Pugap. 2 - BUKO SIPUNENAN

Katuuruat Ketsat Sipunenan

¹ Kele aiaili gogoi Pentakosta, parururangan sangamberi simatonem baga ka sara kudduat.

² Sinulut bara ka manua nganga sipugogong kele rusa simapiret sisutnake sangalio lalep kudduatda.

³ Tulotsitnangan ka tubuda lila kele juluu api siragatnakenen tuleu ka senen tubuda.

⁴ Ia geti sun ka tubuda Ketsat Sipunenan, taddaakerangan manibo ka nganga bagei, siripot sikau Ketsat Sipunenan ka tubuda rapanibo.

⁵ Ka teteret nenda ai ka Jerusalem mukuddu tai Jahudi simatopit sibara ka senen bangsa ka tei manua.

⁶ Kele araarep nganga nene parururangan sirimanua simigi. Gege le ka bagada raarep rapanibo tai apostel ka nganganda senenda.

⁷ Tenan le kisei ka bagada tugege bagei, kuarangan pasasambada, “Ta sangamberida sipaninibo nene tai Galilea?

⁸ Kipa te galainia taarep rapanibo ka ngangan laggai pututukat matata:

⁹ Tai Partia, Media, Elam, sibara ka Mesopotamia, ka Judea samba Kapadokia, ka Pontus samba Asia,

¹⁰ tai Prigia samba Pampilia, Misir samba laggai Libia ka bebet Kirene, siooiake sibara ka Roma,

¹¹ tai Jahudi ele sibailiu Jahudi, tai Kereta samba tai Arab; sangamberita masiarep rapanibo ka nganganta pagalaiat beunan galajet Taikamanua!”

¹² Sangamberida makisei ka baga, tenan keppu ka bagada, kuarangan pasasambada, “Apa te katukolobatnia nene?”

¹³ Tapoi kuarangan sabagei asara, “Ai le sia ipapupuineng anggur simakaikai.”

Ngantoman Petrus

¹⁴ Ia geti purionangan si Petrus samba sipulusara, kuanangan ka matada sabeu nganga, “Ale kam tai Jahudi samba kam sangamberi sikuddu ka Jerusalem, agai kam samba lelekngake kam tiboietku nene.

¹⁵ Ta mapuineng sia tainene kele pinaatumui, aipoi bobo siba simancep pei le kineneiget.

¹⁶ Nene geti aitiboian Taikamanua ka ngangan nabi Jo'el:

¹⁷ ‘Babara te ka gogoi sialu – ngangan Taikamanua – kuuruake Ketsatku ka sangamberi tubu; pasipoiliatrangan tatogamui taimanteu samba tatogamui tainanalep. Samba tailaingemui raitco taiitcoket, samba taibajamui rapangamutnake pangamutet.

¹⁸ Ka paguguletku simanteu samba ka paguguletku sinanalep leu kuuruake Ketsatku ka gogoi nenda, pasipoiliatrangan leu.

¹⁹ Samba kubaraake kiseiet ka pata ka manua samba patuaggaiat ka epe ka polak: logau samba api samba kujuk sipububuggara.

²⁰ Magepgepnangan matat sulu samba laggo bailiu kele logau kei bara gogoi Tuhan, gogoi sabeu samba simalatsat.

²¹ Ia geti senen sipasisosogai onin Tuhan maaarau sia.’

²² Kam sasaraina tai Israel, arepmake kam tiboietku nene: Jesus tai Natsaret, aikokoiakean nia Taikamanua ka kam. Nene matoila kalulut kerek samba kiseiet samba patuaggaiat sigalai Taikamanua ka talagamui kalulut nia, kele siagaimui leu.

²³ Nia nene sinegeakenen Taikamanua ka kam siripot teu bagania, anukauan kam nia ka kabeira sipuarat sabulungan rapattaake nia ka siliktenga masimateiake nia.

²⁴ Tapoi aisuruake le nia Taikamanua, aibelaake nia ka geget kamateiat, aipoi ta momoi ikupkup nia kamateiat.

²⁵ Aikuangan poi si David pagalaiat tubunia, ‘Mariuriu le kuitco si Tuhan ka mataku, ai le poi nia ka isit kai kattoetku, bui kumasedde.

²⁶ Ia te lulunia imaangka bagaku samba ngungungku masiumun; beri akkulaku muari ka bagat pukakaronan.

²⁷ Aipoi ta nuoobaake ikuddu ketsatku ka taikabaga, samba ta nuoobaake Sipunenannu masiitco kaaanau.

²⁸ Anupaagaian kaku enungan purimanuaiat, Sun le angkat bagaku kalulut ai aku ka bebenu.’

²⁹ Ale sasaraina, kukua nia simakolou ka matamui pagalaiat taikebbukatta si David. Atataan nia samba aturateiakean nia, ai le ka talagata se rateinia teret kineneiget.

³⁰ Tapoi nabi le nia, samba aiagaian aipalelek nia Taikamanua ka suppa, uuddetnakena ka uddenan purimataatnia sara sibara ka punuteteunia.

³¹ Ia te aiitco sipuaaili ka gogoi ka mata samba aitiboian pagalaiat katususurut Kristus, ta mukukuddu nia ka taikabaga samba akkulania ta iitco kaaanau.

³² Jesus nene te aisuruake Taikamanua, samba ka pagalaiat nene kai sipasimumuneng.

³³ Lepa aitubuakngake nia isit kai kattoet Taikamanua samba aisilo Ketsat Sipunenan palelengan sibara ka Ukkui, uruakenangan nia kele siitcomui samba siarepmui kineneiget.

³⁴ Aipoi si David ta atusakai nia ka sorga, tapoi aikua le, ‘Aikua si Tuhan ka matat Tuhanku: Uddetnake ekeu ka isit kai kattoetku,

³⁵ teret kukau saggaknu bailiu kalak rerem.’

³⁶ Oto kau nuagai kam nia simakolou kam sangalio uman Israel, Jesus siniliktengaakenenmui nenda, aikauan nia Taikamanua bailiu Tuhan samba Kristus.”

³⁷ Kele araarep nene saksaknangan ka bagada, kuarangan ka matat Petrus samba tai apostel sabagei, “Kipangan le kugagalai kai, sasaraina?”

³⁸ Kuanangan ka matada si Petrus, “Bauake kam paatuatmui, oba kam iturau kam senemui ka onin Jesus Kristus pasiappet jomui, silomuian leu panguruat Ketsat Sipunenan.

³⁹ Aipoi ka kam le palelengan nene samba tatogamui samba sirimanua ka sareunan ele piga sia sogaiet Tuhan Taikamanuanta.”

⁴⁰ Maigi pei le bagei tiboiet ikau masimunengake samba inana sia, kuanangan, “Oba kam ituarauake kam, nubela kam ka reddenan sirimanua sikatai nene.”

⁴¹ Sia silelekngake tiboietnia, tiddourangan turau sia; ai pa telu ribu igida aituppai ka gogoi nenda.

⁴² Mariuriu le sia ka bagat ngantomanda tai apostel samba ka parurukat, ka pukoman simakere samba ka panindogat.

Galai puririmanuanda paamian siboiki

⁴³ Maigi kiseiet samba patuaggaiat ragalai tai apostel; bara ibara loto ka sangamberi sirimanua.

⁴⁴ Sangamberida simatonem baga mariuriu le rapusara, sisara bibilet le sia sangamberida.

⁴⁵ Sabagei rasakiake bibiletda samba sibabara ka tubuda, parubeirangan bulagatnia sangamberida siripot simagulai ka sia.

⁴⁶ Senen gogoi le sia paruru sisara paatuat ka Uman Taikamanua. Pasailisaili ka senen lalep raei mukom; pukomrangan kerekere ka angkat baga samba ka linat paatuat,

⁴⁷ umunakerangan Taikamanua samba raoba sia sangamberi sirimanua. Samba senen gogoi le ituppaiake si Tuhan ka paamianda sirimanua sisese puaragat.