Pugap. 28 - BUKO SIPUNENAN

Si Paulus ka Malta

¹ Kele akutusakai kai agaimaian onin nusa nene Malta.

² Bulat ta magulai topitda ka tubumai sipulaggai ka nusa nene. Rusuirangan api, sogairangan kai sangamberimai sedda kalulut abelean urat samba kalulut leppet rusa.

³ Airururuake ngaimang si Paulus ikau nia ka api, bela sangamuneng ulou sipepekdak kalulut oloi api, pilanangan kabeinia.

⁴ Kele araitco nia sipulaggai sedda iputoak ulou ka kabei Paulus, kuarangan pasasambada, “Bulat sipasimamatei le bai sirimanua nene, aipoi kenanen ta amatei nia ka koat, ta ioobaake nia lumun ipurimanua.”

⁵ Ia geti sosoakenangan ulou ka api si Paulus, ta anai apa pa aiorik.

⁶ Ngenaakerangan baleu mugoo kabeinia ele tulut bele nia matei. Tapoi kele aimauju arangenaake nia, itcorangan ta anai apa pa sibabara ka tubunia, oleinangan paatuatda, kuarangan taikamanua le nia.

⁷ Ka legeret kudduat nene, ai monen gubernur nusa nene. Onin gubernur nenda si Publius. Raumanangan kai telu ngagogoi ka erut bagania.

⁸ Ka teteret nenda ukkui Publius ai nia memerep, kalulut ai roketnia samba besit bagania. Ei si Paulus ka baga masiitco nia, panindounangan, rapeakenangan kabeinia ka tubunia, male aimale.

⁹ Pasat sibabara nene, oirangan leu sabagei simabesi ka nusa nene, aleakenangan sia si Paulus.

¹⁰ Maigi araake ka kai panguruat, ia geti katuituiatmai akerangan balutmai ka puenunganan.

Barania ka Malta ka Roma

¹¹ Pasat telu ngalaggo tui kai mulajo ka sara kapal sibara ka Aleksandria sipusasao ka nusa nene masingena itusabau laggo simaleppet. Toggaiat kapal nene Dioskuri.

¹² Sege kai ka Sirakusa pukuddumaian sedda telu ngagogoi.

¹³ Baramai sedda puririkmaian sege ka Regium. Pasat sangagogoi akenangan rusa kaiaman, gogoi sikaruania sege kai ka Putioli.

¹⁴ Sedda paailimaian piga pa sapaamian, nanarangan kai kukuddu kai ka sia pitu ngagogoi. Lepa ei kai ka Roma.

¹⁵ Sia saalei sedda areprangan kababaramai, oi sia masiailiake kai pat aili ka Forum Appius samba Tres Taberne. Kele aiitco sia si Paulus kuanangan sura ka Taikamanua, maronnangan paatuatnia.

Ka Roma

¹⁶ Kele akusege kai ka Roma, araobaake le si Paulus ikuddu sarania ka sia, samba sara saladdu sijago nia.

¹⁷ Pasat telu ngagogoi sogainangan si Paulus sangamberi siabeura tai Jahudi. Kele araparuru kuanangan ka matada, “Ale sasaraina, kenanen ta anai akugalai jo ka bangsata, ele ka aratda taikebbukatta, tapoi arapalenggui le aku ka Jerusalem samba rasegeake aku ka kabeira tai Roma.

¹⁸ Kele aralelekngake pagalaiat tubuku, obarangan rabelaake aku, kalulut ta anai apa pa jo ka tubuku simateu tumateiake.

¹⁹ Tapoi kalulut rakaroake tai Jahudi, loulogikungan pasiukuman Kaisar, tapoi ta leu masinganduake bangsaku.

²⁰ Oto ia te lulunia akusogai kam, bule kuitco samba kupatiboake kam, aipoi kalulut karonietda tai Israel le aitukabe aku palenggui nene.”

²¹ Kuarangan ka matania, “Ta anai akusilo kai surat sibara ka Judea pagalaiat tubum, beri sara saalei amoi se masisegeake ele masitiboi sikatai pagalaiat tubum.

²² Tapoi koba kuarep kai sibara kekeu kipa paatuatnu; akuagaian poi kai pagalaiat arat nene, kaipa kaipa sarat rapajoggoloake.”

²³ Kele aratetereake sara gogoi, oirangan simigi ka kudduatnia. Barania simancep pat aili soibo ikolouake samba imunengake ka matada pagalaiat Purimataat Taikamanua; tiboinangan leu siripot buko Surukat Mose samba suratda tai nabi ibesiake imatonem bagada pagalaiat Jesus.

²⁴ Ai sia sikatonemi siniboi Paulus, sabagei geti ta rakatonemi.

²⁵ Ka bagat ta anai pusaraat paatuat pasasambada pusaburangan, lepat aitiboi si Paulus sara tiboiet nene: “Bulat sineseat sikuat Ketsat Sipunenan ka ngangan nabi Jesaya ka matada taikebbukatta, sikuania kise:

²⁶ ‘Kenan nusegeake ka bangsa nene: Aiaarep piumui, tapoi ta nuagai kam kolou; aiiitco matamui, tapoi ta isasaksak ka bagamui.

²⁷ Amakelaan poi paatuat bangsa nene, aitakkepingan talinganda, atuunengan matada, bui iitco nia matada, bui iarep nia talinganda, bui iagai kolounia paatuatda, bui rabauake paatuatda, bui kualeake sia.’

²⁸ Oto kau nuagai kam nia, puaragat sibara ka Taikamanua atusegeakean ka sabangsa bagei; samba ta isosoppi raarepi nia.” [

²⁹ Lepa aikua nene si Paulus, tui sia tai Jahudi ka bagat pajoggolat pasasambada.]

³⁰ Rua ngarura burunia aikuddu si Paulus ka Roma ka lalep sisewania, silonangan sangamberi siooi masitaget nia.

³¹ Segeakenangan pagalaiat Purimataat Taikamanua samba ingantomanake pagalaiat Tuhan Jesus Kristus ka bagat eme, ta anai sinaila nia.