Pugap. 23 - BUKO SIPUNENAN

¹ Ia geti kinerenangan sipurarapat si Paulus kuanangan, “Ale sasaraina, teret kineneiget siripot paatuat simalina le akupuparaboat ka matat Taikamanua.”

² Guguluakenangan Imam Sabeu Ananias sipuririo ka bebet Paulus itepa ngungun Paulus.

³ Kuanangan ka matania si Paulus, “Ai leu itepa ekeu Taikamanua, ekeu rupi sikapu! Muuddet ekeu sene masiukum aku siripot Surukat, lepa guguluakenungan tutepa aku masipasabau Surukat.”

⁴ Kuanangan sipuririo ka bebenia, “Nuaasa koi Imam Sabeu Taikamanua?”

⁵ Aleginangan nia si Paulus, “Ta kuagai ale sasaraina Imam Sabeu le nia. Kirenangan atusuratnan ka Surat Sipunenan, ‘Bui nuasa sipaneinei bangsam.’ ”

⁶ Kele aiagai si Paulus, ka talagada sipurarapat, iretalaga tai Saduse, iretalaga tai Parise, sogaakenangan ka matada sipurarapat, “Ale sasaraina! Tai Parise le aku, togat tai Parise. Kalulut tonem baga ka katusuruat tubu simamatei le aranganduake aku.”

⁷ Kele aikua nene, pajoggolorangan tai Parise samba tai Saduse bailiu rubei rua parurukat nene.

⁸ Aipoi tai Saduse masikua, ta anai katusuruat simamatei, ta anai malaika ele ketsat; tai Parise geti rakatonemi le ruania.

⁹ Baranangan pugaugapat sabeu. Puriorangan leu siagaisurat ka rubeiatda tai Parise pajoggolorangan kuarangan, “Ta anai kusese kai sele ka tubut sirimanua nene! Ele ai pa ketsat ele malaika sipaninibo ka tubunia!”

¹⁰ Memei makokope beu le pajoggolatda; maseddenangan utera tai saladdu baleu rapabirit si Paulus. Sogainangan tai saladdu ratugorosot raala si Paulus ka talagada, raambit nia ka markas.

¹¹ Ka soibonia nenda, purionangan si Tuhan ka bebenia kuanangan, “Bui imakarat bagam! Aipoi kele mumunengakenu aku ka Jerusalem, buita kisedda geti numunengake aku ka Roma.”

Pukerekat bagada tai Jahudi masimateiake si Paulus

¹² Kele aimapato pukererangan baga piga pa tai Jahudi, supparangan tubuda ta mukom, ta mulo, ke tapei ramateiake si Paulus.

¹³ Igida sipukekere baga nene ai epat pulu sia legei.

¹⁴ Lepa ei sia ka tai imam sabeu samba ka tai bajara tai Jahudi kuarangan, “Akusuppangan kai tubumai ta kukokom kai apa pa ke tapei kumateiake kai si Paulus.

¹⁵ Oto kineneiget tiddou kam sangamberimui sipurarapat ka utera tai saladdu, bule iambit si Paulus mancep ka matamui, kuamui le bule nulelekngake kam pakaronia bulat sipulelelek; oto kai amatarekngan kai kumateiake kai nia enan tapei sesege nia se.”

¹⁶ Tapoi pukerekat bagada nene aiarep le buat Paulus, einangan leu et ka markas masisegeake nia kai Paulus.

¹⁷ Lepa sogainangan si Paulus sara kapiten saladdu kuanangan ka matania, “Ambit pei silainge nene ka utet saladdu ai segeakenennia ka matania.”

¹⁸ Alanangan nia si kapiten, ambitnangan nia ka utet saladdu kuanangan, “Aisogai aku si Paulus sipenjaraakenen nenda, aitiddou kuambit silainge nene ka matam, aipoi ai kuanennia ka matam.”

¹⁹ Alanangan kabeinia utera tai saladdu, ambitnangan nia ka bebe, nounounangan nia, “Aponia segeakenennu ka mataku?”

²⁰ Aleginangan nia silainge, “Apakerean bagada tai Jahudi, bule ratiddou ka matam nuambit si Paulus mancep ka purapanan, rapakau tubuda masilelekngake sipulelelek pagalaiat pakaronia.

²¹ Tapoi bui nureddet nganganda, aipoi ai epat pulu sia legei silekeni nia. Arasuppangan tubuda ta mukom, ta mulo, ke tapei ramateiake si Paulus; kineneiget amatarekngan sia, tiboietnungan le rangengena.”

²² Lepa kuanangan utera tai saladdu itoili silainge, paneineinangan nia, “Bui nukua nia ka kasei pa sesegeakenu nene ka mataku.”

Rataroake si Paulus ka Kaisarea

²³ Lepa sogainangan utera tai saladdu rua kapiten saladdu kuanangan, “Tarekngake kam rua ngotu saladdu samba pitu pulu sipukukuro samba rua ngotu sibara sosoat, raei bobo siba soibo nene ka Kaisarea.

²⁴ Tarekngake leu kam kuro kai Paulus, taroakemuian nia sipulelelek kai gubernur Feliks.”

²⁵ Suratnakenangan leu surat kise ngangania:

²⁶ “Salam sibara kaku Klaudius Lisias masiailiake gubernur siabeu!

²⁷ Sirimanua nene aralaba nia tai Jahudi, kei ramamateiakean le nia ke ta mei aku samba tai saladdu masibelaake nia; akuarep poi tai Roma le nia.

²⁸ Kalulut kubesiake kuagai apa lulu ranganduake nia ambitkungan nia ka matat rapatda.

²⁹ Sese akusese nia, sarat kalulut pagalaiat Surukatda le aranganduake nia, ta anai panganduat simateu tumateiake ele tupenjaraake nia.

³⁰ Kele arasegeake ka mataku iisiakera tai Jahudi ralekeni nia, teuakekungan leu kukoiniake nia ka tubum. Akukuangan leu ka matada sipasingangandu nia raoi masisegeake nia ka matam.”

³¹ Alarangan si Paulus tai saladdu siripot siparentaakenen ka matada, ambitrangan nia soibo nenda leu et ka Antipatris.

³² Pato, sipukukuroan le arakau masiriuriuake puenunganan masiambit si Paulus; sia sabagei geti toili sia ka markas.

³³ Sege sia ka Kaisarea, kaurangan surat kai gubernur, segeakerangan leu si Paulus ka tubunia.

³⁴ Lepa aibasa surat si gubernur, nounounangan si Paulus ka laggai kaipa aibara. Kele aiagai sibara ka Kilikia le nia,

³⁵ kuanangan, “Ai leu kuarep pakarom abarangan geti sia singanduake ekeu.” Lepa kuanangan rajago si Paulus ka lalep pasiukuman rimata Herodes.