Pugap. 15 - BUKO SIPUNENAN

Rapat ka Jerusalem

¹ Ai piga pa siooi ka Antiokia sibara ka Judea, pangantomanrangan saalei kuarangan, “Ke ta tusunat kam siripot sitoneakenen Mose, ta momoi numaarau kam.”

² Ta magulai pajoggolat samba paukelat Paulus samba Barnabas ka tubuda. Kalepakatnia, teuakerangan iei si Paulus samba si Barnabas samba piga pa ka talagada sapaamian masitagetnake tai apostel samba tai baja ka Jerusalem, masitiboi pagalaiat nene.

³ Taroakerangan sia sapaamian ka enungan tui sia, silajirangan Penisia samba Samaria, nunuakerangan sedda katubabauna paatuatda sipuarat sabulungan; bailiu maangka bagada saalei sedda.

⁴ Kele arasege ka Jerusalem, roroirangan sia sapaamian samba tai apostel samba tai baja, nunuakerangan leu sangamberi sigalai Taikamanua kalulut tubuda.

⁵ Ia geti rio piga pa tai Kristen sibara ka rubeiat Parise siburu kuarangan, “Buita tusunat le sia samba ratut surukat Mose.”

⁶ Lepa purapatrangan tai apostel samba tai baja masipatiboiji pagalaiat nene.

⁷ Kele aimauju arapaukele, rio si Petrus, kuanangan ka matada, “Ale sasaraina, anuagaian kam ka panandaatnia pei le aipili aku Taikamanua ka talagamui, bule kupaarep Katuareman Simaeru ka sabangsa bagei, ramatonem baga.

⁸ Taikamanua leu siagai paatuat sirimanua aimunengakean sisilona sia, ka bagat kakauna ka sia Ketsat Sipunenan keleu ka sita,

⁹ samba ta iiggat sita ka sia, lepa ailinaake paatuatda kalulut tonem baga.

¹⁰ Oto angoi nusibo kam Taikamanua kineneiget nukau kam bairatet ka tetekatda sipasiului, beringan taikebbukatta ele sita ta momoi tabairat nia?

¹¹ Tapoi matonem bagata, kalulut katet bagat Tuhan Jesus le iooi tamaarau, kisedda leu sia.”

¹² Pumengmengrangan sangamberi siparururu, arepirangan si Barnabas samba si Paulus ranunuake sangamberi kerek samba kiseiet sigalai Taikamanua ka talagat bangsa bagei kalulut tubuda.

¹³ Lepa arapanibo, kuanangan si Jakobus, “Ale sasaraina, arepmake kam kaku!

¹⁴ Aikolouakean si Simon, ka panandaatnia pei le aipakoinongan katet bagania Taikamanua ka bangsa bagei, iala ka talagada bailiu bangsania.

¹⁵ Sangamberinia nene pasese le ka siniboira tai nabi kele sitususurat,

¹⁶ ‘Pasat nene momoi aku minca kurioake minca sapou David simabubukkat, samba simararagat kupaeru samba kuparon minca,

¹⁷ bule sangamberi sirimanua sabagei masigaba si Tuhan, samba bangsa bagei sinogaiku bailiu bangsaku. Kise te ngangan Tuhan, sigalai sangamberinia nene,

¹⁸ simaaagai barania ka siburu pei le.’

¹⁹ Oto siripot ka paatuatku, ta tugegejaake bagada bangsa bagei sitotoili ka Taikamanua.

²⁰ Tapoi suratnan le takakau ka sia, tanganturu sia bui rakom komen sibuluakenen ka buluat; raareuake tubuda ka puumunan; samba bui rakom tarimeu sipetsut, ele mukom logau.

²¹ Aipoi Surukat Mose barania ka siburu pei le atungantomanakean ka senen laggai, samba tubasaake senen gogoi Sabat ka uma parurukat.”

Suratda tai apostel ka paamian Antiokia

²² Ia geti teuakerangan tai apostel samba tai baja samba sangalio paamian rapili piga pa ka talagada koiniakenen ka Antiokia alei Paulus samba Barnabas. Pilirangan si Judas sipuoni Barsabas samba si Silas. Ruada nene ia te sikebbukat ka talagat saalei.

²³ Kaurangan raambit surat, kise ngangania, “Salam sibara ka tai apostel samba tai baja samba sasarainamui ka kam sasaraina ka Antiokia, Siria samba Klikia sibara ka bangsa bagei.

²⁴ Akuarepman kai, ai piga pa sibara ka kai masigejaake bagamui samba masipageugeu paatuatmui kalulut nganturatda; nene ta sibara ka ngangamai.

²⁵ Ia te akuteuake kai ka keret baga kupili kai piga pa sia koiniakenen ka kam masipaalei kilibet bagamai si Barnabas samba si Paulus,

²⁶ ia te sirimanua sipasikakau engania kalulut onin Tuhanta Jesus Kristus.

²⁷ Oto kukoiniake kai si Judas samba si Silas bule sia leu masisegeake tiboietmai ka kam.

²⁸ Aiteuakean poi Ketsat Sipunenan samba kai leu masiteuake, bui kutuppai kai sanenia bairatetmui, sarat nene le besiakenenmai:

²⁹ bui nukom kam komen sibuluakenen ka buluat, bui nukom kam logau, bui nukom kam tarimeu sipetsut samba masiareuake tubu ka puumunan. Ke nujago kam tubumui ka sangamberi nene, anugalaiakean kam simaeru. Bule maron kam!”

³⁰ Lepa araparoro, tui si Judas samba si Silas raei ka Antiokia. Ruruakerangan paamian sedda, segeakerangan surat ka tubuda.

³¹ Kele arabasa surat nenda, maangkanangan bagada kalulut pusuibiat ka bagania.

³² Si Judas samba si Silas, nabi le poi sia, maigi arakau tiboiet masipangantoman saalei samba masironake paatuatda.

³³ Kele aimauju goiso arakuddu sedda, obaakerangan saalei ratoili ka erut baga ka sipasikokoiniake sia. [

³⁴ Si Silas geti ioba le mukuddu ka Antiokia.]

³⁵ Tapoi si Paulus samba si Barnabas mukuddu pei le sia ka Antiokia, samba maigi sabagei, masigelaiake samba masisegeake tiboiet Tuhan.

Pasaraat Paulus kai Barnabas

³⁶ Pasat piga ngagogoi pa kuanangan si Paulus ka matat Barnabas, “Sita kam tabalou kam saalei ka senen laggai ka sipaarepta tiboiet Tuhan, bule taitco kipa galai tubuda.”

³⁷ Oto si Barnabas ioba iambit si Johannes sipuoni si Markus;

³⁸ si Paulus geti ta pasese ka bagania ituambit si Markus, aikaddiuake poi sia ka Pampilia samba ta ioba masipaalei sia ka galajet.

³⁹ Kalulut nene pagolurangan simakope, pat pasararangan; alanangan si Markus aleinia si Barnabas, ei sia mulajo ka Siprus.

⁴⁰ Pilinangan si Silas ka sia si Paulus, tui sia lepa arasegeake sia sapaamian ka katet bagat Tuhan.

⁴¹ Gejengirangan Siria samba Klikia, paronrangan paatuatda sapaamian sedda.