Pugap. 25 - BUKO SIPUNENAN

Si Paulus ka matat Festus Iloulogi pasiukuman Kaisar

¹ Telu ngagogoi burunia aisege si Festus ka laggai nene, ei nia ka Jerusalem barania ka Kaisarea.

² Eirangan leu sedda tai imam sabeu samba sautera tai Jahudi masisegeake panganduatda ka matania pagalaiat si Paulus.

³ Pusumirangan si Festus ratiddou bule ka erut bagania ikoiniake si Paulus ka Jerusalem; apakerean poi bagada ramateiake nia ka enungan.

⁴ Aleginangan nia si Festus, “Ai le rajajago si Paulus ka Kaisarea, taan leu mauuju kuei sedda.

⁵ Oto kau raoi siabeu ka kam kuei kai sambamai ranganduake nia sedda, ke bulatnia ai selenia.”

⁶ Pasat balu ele pulu ngagogoi aikuddu ka Jerusalem si Festus, toili nia ka Kaisarea. Pato baraakenangan rapat pasiukuman, kuanangan leu raambit si Paulus ka matania.

⁷ Kele aioi si Paulus, sangamberida tai Jahudi sibara ka Jerusalem rio rabokko nia, kaurangan maigi panganduat simasane ka tubunia; tapoi ta amoi rajoake nia.

⁸ Tapoi isakkala le si Paulus kuanangan, “Ta anai apa pa jo akugalai ka Surukatda tai Jahudi, ele ka Uman Taikamanua, ele kai Kaisar.”

⁹ Kuanangan si Festus kai Paulus pasialat bagada tai Jahudi, “Noba leu mei ka Jerusalem, bule sedda kulelekngake pakarom?”

¹⁰ Kuana le si Paulus, “Aian aku muririo ka pasiukuman Kaisar; buita se le tulelekngake pakaroku. Kele siagainungan leu ta anai joku ka tai Jahudi.

¹¹ Ke ai bai akugalai apa pa jo simateu tumateiake, ta kukekera tubuku matei. Tapoi ke ta sibulatnia panganduatda pagalaiat tubuku, ta anai siooi masisegeake aku ka sia. Pasiukuman Kaisar le kuloulogi!”

¹² Lepa arapatibo sambada saaleinia sipurarapat, kuanangan si Festus, “Kaisar poi anuloulogi, oto buita nuei kai Kaisar.”

Si Paulus ka matat Agrippa samba Bernike

¹³ Pasat piga ngagogoi pa, oi rimata Agrippa samba si Bernike ka Kaisarea masiroroi si Festus.

¹⁴ Kele arakuddu sedda piga ngagogoi pa, tiboinangan si Festus ka matat rimata pagalaiat si Paulus, kuanangan, “Ai se sara sirimanua sipenjaraakenen sigalak Feliks.

¹⁵ Ka teteret ai aku ka Jerusalem, nganduakerangan nia ka mataku tai imam sabeu samba tai bajara tai Jahudi ratiddou bule kuukum nia.

¹⁶ Kuakungan masialegi sia, ta amuarat ka kai tai Roma, obat baga le masimateiake sirimanua, enan tapei patuggut mata sia singanduakenen samba sipasingangandu samba tukau oggak ialegi panganduat.

¹⁷ Oto kele araparuru se, ta akupauju, patona le baraakekungan rapat pasiukuman, kuakungan rasogai nia.

¹⁸ Tapoi kele arapurio sipangangandu, ta anai apa pa arasusuake jonia kele sikuat paatuatku.

¹⁹ Sarat pagalaiat aratda le rapaukele ka tubunia, samba pagalaiat sara sirimanua simamatei sipuoni Jesus, tapoi si Paulus masikua murimanua le nia.

²⁰ Kalulut kepput ka bagaku masipagaba paukelat nene, nounoukungan nia baleu ioba mei ka Jerusalem, bule sedda tulelekngake pakaronia.

²¹ Tapoi ailoulogi le si Paulus pasiukuman Kaisar. Tidounangan ikuddu se pangenan itakkiake pakaronia si Kaisar. Kalulut nene kuakungan rajago nia, teret kukoiniake nia kai Kaisar.”

²² Kuanangan si Agrippa ka matat Festus, “Koba leu kaku kuarep sirimanua nenda.” Kuanangan si Festus, “Mancep geti nuarep nia.”

²³ Mancep oi aioi si Agrippa ruada si Bernike sibara pulaingeat simalatsat, tugururangan ka purapanan samba sautera tai saladdu samba sangamberi siabeu tiboi tubu ka laggai nene. Lepa kuanangan si Festus raambit si Paulus.

²⁴ Kuanangan si Festus, “Rimata Agrippa samba kam sangamberi siparururu se! Se nuitco kam sirimanua singanduakenenda sangamberi tai Jahudi sikuddu ka Jerusalem samba sikuddu se. Ragereiake masikua taan mateu ipurimanua.

²⁵ Tapoi ta anai akusese jo sigalainia simateu tuukum nia ukuman matei; samba ailoulogi poi pasiukuman Kaisar, oto teuakekungan tukoiniake nia kai Kaisar.

²⁶ Tapoi ta anai simakolou suratnakenenku kai Kaisar pagalaiat tubunia. Ia te akuambit nia ka matamui, sara pei ka matam rimata Agrippa, bule lepa itulelekngake ibara suratnakenenku.

²⁷ Aipoi kupaatu ta pasese tukoiniake sara sipenjaraakenen ke ta tutiboi simakolou panganduat ka tubunia.”