Pugap. 18 - BUKO SIPUNENAN

Paulus ka Korintus

¹ Pasat nene tui si Paulus kaddiuakenangan Atena, ei nia ka Korintus.

² Sedda paailirangan sara tai Jahudi sipuoni si Akwila sibara ka Pontus. Simaruei pei le aibara ka Italia ruada sinanalepnia si Priskila, kalulut aiparentaake poi Kaisar Klaudius ratuitui sangamberi tai Jahudi ka Roma. Tagetnakenangan sia si Paulus,

³ samba kalulut makere le poi galajetda, pukuddurangan, pugalairangan sambada; pasasambada poi tukang tenda.

⁴ Tapoi senen gogoi Sabat mungantoman le si Paulus ka uma parurukat masinana tai Jahudi samba tai Grika mutonem baga.

⁵ Kele aioi si Silas samba si Timoteus barada ka Makedonia, muineakenangan paatuatnia si Paulus masipaarep tiboiet Taikamanua masimunengake ka tai Jahudi, Jesus ia te Kristus.

⁶ Tapoi kalulut sarat masisaggangi samba masiasa le ragagalai, sosoakenangan abu ka leppeinia si Paulus kuanangan ka matada, “Ke mei kam ka pulangokat, selemui le, ta iaili aku; barania kineneiget ka bangsa bageian le kueei.”

⁷ Tui aituitui sedda ei nia ka lalep sara sirimanua sirepdep loto ka Taikamanua sipuoni si Titius Justus; lalepnia nene aipabebebe uma parurukat.

⁸ Tapoi si Krispus, utet uma parurukat matonem bagania kai Tuhan samba sangamberi sikuddu ka lalepnia, samba maigi leu tai Korintus sabagei kele araarep katuareman sibara kai Paulus, matonemnangan bagada, turaurangan leu.

⁹ Ka sara soibo bara siitcot matania si Paulus, sedda ikua si Tuhan ka matania, “Ba maloloto, tiboi le, ba pumemengmeng!

¹⁰ Ai le kupaalei ekeu, ta anai kasei pa siooi masigalai apa pa ka tubum, aipoi maigi sirimanua bakkatku ka laggai nene.”

¹¹ Ia geti pukuddunangan si Paulus sedda sangarura enem ngalaggo masigelaiake tiboiet Taikamanua ka sia.

¹² Ka teteret Gallio gubernur ka Akhaya, pakererangan baga tai Jahudi masisaggangi si Paulus, ambitrangan nia ka purapanan,

¹³ kuarangan, “Ai le itutubbui sirimanua sinene masipanindogi Taikamanua ka enungan sitaipasesese ka Surukat.”

¹⁴ Kei maninibongan le si Paulus, kuanangan si Gallio ka matada tai Jahudi, “Kam tai Jahudi, ke pagalaiat pasipasasabau ukum ele pugagalai sikatai bai panganduatmui nene, mateu kulelekngake kam.

¹⁵ Tapoi ke pajoggolat pagalaiat tiboiet ele oni ele surukatmui geti, kaman le ipagaba nia; ta koba kuukum nene.”

¹⁶ Lepa kekelenangan sia ka purapanan.

¹⁷ Labarangan sangamberida si Sostenes utet uma parurukat, pabobokirangan nia ka matat purapanan. Tapoi ta aipuuku si Gallio nene.

Paulus toili ka Antiokia

¹⁸ Pasat nene mukuddu pei le nia goiso si Paulus ka Korintus. Lepa segeakenangan katutuituinia ka saalei, pulajonangan iei ka Siria samba si Priskila samba si Akwila, lepana aisapu alainia ka Kengkrea; kalulut aipoi sibalaatnia.

¹⁹ Sege sia ka Epesus, kaddiuakenangan si Priskila samba si Akwila, ei nia sarania ka uma parurukat masipatiboake tai Jahudi.

²⁰ Tiddourangan bule imauju pei le ikuddu, tapoi ta ioba.

²¹ Tapoi sege le aisegeake katutuituinia kuanangan, “Ai leu kuoi minca ka kam, ke iobaake Taikamanua.” Lepa pulajonangan barania ka Epesus.

²² Kele aisege ka Kaisarea, tatara nia ka Jerusalem masiroroi paamian, lepa ei nia ka Antiokia.

²³ Piga pa ujunia aikuddu sedda, lepa tui nia minca, gejenginangan sangalio tobbou Galatia samba Prigia masironake paatuatda sipasiului.

Apollos ka Epesus

²⁴ Ka teterenia nenda oi ka Epesus sara tai Jahudi sipuoni si Apollos siputututu mata ka Aleksandria. Bulat iagai mutitiboat samba maagai nia Surat Sipunenan.

²⁵ Atupangantomanan nia enungan Tuhan, simakope ngamang le nia mungantoman, makolou le igelaiake pagalaiat Jesus; tapoi sarat pasiraukat Johannes pei le iagai.

²⁶ Taddaakenangan mungantoman ka uma parurukat ka bagat eme. Kele aiarep nia si Priskila samba si Akwila, ambitrangan nia ka lalepda, kolouakerangan ka matania simakope kolou enungan Taikamanua.

²⁷ Kele aiisiake si Apollos mei ka Akhaya, koiniakerangan surat saalei ka Epesus ka saalei ka Akhaya, bule rasilo nia. Kele aisege sedda, bailiu paroman sabeu ka sia siputotonem baga kalulut katet bagat Taikamanua.

²⁸ Bulat maron poi nia masikalaake tai Jahudi ka simatoila samba isausau sibara ka Surat Sipunenan, Jesus ia te Mesias.