Pugap. 20 - BUKO SIPUNENAN

Puenunganan Paulus ka Makedonia samba Grika

¹ Kele aipuari pugaugapat, sogainangan sangamberi sipasiului si Paulus, pusuibinangan sia. Lepa aikua ka matada katutuituinia, tui nia iei ka Makedonia.

² Gejenginangan tobbou nene, samba lepa aikau nganturat simaigi masironake paatuatda sasaraina, ei nia ka Grika.

³ Telu ngalaggo ujunia aikuddu sedda. Kele araisiake tai Jahudi masimateiake nia ka teteret aipatatarek tubunia mulajo ka Siria, teuakenangan toili minca ka Makedonia.

⁴ Tapoi rapaalei le nia ia te si Sopater togat Pirus sibara ka Berea, si Aristarkhus samba si Sekundus, ruada sibara ka Tesalonika, si Gayus sibara ka Derbe samba si Timoteus, si Tikhikus samba si Tropimus sibara ka Asia.

⁵ Sia le boiki amei, ngenarangan kai ka Troas.

⁶ Kele aitukappulu Punen Roti Sitasioman, pulajomaian baramai ka Pilippi, lima ngagogoi burunia sege kai ka Troas. Pukuddumaian sedda pitu ngagogoi.

Pabalogat Paulus pasilepania ka Troas

⁷ Ka gogoi siboiki ka bagat menggui nenda, ka teteret akuparuru kai masipatippu roti, panibonangan si Paulus ka matada, aipaatu poi mancep mutuitui. Riuriuakenangan ipanibo paparat aili tengamoi.

⁸ Ka bat lalep ka pata, kudduatmai paruru ai maigi alito.

⁹ Ai sara silainge sipuoni si Eutikus, ai nia mututukku ka jandela. Matom poi aipanibo si Paulus, matuddunangan matania, uneng nia sipulelelek, lepa bele nia ka repe barania ka bat lalep sikatelunia. Akkatnakera le nia ailangoan nia.

¹⁰ Ia geti gorosot si Paulus ka repe, rappo nia ka tubut silainge, lakkaiakenangan nia, kuanangan, “Ba makakarat kam baga, ai pei le nia muririmanua.”

¹¹ Lepa sakai nia minca ka pata, patippunangan roti mukom; lepat koman mauju pei le aipanibo, pat malegera pato. Lepa tui nia.

¹² Ambitrangan silainge nenda ka lalepnia sipuririmanua, samba bulat ta magulai angkat bagada.

Barania ka Troas aili ka Miletus

¹³ Kai le boiki atujanang ka kapal mulajo ka Asos masiala si Paulus sedda siripot sikuania, aipoi musila le iei ka sia sedda.

¹⁴ Kele akupaaili kai ka Asos, alamaian nia, ei kai ka Metilene.

¹⁵ Baramai sedda pulajomaian, pato sege kai ka ipot Khios. Pato minca sege ka Samos, pasat sangagogoi sege kai ka Miletus.

¹⁶ Aiteuakean poi si Paulus ta tusappai ka Epesus bui isappuru tetere ka Asia. Aipoi maola bagania, ke moi nia bule ka gogoi punen Pentakosta asegean nia ka Jerusalem.

Tiboiet pasaraat Paulus ka tai baja gareja ka Epesus

¹⁷ Ka Miletus koiniakenangan si Paulus sieei ka Epesus masisogai tai baja gareja.

¹⁸ Kele araoi kuanangan ka matada, “Anuagaian kam kipa puririmanuangku ka talagamui baranangan ka gogoi siboiki pei le akuoi ka Asia.

¹⁹ Ka epet paatuat le samba pagalu elu akugalai galajet Tuhan, samba maigi akuorik pasisiboat kalulut isiatda tai Jahudi masimateiake aku.

²⁰ Ta anai akupakele sangamberi sibailiu katuerukatmui; sangamberinia le kusegeake ka kam, ele ka parurukat siberikabaga ele ka senen lalep.

²¹ Sarat kumunengake ka tai Jahudi samba ka tai Grika bule rabauake paatuatda toili ka Taikamanua samba rakatonemi Tuhanta Jesus.

²² Kineneiget masitut patonekat Ketsat Sipunenan mei aku ka Jerusalem, ta kuagai apa sibabara ka tubuku sedda.

²³ Sarat nene le kuagai, ka senen laggai ipoiliat le Ketsat Sipunenan ka mataku ngengenaakena aku penjara samba paoreat.

²⁴ Tapoi beri goiso ta kupuletsei purimanuaiatku; itukappulu le eijatku samba kulepaake galajet siniloku kai Tuhan Jesus, masimunengake Katuareman Simaeru pukatekat bagat Taikamanua.

²⁵ Kineneiget aiagaian tubuku, taan te nuiitco kam mataku, kam sangamberi siailiakenenku masisegeake Purimataat Taikamanua.

²⁶ Ia te kumunengake ka matamui gogoi nene, taan te iaaili aku ke ai simalilimai ka talagamui sangamberimui.

²⁷ Aipoi ta akupakele masisegeake sangamberi kiddiet bagat Taikamanua ka matamui.

²⁸ Oto pagaba kam tubumui samba leu sangalio paamian, kam poi airioake Ketsat Sipunenan bailiu sipaneinei, masipasikeli paamian Taikamanua sinakinia logau Togania.

²⁹ Kuagai, kurukku tuguguru te ka talagamui arimau simasakbak sitaiinou paamian.

³⁰ Ka talagamui leu tususuru te sirimanua sipakatai nganga masipepeake sirimanua masitiktik sia bule ratut sia.

³¹ Oto pumata kam, repdep kam, telu ngarura burunia, taipuaari sinago sinoibo pagalu elu kupangantoman kam senemui.

³² Kineneiget kusegeakean le kam ka Taikamanua samba ka tiboiet pukatekat bagania, simagege masipasikeli kam samba masipanguruatnake ikemen ka kam sinarekngakenennia ka sangamberi sipunenannia.

³³ Ta anai akukiddi perak ele mas ele leppeira kasei pa.

³⁴ Tubumui le iagai nia, kabeiku le amasibaraake purimanuaiatku samba purimanuaiatda saaleiku.

³⁵ Ka sangamberinia nene kupatoila uluietmui, buita kise te tupugalai masiromake simaluluk, samba masirepdep tiboiet Tuhan Jesus, nia poi amasikua, ‘Masikau pei le mauktuk bele pei le masisilo.’ ”

³⁶ Lepa aikua nene purekkuknangan si Paulus samba sangamberida manindou.

³⁷ Pusourangan sangamberida, lakkaiakerangan si Paulus, siggukrangan nia.

³⁸ Imakokope reureu bagada, kalulut kukuana taan raiitco matania minca. Lepa taroakerangan nia ka kapal.