Pugap. 14 - BUKO SIPUNENAN

Ka Ikonium

¹ Ka Ikonium kisedda leu et, ei si Paulus samba si Barnabas ka uma parurukatda tai Jahudi; pangantomanrangan sia, bailiu maigi tai Jahudi samba tai Grika mutonem baga.

² Tapoi tai Jahudi sitaimatonem baga, ratubbui le bagada sipuarat sabulungan imangoingoi bagada ka sasaraina.

³ Oto mauju goiso arakuddu sedda tai apostel. Pungantomanrangan ka bagat eme kalulut tonem bagada kai Tuhan. Panguruatnakenangan si Tuhan ka sia ioi rabaraake kerek samba kiseiet masironake tiboiet pagalaiat pukatekat bagania.

⁴ Tapoi bailiu rubei rua le sia sirimanua simigi ka laggai nenda: sabagei masitut tai Jahudi, sabagei masitut tai apostel.

⁵ Lepa pakerenangan bagada sipuarat sabulungan samba tai Jahudi sambada sautera masibesiki samba masibaijuk tai apostel bukku.

⁶ Kele araagai nia tai apostel, tui sia ei sia ka Listra samba ka Derbe, ia te laggai ka Likaonia samba laggai ka riringannia.

⁷ Paareprangan sedda Katuareman Simaeru.

Ka Listra samba Derbe

⁸ Ka Listra ai sara sirimanua sarat mukuddu le nia, taimaron rerenia, masakit nia baranangan ka pusulekatnia, beri pei pueenung nia.

⁹ Kuddu nia iarepmake ipanibo si Paulus. Kinerenangan nia si Paulus, itconangan ai tonem bagania, momoi imale.

¹⁰ Kuanangan si Paulus sabeu nganga, “Rioake ekeu sipulelelek!” Puattatnangan leu ipurio, puenungnangan.

¹¹ Kele araitco sigalai Paulus sirimanua simigi pugereirangan kuarangan ka ngangan Likaonia, “Amakerean ka sirimanua taikamanua, atugorosotnan nia ka sita.”

¹² Oniakerangan si Barnabas Zeus, samba si Paulus raoniake Hermes, aipoi nia le sipaninibo.

¹³ Lepa oi sikerei sabulungan Zeus sikuddu ka bebet laggai masiambit jaui samba ogo ka matatbaliu laggai masibuluake buluakenen sambada sirimanua simigi ka tai apostel.

¹⁴ Kele araarep nia tai apostel si Barnabas samba si Paulus, pabiritrangan leppeira, pabalaurangan raei ka talagat sirimanua simigi pugereirangan kuarangan,

¹⁵ “Ale, angoi nugagalai kam nene? Sirimanua le kai kele kam. Masipaarep Katuareman Simaeru ka kam le akuoi kai se, bule nugalakngake kam galajet siboboi nutoili kam ka Taikamanua sipuririmanua sibaraake manua samba polak, koat samba sangamberi sibabara ka bagania.

¹⁶ Ka tetere siburu aiobaake Taikamanua ragalai siobara tai bangsa;

¹⁷ kenanen kisedda, mariuriu le ipakoinong tubunia ka bagat sene ngamata galajet simaeru, ia te iake urat ka kam sibara ka manua samba rura pubuaiat kan; iake kan ka kam masiangkaake bagamui.”

¹⁸ Kenanen rakua kisedda tai apostel, tapoi siagai ka baga le rakera sirimanua simigi bui rabuluji sia.

¹⁹ Kele araoi tai Jahudi sibara ka Antiokia samba ka Ikonium, pakatairangan nganga ka sirimanua simigi; pabaijungirangan bukku si Paulus, giritrangan nia ka bebet laggai, ka bagada poi amateian nia.

²⁰ Tapoi kele aragoilik nia sipasiului tusurunangan, ei nia minca ka laggai. Pato, tui sia ruada si Barnabas ei sia ka Derbe.

Toili ka Antiokia

²¹ Paareprangan leu Katuareman Simaeru ka laggai Derbe nene si Paulus samba si Barnabas samba maigi abara sipasiului. Lepa toili sia ka Listra, Ikonium samba ka Antiokia.

²² Ronakerangan paatuatda sipasiului, pangantomanrangan sia ramariuriu ka bagat tonem baga, samba rakua, buita taorik le maigi gejat baga tatuguru ka purimataat Taikamanua.

²³ Ka senen paamian rarioake tai baja garejada, lepa segeakerangan sia ka panindogat samba puaso kai Tuhan katonemietda.

²⁴ Silajirangan sangalio Pisidia sege sia ka Pampilia.

²⁵ Lepa arapaarep tiboiet Taikamanua ka Perga, ei sia ka Atalia.

²⁶ Barada sedda pulajorangan ratoili ka Antiokia, ia te kudduat arasegeake sia siburu ka pukatekat bagat Taikamanua masigalai galajet sikappuluakenenda kineneiget.

²⁷ Kele arasege sedda, ruruakerangan paamian, nunuakerangan sangamberi sigalai Taikamanua kalulut tubuda, samba bubukaakena enungan ka sipuarat sabulungan raputonem baga.

²⁸ Pukuddurangan sedda mauju goiso rapaalei sapaamian.