Pugap. 27 - BUKO SIPUNENAN

Pulajoat Paulus ka Roma

¹ Kele arateuake kuei kai ka Italia, segeakerangan si Paulus samba sabagei sipenjaraakenen kai Julius, kapiten saladdu sipuoni “Pasukan Kaisar”.

² Kele akutujanang kai ka kapal ka Adramitium sioba muririk ka tobbou Asia, pulajomaian. Ai leu si Aristarkhus tai Makedonia sibara ka Tesalonika masipaalei kai.

³ Pato jolou kai ka Sidon. Manuntu bagania si Julius kai Paulus, samba iobaake iei masibalou saaleinia, bule rapuuku nia.

⁴ Baramai sedda pulajomaian muririk ka Siprus, kalulut sasaket le rusa.

⁵ Kele akutalipoki kai koat ipot Kilikia samba Pampilia, sege kai ka Mira ka tobbou Likia.

⁶ Sedda sesenangan kapiten saladdu sara kapal sibara ka Aleksandria sioba mulajo ka Italia, kaunangan kai ka kapal nenda.

⁷ Piga ngagogoi pa simoilemoile le akupulajo kai, siagai ka baga le sege kai ka Knidus. Ta poi iobaake kai rusa, puririkmaian ka Kreta ipot tunang Salmone.

⁸ Siagai ka baga akuriringi kai tunang nenda, sege kai ka sara kudduat sipuoni Pusaoat Simaeru, ka legeret laggai Lasea.

⁹ Kalulut amaigingan tetere amalimai samba amakataian puabangan, apasatnan poi puaso bagei, pangantomannangan sia si Paulus, kuanangan,

¹⁰ “Ale sasaraina, kuitco nia puabanganta nene makokope le besi samba babara le rugi sabeu, ta sarat abangen samba kapal, tapoi beri enganta leu.”

¹¹ Tapoi si kapiten saladdu kai jurumuri samba ka sibakkat kapal pei le makatonem bagania bele pei ka tiboiet Paulus.

¹² Kalulut pusaoat nene ta maeru tukuddu teret pasat laggo simaleppet, oto maigi sia sioba turiuriuake mulajo, baleu moi tuailiake Feniks bule tukuddu sedda ujut laggo simaleppet. Feniks ia te pusaoat ka nusa Kreta, simattai isit sikaolak samba usutbuggei.

Rusa sabeu ka koat

¹³ Kele aiboroiake rusat kaiaman simamoile, ka bagadangan le momoian iei ka kiddiet bagada, tiktikrangan sao, mulajo muririk ka nusa Kreta.

¹⁴ Tapoi ta amauju buraakenangan talabari, oniakenen “Sikalaut Bare” sibara ka nusa nenda.

¹⁵ Boroinangan leu kapal, taan momoi isasa rusa, obaakemaian maraggai.

¹⁶ Maraggaimaian pat aili ka teitei sara nusa sigoiso sipuoni Klauda; sedda bulat mabesi akupasikeli kai sikoci kapal.

¹⁷ Lepa arasakaiake sikoci ka kapal, paappararangan tali ka tubut kapal masiparon. Lotora bui itusaggat ka paddarai Sirtis, beleakerangan lajo, tenan le obaake kapal imaraggai.

¹⁸ Kopet besit ka tubumai iboroi kai talabari, pato aimapato, paribbairangan abangen ka koat.

¹⁹ Ka gogoi sikatelunia kabeirangan le tatogat kapal amasiparibbai galajet kapal ka koat.

²⁰ Kele ta aimakoinong sulu samba panyanyat piga ngagogoi pa samba rusa pei itibbala kai, taan akukaroni kai murimanua.

²¹ Kalulut amaujungan ta arapukom, purionangan si Paulus ka talagada kuanangan, “Ale sasaraina, nureddet bai kam ngangangku bui tatuitui ka Kreta, ta taoorik gejat baga samba rugi nene!

²² Tapoi kutiddou ka kam, bui imakarat bagamui; beri sara ka kam malilimai enga, sarat kapal nene le malilimai.

²³ Aipoi soibo amurio ka bebeku sara malaikat Taikamanua sibakkat aku samba panindogietku

²⁴ masikua, ‘Ba maloloto Paulus! Ta moi ta nupurio ka matat Kaisar; samba kalulut kiliu bagat Taikamanua ka tubum, sangamberi saaleinu ka kapal nene muririmanua le sia kalulut ekeu.’

²⁵ Oto sasaraina, bui imakarat bagamui! Aipoi matonem bagaku ka Taikamanua, sangamberi siniboinia ka mataku muaaili.

²⁶ Tapoi ta isosoppi tatusaggat ka sara nusa.”

²⁷ Kele aiaili soibo sikapuluepatnia akumaraggai kai ka koat Adria, tengamoi ka bagada le te tatogat kapal amalegerengan ka kapi.

²⁸ Lepa belerangan jujuujuu, agairangan rua pulu ngarepa kerunia; ritsi goiso, juujuurangan minca, agairangan pulu lima ngarepa kerunia.

²⁹ Karat bagada baleu tusaggat kapal ka uddut bukku, belerangan epat sao ka murit kapal, tiddourangan imaruei imapato.

³⁰ Ia geti besiakerangan mutuitui tatogat kapal. Beleakerangan sikoci ka koat, pakaurangan tubuda kele masibele sao ka utet kapal.

³¹ Kuanangan si Paulus ka matat kapiten saladdu samba ka tai saladdu, “Ke ta mukuddu sia ka kapal, ta muririmanua kam.”

³² Lepa saggirirangan seseret sikoci tai saladdu, bele ka koat raggai.

³³ Ka legeret pato, nananangan si Paulus sangamberida rapukom, kuanangan, “Teret kineneiget aiailingan pulu epat ngagogoi sarat masingena le kam, nuomake kam laje ta nukom kam apa pa.

³⁴ Kalulut nene kunana kam, bule nupukom kam boiki, kan nene poi ituppai ron tubumui. Aipoi beri sangantaili alai ka utemui ta bebele.”

³⁵ Lepa aikua nene, alanangan roti, kuanangan sura ka Taikamanua ka matada sangamberida, paabbonangan nia, taddaakenangan mukom.

³⁶ Maaraunangan bagada sangamberida pukomrangan leu.

³⁷ Igimai sangamberimai ka kapal rua ngotu pitu pulu enem kai.

³⁸ Kele aramaektek mukom, paribbairangan bera ka koat imatekbuk kapal.

Kapal tusaggat

³⁹ Kele aimapato, ta araagai laggai nene. Itcorangan guggung sibara buggei, ke momoi bai sedda rateuake rajolouake kapal.

⁴⁰ Saggirirangan talit sao, bele ka koat, rugutrangan talit pumuriat, karaiakerangan lajo ka ute ilajoake nia rusa ka kapi.

⁴¹ Tapoi amaraggai le ka paddarai, tusaggatnangan utet kapal, taan aturitsi nia sedda, murinia ragat aibetu nia onu sabeu.

⁴² Isiakerangan leu tai saladdu masimateiake sangamberi sipenjaraakenen bui rapulalak ratuitui.

⁴³ Tapoi aikera le kapiten saladdu isiatda, kalulut ioba le ipurimanua si Paulus. Kuanangan ka siagai mulalak raputeipu raei muboiki ka kapi;

⁴⁴ sabagei masitut, ai siala lappiri, ai siala karagatat kapal purangoira. Kisedda te galainia sangamberimai sege ka kapi murimanua.