Pugap. 4 - BUKO SIPUNENAN

Petrus samba Johannes ka matat Rapat Sabeu

¹ Ai pei le maninibo si Petrus samba si Johannes ka simigi, tagetnakerangan sia tai imam samba utet sipasijajago Uman Taikamanua samba tai Saduse.

² Magolu poi bagada rapangantoman sirimanua simigi samba rapaarep ka onin Jesus ai katusuruat tubu simamatei.

³ Labarangan sia kaurangan sia ka penjara pangenan imapato, amasoiboan poi sulu.

⁴ Tapoi ka talagada sipasiaarep ngantoman maigi sia simatonem baga, bailiu ituppai igida iaili lima ribu taimanteu.

⁵ Kele aimapato sangamberi sautera tai Israel, samba tai baja samba siagaisurat paruru ka Jerusalem

⁶ samba Imam Sabeu Hannas, si Kayafas, si Johannes samba si Aleksander samba piga pa sabagei ka muntogat Imam Sabeu.

⁷ Lepa rioakerangan si Petrus samba si Johannes ka matat rapat, nounourangan sia, “Ka geget kasei ele ka onin kasei anugalai kam nene?”

⁸ Ia geti sun Ketsat Sipunenan ka tubut Petrus kuanangan ka matada, “Kam sautet bangsa samba tai baja,

⁹ ke tupakaroake kai kineneiget kalulut gagalaimai simaeru ka sirimanua sisakit ka geget kasei aimale,

¹⁰ oto kau nuagai kam nia sangamberimui samba sangamberi bangsa Israel, ia te ka onin Jesus Kristus tai Natsaret siniliktengaakenenmui, tapoi sisuruakenen Taikamanua ka simamatei, ka oninia te aipurio sinene aimaron tubu ka matamui.

¹¹ Jesus nene te kuanennia ka Surat Sipunenan, ‘Bukku sipasibbumui tai tukang, aibailiuan nia bukkut inan arigi.’

¹² Oto ta anai kasei pa sabagei kabaraiat puaragat, ta anai poi oni bagei aikau Taikamanua ka sirimanua ka tei manua nene siooi masiarauake sita.”

¹³ Tenan le kisei ka bagada sipurarapat raitco emenia si Petrus samba si Johannes, araagaian bagei sirimanua sitaipusisikola samba sitaiagai surat le sia; samba raagai alei Jesus le sia siburu.

¹⁴ Tapoi ta anai momoi rakua apa pa aipoi araitcoan sirimanua sialeakenen nenda murio ka bebera tai apostel.

¹⁵ Kele arabelaake sia ka purapanan, patiborangan pasasambada,

¹⁶ kuarangan, “Kipa tagagalai ka tubuda sirimanua nene? Aipoi kerek kiseiakenen le sigalaira, amatoilaan ka sangamberi sipulaggai ka Jerusalem, taan iagai tapakele nia.

¹⁷ Tapoi bui imararat nene ka sirimanua simigi tapaneinei le sia buian rapanibo minca ka sirimanua kasei pa ka oni nene.”

¹⁸ Lepa sogairangan sia paneineirangan sia, buian rapanibo ele rapungantoman ka onin Jesus.

¹⁹ Kuana le si Petrus samba si Johannes masialegi sia, “Kam le ipaatu nia, ele mateu pa ka matat Taikamanua, kureddet kai kam bele pei Taikamanua?

²⁰ Ta momoi poi ta kutiboi kai siitcomai samba siarepmai.”

²¹ Paneineirangan sia simakope, belaakerangan sia ratuitui, ta anai poi arasese paluluatnia ituukumake sia, kalulut sirimanua simigi sangamberida masiumun Taikamanua kalulut sibabara nene.

²² Aipoi sirimanua sialeakenen kerek nenda, epat pulu ngarurangan legei beunannia.

Panindogat paamian

²³ Kele arabelaake sia, ei sia ka saaleira, nunuakerangan sangamberi sikuada tai imam sabeu samba tai baja ka matada.

²⁴ Arep araarep nene saaleira, pakerenangan bagada manindou ka Taikamanua kuarangan, “Tuhan, ekeu le sibaraake manua, polak, koat samba sangamberi sibabara ka bagania.

²⁵ Samba ka bagat Ketsat Sipunenan ka ngangan taikebbukatmai paguguletnu si David anutiboi, ‘Mugagaugau kodda sia sipuarat sabulungan, rapaatu kodda sia tai bangsa si ta galai?

²⁶ Tai rimata ka polak amutarekngan sia, samba saute amaruruan sia masisaggangi si Tuhan samba Rimata Sinulajinia.’

²⁷ Bulatnia aparuruan ka laggai nene si Herodes samba si Pontius Pilatus samba sipuarat sabulungan samba bangsa Israel masisaggangi Jesus, Paguguletnu Sipunenan, sinulajim,

²⁸ bule ragalai sangamberinia ipuaili sineuakenennu ka panandaatnia pei le kalulut gegem samba teu bagam.

²⁹ Oto kineneiget Tuhan, itco palotokatda samba ake ka sapaguguletnu eme masipaarep tiboietnu.

³⁰ Totoiake kabeinu masialeake sirimanua; samba baraake patuaggaiat samba kerek ka onin Jesus, Paguguletnu Sipunenan.”

³¹ Kele ailepa rapanindou, pueggeunangan kudduat parururukatda, sopsopnagan sia Ketsat Sipunenan sangamberida, maemerangan masitiboi tiboiet Taikamanua.

Pusaraat paatuatda paamian siboiki

³² Sangamberida siputotonem baga, sikere baga samba sisara paatuat le sia. Ta anai beri sara siaddeake bibilet sibabara ka tubunia bakkatnia sarania, tapoi sangamberi bibilet sangamberida le sibakkatnia.

³³ Magegerangan simakope tai apostel masimunengake pagalaiat katusuruat Tuhan Jesus, makiliunangan bagat Taikamanua ka tubuda sangamberida.

³⁴ Ta anai ka talagada simagulai apa pa; aipoi piga pa sia sibara mone ele lalep, sakiakerangan nia, bulagat sakinia raambit

³⁵ kaurangan nia ka tai apostel, lepa rubeirangan nia ka senen simagulai.

³⁶ Kise te kai Josep, sara tai Lepi sibara ka Siprus, oniakenenda tai apostel si Barnabas (tibonannia: Pusuibiat baga).

³⁷ Sakiakenangan monenia, ambitnangan bulagatnia, kaunangan nia ka tai apostel.