Pugap. 12 - BUKO SIPUNENAN

Jakobus ramateiake – Katupenjaraat samba kabelaiat Petrus ka penjara

¹ Ka teterenia nenda taddaakenangan rimata Herodes masipaoreji laddou paamian.

² Koiniakenangan ramateiake si Jakobus sarainan Johannes ratete nia lanjau.

³ Kele aiitco iooba le bagada tai Jahudi, ia pei ikauake nia; labanangan leu si Petrus, ia te ka teteret Punen Roti Sitasioman.

⁴ Kele ailaba si Petrus, kaunangan nia ka bagat penjara, segeakenangan rajago nia epat ngarubeiat tai saladdu, senen rubeiat epat saladdu. Paatuatnia poi lepat Punen Paska, ambitnangan nia ka matada sirimanua simigi.

⁵ Oto atuguruan si Petrus ka bagat penjara. Tapoi sapaamian geti mariuriu le ratiddouake nia ka Taikamanua.

⁶ Sinoibo, pangenan imapato iambit si Petrus si Herodes ka matada sirimanua simigi, perep si Petrus ka talagat rua saladdu, ai nia kakakabekat rua palenggui. Matatbaliu penjara leu ai sipasijajago.

⁷ Sinulut rio sara malaikat Tuhan sedda, toroinangan pato bagat penjara. Geugeunangan si Petrus isuruake nia kuanangan, “Suru, olaake!” Rugut aimarugut palenggui ka kabeinia.

⁸ Kuanangan ka matania malaika, “Appara tengam samba pakei tarangainu!” Galainangan leu nia. Lepa kuanangan ka matania malaika, “Pakei leppeinu, tut aku.”

⁹ Bela nia tutnangan malaika, tapoi ta iagai ele sibulatnia sigalai malaika nene; ka bagania ka bagat ketsatnia le aiitco nene.

¹⁰ Sabaurangan pujagoat siboiki samba sikarua sege sia ka matatbaliu laba sieei ka laggai. Matatbaliu nene tenan le buka, bela sia, puenungrangan ruada ka sara enungan, lepa tulut kaddiuakenangan si Petrus malaika.

¹¹ Kele aiagai nia si Petrus kuanangan, “Ia pei akuagai bulatnia aikoiniake malaikania si Tuhan masibelaake aku ka kabei Herodes samba ka kiddiet bagada tai Jahudi.”

¹² Kele aiagai kolou, ei nia ka lalep Maria inan Johannes sipuoni leu si Markus. Maigi sia sedda paruru samba manindou.

¹³ Kele ailuuluu si Petrus matatbaliu gerat, oi sara pagugulet sinanalep sipuoni si Rode masiarepi kasei sipasiluluuluu.

¹⁴ Kele aiagai ngangan Petrus le, taibukanangan matatbaliu angkat bagania, ka baga le aiei masisegeake kababarat Petrus ka matatbaliu.

¹⁵ Kuarangan ka matania, “Airoroan ekeu.” Tapoi ironake le masikua bulatnia le nene. Kuarangan, “Malaikania le nenda.”

¹⁶ Tapoi ta iariake si Petrus masiluuluu. Kele arabuka matatbaliu samba araitco si Petrus, tenan le kisei ka bagada.

¹⁷ Maimaiakenangan kabeinia si Petrus rapumengmeng, lepa nunuakenangan kipa aibelaake nia si Tuhan ka penjara. Kuanangan, “Segeake kam nene kai Jakobus samba ka saaleita sabagei.” Lepa bela nia ei nia ka kudduat bagei.

¹⁸ Kele aimapato, gau le sia tai saladdu; keppu le ka bagada pagalaiat sibabara kai Petrus.

¹⁹ Koiniakenangan si Herodes ragaba si Petrus, tapoi ta arasese nia. Oto kuanangan raukum sipasijajago, ramateiake sia. Lepa tui nia ka Judea ei nia ka Kaisarea, pukuddunangan sedda.

Kamateiat Herodes

²⁰ Makope le golut bagania si Herodes ka tai Tirus samba tai Sidon. Ka keret bagada ei sia masitagetnake nia. Patiboijirangan boiki bagat Blastus, sipasijajago lalep rimata bule iromake sia, lepa tiddourangan paaban, kalulut ka polak rimata le ibabara kan ka laggaira.

²¹ Ka sara gogoi silepa tiboi, pakeinangan leppei purimataatnia si Herodes, puuddetnangan ka uddenan purimataat, panibonangan ka matada tai rakyat.

²² Pugereirangan tai rakyat kuarangan, “Ngangan taikamanua le nene, ta ngangan sirimanua.”

²³ Ia leu ne teterenia tepanangan nia malaikat Tuhan, kalulut taisusuruna Taikamanua; gutgutnangan nia leiti, matei nia.

²⁴ Tapoi tiboiet Taikamanua geti, memei le muuurau samba marararat.

²⁵ Oto ka sia si Barnabas samba si Saulus lepa aragalai galajetda ka Jerusalem, toili sia. Ambitrangan si Johannes sipuoni leu si Markus.