Pugap. 17 - BUKO SIPUNENAN

Pugaugapat ka Tesalonika

¹ Sabau arasabau Ampipolis samba Apolonia sege si Paulus samba si Silas ka Tesalonika. Sedda ai sara uma parurukatda tai Jahudi.

² Kele simareirei, guru si Paulus ka uma parurukat. Telu ngasabat ujunia arapatiboiji ruang Surat Sipunenan.

³ Kolouakenangan nia samba isausau ka matada pagalaiat Kristus buita masiorik samba tusuru ka simamatei. “Jesus nene sipaarepku ka matamui, ia te Kristus,” ngangania.

⁴ Ai piga pa ka talagada amatonem baga, tutrangan si Paulus samba si Silas, ia leu et maigi sia tai Grika sikalotoake Taikamanua, samba ta magulai tainanalep siabeu tiboi tubu.

⁵ Tapoi tai Jahudi geti masisi le bagada. Ruruakerangan sirimanua pakataikatai siputeteba ka pasakiat, galairangan pugaugapat ka laggai. Gurukirangan lalep Jason ragaba si Paulus samba si Silas bule raambit sia ka matat sirimanua simigi.

⁶ Kele ta arasese sia, giritrangan si Jason samba piga pa saalei ka matada sautet laggai, pugereirangan, “Tai nene te sibaraake pugaugapat ka sangalio polak! Kineneiget amoian leu sia sene,

⁷ samba si Jason amasisilo sia ka lalepnia. Sangamberida nene masipasabau surukat Kaisar, aipoi arakua ai pei le rimata bagei, ia te Jesus.”

⁸ Kele araarep tiboiet nene ngoingoinangan bagada sirimanua simigi samba sautet laggai.

⁹ Teret arasilo sibailiu katoneman sibara kai Jason samba ka saalei sabagei, ia pei obaakerangan sia.

Paulus samba Silas ka Berea

¹⁰ Soibo nenda leu et kuarangan saalei kai Paulus samba kai Silas raei ka Berea. Segera le sedda ei sia ka uma parurukatda tai Jahudi.

¹¹ Tai Berea nene makatopit sia bele pei tai Tesalonika; bulat raoba masisilo tiboiet Taikamanua samba senen gogoi rabasa Surat Sipunenan masilelekngake ele bulatnia leu sangamberi sikuada.

¹² Oto maigi sia amatonem baga, samba ta magulai tai Grika siabeu tiboi tubu tainanalep samba taimanteu.

¹³ Kele araagai nia tai Jahudi sikuddu ka Tesalonika ngangantomanakena tiboiet Taikamanua si Paulus ka Berea, oirangan leu et sedda masipakatai nganga samba masigejaake bagada sirimanua simigi.

¹⁴ Olaakerangan saalei rakoiniake si Paulus ka bebet koat; si Silas samba si Timoteus-an le amukuddu sedda.

¹⁵ Tapoi sia sipasiaambit si Paulus, taroakerangan nia pat aili ka Atena. Ia geti lepa arasilo patonekat Paulus kai Silas samba Timoteus raoi simaruei, toili sia ka Berea.

Paulus ka Atena

¹⁶ Ai nia masingengena si Silas samba si Timoteus ka Atena si Paulus, tenan le golu bagania aiitco sun le tularat sabulungan ka bagat laggai.

¹⁷ Kalulut nene patiboakenangan tai Jahudi ka uma parurukatda samba sia sikalotoake Taikamanua samba senen gogoi ka pasakiat ka tubuda siooi sedda.

¹⁸ Ai leu piga pa simasiku paatuat tai Epikuros samba tai Stoa sipajoggoloake nia, sabagei masikua, “Apa te ititiboi simaigi tiboiet nene?” Sabagei masikua, “Ai pa ititiboi pagalaiat taikamanua bagei.” Aititiboi poi pagalaiat Jesus samba katusuruat simamatei.

¹⁹ Lepa alarangan nia, ambitrangan nia ka purapanan Areopagus, kuarangan, “Momoi leu kuagai kai ngantoman sibau kipa nenda siniboinu?

²⁰ Anupaarep poi ka piumai simakisei ka bagamai, ia te kuoba kai kuagai kai apa katukolobat sangamberinia nenda.” (

²¹ Aipoi tai Atena samba sioiake sikuddu sedda ta anai bagei siobat bagada, sarat masitiboi samba masiarepi sibabara sibau.)

²² Purionangan si Paulus ka talagat Areopagus kuanangan, “Kam tai Atena, kuitco bulat masuru kam ka tubut sabulunganmui.

²³ Aipoi kele akupugejek ka sangalio laggaimui samba kuitco kudduat panindogatmui, sesekungan sara pasibuluat sibara surat, ‘Ka Taikamanua sitaiaagaiet.’ Oto sinurumui, sitaiaagaietmui, ia te kusesegeake ka matamui.

²⁴ Taikamanua sibaraake polak samba sangamberi sibabara ka bagania, ia te Tuhan manua samba polak, ta mukukuddu nia ka uma sigalai kabei;

²⁵ ia leu et ta anai kauna nia paroman sirimanua, nia le poi sipasikakau purimanuaiat samba enga samba sangamberinia ka sangamberi sirimanua.

²⁶ Ka sara sirimanua le aibaraake sangamberi bangsat sirimanua masikudduji sangalio polak. Aitetereakean leu rura ka sia samba pasongan kudduatda,

²⁷ bule ragaba Taikamanua, kei gabagaba seserangan nia, ta poi areu nia ka senen tubuda.

²⁸ Ka tubunia le poi tapuririmanua, tapungongoingoi samba ai, kele sikuada piga pa ka kam, ‘Sita nene leu tatogat Taikamanua.’

²⁹ Oto ke tatogat Taikamanua sita, bui ikua ka bagata makere ka mas Taikamanua, ele ka perak, ele ka bukku, sigalai ka agai kabei samba pinaatut sirimanua.

³⁰ Oto tetere putaiagaiat sirimanua taan aipuletsei Taikamanua, tapoi kineneiget sangamberi sirimanua kaipa kaipa ikua rabauake paatuatda.

³¹ Aipoi aitetereakean sara gogoi sedda ikau ukuman simaroipo ka taikapolak ka kabei sara sirimanua sirioakenennia. Pasitonem bagada sangamberi sirimanua ka pagalaiat nene, aisuruakean nia ka simamatei.”

³² Kele araarep pagalaiat katusuruat simamatei, asarangan nia sabagei; sabagei geti masikua, “Koba pei le kuarep kai minca nutiboi pagalaiat nene.”

³³ Lepa kaddiuakenangan sia si Paulus.

³⁴ Tapoi ai leu ka talagada situtnake nia, matonemnangan bagada, ka talagada ia te si Dionisius laddou Areopagus, samba sara sinanalep sipuoni si Damaris, samba ai pei le sabagei.