sabeu masitut nia, kuarangan, “Sirimanua nene te ron Taikamanua oniakenen Ron Sabeu.”

¹¹ Maujungan poi aipepeake sia kalulut tawania, ia te ratututnake nia.

¹² Tapoi kele arakatonemi ngantoman Pilipus pagalaiat Purimataat Taikamanua samba pagalaiat onin Jesus Kristus, bailiu turau sia, taimanteu samba tainanalep.

¹³ Samba si Simon leu mutonem baga. Lepa aiturau nia, tutnangan si Pilipus. Itco aiitco kiseiet samba kerek sabeu, tenan le kisei ka bagania.

¹⁴ Kele araarep nia tai apostel ka Jerusalem aalara tai Samaria tiboiet Taikamanua, koiniakerangan si Petrus samba si Johannes mei ka sia.

¹⁵ Sege sia sedda tai apostel panindourangan bule rasilo Ketsat Sipunenan tai Samaria.

¹⁶ Aipoi beri pei sara sia sinopsop Ketsat Sipunenan, sarat ka onin Jesus pei le aiturau sia.

¹⁷ Lepa tonemakerangan kabeira ka utera, sopsopnangan ka tubuda Ketsat Sipunenan.

¹⁸ Kele aiitco si Simon kalulut totonemakera kabeira tai apostel ka utera aisopsop ka tubuda Ketsat Sipunenan, totoiakenangan ka tubuda bulagat,

¹⁹ kuanangan, “Ake kam kaku kerek kele nene, bule kasei kurape, sopsopnangan sia Ketsat Sipunenan.”

²⁰ Kuanangan ka matania si Petrus, “Malolosengan te ekeu samba bulagatnu, ka bagam le te momoi nusaki nia bulagat panguruat Taikamanua.

²¹ Ta anai rubeiat ele eneunu ka bagat galajet nene, ta maroipo poi paatuatnu ka matat Taikamanua.

²² Oto bauake paatuatnu ka jom nene, samba panindou kai Tuhan bule iappeake jot paatuatnu nene.

²³ Aipoi kuitco paatuatnu kele lappegu simapongitnan le samba aiserengan ekeu pukakatai.”

²⁴ Aleginangan nia si Simon kuanangan, “Tiddouake kam aku kai Tuhan, bui ibara ka tubuku kele siniboimui.”

²⁵ Lepa aramunengake samba aratiboi tiboiet Tuhan, toili sia ka Jerusalem samba ka puenungananda rapakakara Katuareman Simaeru ka bagat maigi laggai ka Samaria.

Si Pilipus samba pegawai rimata ka Etiopia

²⁶ Lepa kuanangan malaikat Tuhan kai Pilipus, “Suruake ekeu, kenan ka isit kaiaman, ka enungan ka Jerusalem mei ka Gasa.” Enungan nenda matangeu.

²⁷ Suru si Pilipus einangan leu et. Ai sara tai Etiopia, pegawai rimata Kandake rimatada tai Etiopia, sipasikeli sangamberi bibiletnia. Pegawai nene amei nia ka Jerusalem manindou.

²⁸ Kineneiget ai nia totoili mukureta, aibabasa surat nabi Jesaya.

²⁹ Kuanangan Ketsat ka matat Pilipus, “Kenan tagetnake kureta nenda.”

³⁰ Pabalaunangan si Pilipus, arepnangan ibasa surat nabi Jesaya. Kuanangan si Pilipus, “Nuagai leu sibasam nene?”

³¹ Kuanangan, “Kipa iooi kuagai nia, ke ta anai sipangantoman aku?” Nananangan si Pilipus itujanang ka kureta mukuddu ka bebenia.

³² Ruang surat sibasania nene le: “Kele biribiri sitaroakenen ka pasijajakat le nia; kele togat biribiri sipumemengmeng ka matat sipananapu bulunia, kisedda te taibubukana ngangania.

³³ Rapaloloi samba ragalai sitaimaroipo ka tubunia. Kasei siagai masinunuake muntogatnia? Atualaan poi engania ka polak nene.”

³⁴ Kuanangan pegawai tai Etiopia kai Pilipus, “Kua pei, kasei ititiboi si nabi nene, pagalaiat tubunia ele sabagei le ititiboi?”

³⁵ Taddaakenangan si Pilipus masikolouake samba mubongen ka ruang nene isegeake ka matania Katuareman Simaeru pagalaiat Jesus.

³⁶ Riuriuakerangan puenungananda, ailirangan sara bagat oinan. Kuanangan si pegawai, “Aikoi oinan, apangan le isasailania turau aku?” [

³⁷ Kuanangan ka matania si Pilipus, “Ke matonem bagam sibara ka sangalio paatuatnu, momoi.” Aleginangan nia, “Matonem bagaku, Jesus Kristus ia te Togat Taikamanua.”]

³⁸ Ia geti kuanangan ipuari kureta; gorosot sia ruada si Pilipus samba si pegawai, raunangan nia si Pilipus.

³⁹ Kele aratusakai ka oinan, paambitnangan si Pilipus Ketsat Tuhan, taitconangan nia si pegawai tai Etiopia. Riuriuakenangan puenunganannia ka angkat baga.

⁴⁰ Si Pilipus geti againa le aian nia ka Asdod. Gejenginangan sangalio laggai nenda masipaarep Katuareman Simaeru, pat aili ka Kaisarea.