Pugap. 24 - BUKO SIPUNENAN

Si Paulus ka matat Feliks

¹ Pasat lima ngagogoi ei Imam Sabeu Ananias sambada tai bajara tai Jahudi samba siagai mutitiboat sipuoni si Tertullus kai gubernur masisegeake panganduatda pagalaiat si Paulus.

² Kele arasogai si Paulus ka mata, taddaakenangan si Tertullus masinganduake si Paulus kuanangan: “Gubernur Feliks siabeu! Kalulut erut paneineiatnu bulat amariuriuan aban ka kai, samba kalulut topitnu amaigingan katuerukat abara ka bangsamai.

³ Sangamberinia nene, kaipa kaipa ka bagat pusurakat le kusilo kai nia.

⁴ Tapoi buian imauju imalimai teterem, kutiddou bule nuarepmake panganduatmai goiso nene ka bagat om bagam.

⁵ Aipoi akusese kai sirimanua nene sibaraake oringen samba sibaraake pugaugapat ka sangamberi tai Jahudi ka sangalio polak, samba utet aratda tai Natsaret le nia.

⁶ Isibo pei bagei masipalolit Uman Taikamanua, ia te akulaba kai nia, kei kuukum kai nia siripot aratmai.

⁷ Tapoi amoi le utet saladdu Lisias masiala nia ka kabeimai ka bagat gege,

⁸ samba iguguluake sipasinganganduake nia raoi ka matam. Anurerean geti nia, againungan sangamberi panganduatmai ka tubunia.”

⁹ Sangamberi tai Jahudi leu masironake panganduat nene samba rakua bulat sibulatnia.

Isakkala si Paulus panganduatda tai Jahudi

¹⁰ Kele aiteuake si gubernur ipanibo si Paulus, panibonangan kuanangan, “Akuagaian, amaigingan rura aibailiu ekeu sipasiukum ka bangsa nene. Ia te imaeeme bagaku kualegi pakaroku nene ka matam.

¹¹ Aipoi momoi leu nulelekngake nia, tapei aisaliu pulu rua ngagogoi silelepa, amei aku ka Jerusalem manindou.

¹² Ta anai araaili aku pajoggolo ka kasei pa, ele masibaraake pugaugapat ka Uman Taikamanua ele ka uma parurukat ele kaipa pa ka bagat laggai.

¹³ Ia leu et ta momoi ramunengake nia kineneiget panganduatda pagalaiat tubuku.

¹⁴ Tapoi kumunengake le nene ka matam, masipanindogi Taikamanuanda taikebbukatmai le aku, siripot arat Tuhan, kuanenda arat simasele. Kukatonemi le sangamberi sinuratnakenen ka Surukat samba ka suratda tai nabi.

¹⁵ Keleu sia leu, kukaroni le Taikamanua, kababarat katusuruatda simamatei, ele simaroipo ele sijo.

¹⁶ Ia te kuuubui tubuku murimanua simalina paatuat ka matat Taikamanua samba ka matat sangamberi sirimanua.

¹⁷ Pasat piga ngarura pa oi aku minca ka Jerusalem masiambit bulagat panguruat ka bangsaku samba buluakenen.

¹⁸ Ka bagat aikugagalai nene, ailirangan aku ka Uman Taikamanua, lepat akupusuru. Ta anai sirimanua simigi, samba ta anai pugaugapat.

¹⁹ Sarat piga le pa tai Jahudi sibara ka Asia ai sedda; sia le siripokatnia momoi se ka matam masingandu, ke ai bai panganduatda pagalaiat tubuku.

²⁰ Ele sia tubuda tainene itiboi nia apa joku arasese ka teteret akupurio ka matat Rapat Sabeu.

²¹ Ele kalulut sara tiboiet pa sigereiakenenku akupurio ka matada ia te: Kalulut katusuruat simamatei nuukum kam aku gogoi nene.”

²² Kele aiarep nene si Feliks, maigingan poi aiagai arat Tuhan, ariakenangan boiki rapatda kuanangan, “Amoian geti si Lisias utet saladdu sene, ai leu kutakkiake pakaromui nene.”

²³ Lepa kuanangan kai kapiten saladdu ijago si Paulus, tapoi bui mabesi ka tubunia, samba ta momoi tukera saaleinia raoi masipuuku ele masibalou nia.

Si Paulus ka matat Feliks samba Drusilla

²⁴ Pasat piga ngagogoi pa oi si Feliks ruada sinanalepnia sipuoni si Drusilla tai Jahudi; kuanangan rasogai si Paulus, arepmakenangan pagalaiat tonem baga ka Kristus Jesus sibara kai Paulus.

²⁵ Kele aitiboi si Paulus pagalaiat puroipoat, surut tubu samba pagalaiat ukuman ka gogoi sialu, malotonangan si Feliks, kuanangan, “Kenanan boiki kineneiget, kaipangan geti ibara oggak, ai leu kusogai ekeu minca.”

²⁶ Ka bagat nene, ai le ikikiddi ikau bulagat si Paulus ka tubunia, ia te imarereirei isogai nia patibo.

²⁷ Kele aiaili rua ngarura, silinangan si Feliks si Perkius Festus. Kalulut ioba iala bagada tai Jahudi si Feliks riuriuakenangan ikuddu si Paulus ka bagat penjara.