Pugap. 10 - BUKO SIPUNENAN

Petrus samba si Kornelius

¹ Ai sara sirimanua ka Kaisarea sipuoni si Kornelius, kapiten saladdu, sipuoni “Pasukan Italia.”

² Simatopit le nia, maloto nia ka Taikamanua samba sangamberi sikuddu ka lalepnia; maigi aikau paroman ka bangsa Jahudi simageba samba mariuriu ipanindou ka Taikamanua.

³ Ka bobo telu tago bara siitcot matania, iitco simakolou sara malaikat Taikamanua tuguru samba masikua ka matania, “Kornelius!”

⁴ Kinerenangan nia si Kornelius, malotonangan, kuanangan, “Aponia Tuhan?” Kuanangan ka matania malaika, “Sangamberi panindogatnu samba anggainu asegean ka Taikamanua samba airepdepman ekeu Taikamanua.

⁵ Kineneiget koiniake le taimanteu raei ka Joppe masisogai si Simon sipuoni leu si Petrus.

⁶ Ai nia murauma kai Simon tukang kulit, sipulalep ka bebet koat.”

⁷ Kele aituitui malaika sipatiboake nia, sogainangan rua paguguletnia samba sara saladdu simatopit, sibara ka talagada tai saladdu sipasijajago nia.

⁸ Lepa aikolouake sangamberinia ka matada, koiniakenangan sia ka Joppe.

⁹ Pato, ai pei le sia mueenung amalegerengan ka laggai Joppe, malegere tugge sulu, pangarainangan si Petrus ka teitei lalep manindou.

¹⁰ Malajenangan, kiddinangan mukom; tapoi ai pei le rapatatarek kan bara aiitco ka bagat ketsatnia.

¹¹ Itconangan tubuka manua, gorosot sara kudduat kele komang simalio sibara sesere ka epat tamingnia, tutattan ka polak.

¹² Ka bagania ai sene ngamata tarimeu siepat rere, leiti sipugugurui samba paumauma.

¹³ Lepa maarepnangan nganga sipasikukua ka matania, “Petrus, suruake ekeu, jaja, kom.”

¹⁴ Kuanangan si Petrus, “Taa, Tuhan, beri pei akukom sikatai ele simalolit.”

¹⁵ Kuanangan minca nganga ka matania, “Ba kukua simalolit silinaakenen Taikamanua.”

¹⁶ Telu ngaminca aibara nene, lepa tiktik minca kudduat nenda ka manua.

¹⁷ Ka teteret aipaiingo si Petrus ipaatu apa katukolobat siitcot matania, amurioan sia ka bebet matatbaliu pakoiniet Kornelius, sipasigagaba lalep Simon.

¹⁸ Pusogarangan masinounou, baleu ai si Simon sipuoni si Petrus murauma ka lalep nene.

¹⁹ Ai pei le ipaatu si Petrus pagalaiat siitcot matania, kuanangan ka matania Ketsat, “Ai telu taimanteu sigaba ekeu.

²⁰ Suruake ekeu nutugorosot, kenan sambamui, bui imakarat bagam, aku le aikoiniake sia.”

²¹ Tugorosotnangan si Petrus ka epe kuanangan ka matada taimanteu, “Aikoi aku gabaetmui. Amoian koi kam?”

²² Kuarangan, “Si Kornelius kapiten saladdu, sara sirimanua simaroipo paatuat, simaloto ka Taikamanua samba simaeru katuareman ka sangamberi bangsa Jahudi, aisilo patonekat malaika sipunenan bule isogai ekeu ka lalepnia samba iarep tiboiet sibara kekeu.”

²³ Ia geti kuanangan ratuguru samba rapugogoi sedda. Pato suru nia, tutnangan sia, samba piga pa sasaraina ka laggai Joppe masipaalei nia.

²⁴ Pato minca sege sia ka Kaisarea. Aingengenaake sia si Kornelius, airuruakean saeppunia samba sasuruaknia.

²⁵ Kele aituguru si Petrus, roroinangan nia si Kornelius, purekkuknangan murappo ka matania.

²⁶ Tapoi aisuruake le nia si Petrus, kuanangan, “Suruake ekeu, sirimanua le aku.”

²⁷ Aipatitiboake si Kornelius guru si Petrus, itconangan maigi sirimanua siparururu.

²⁸ Kuanangan ka matada, “Anuagaian kam bulat takeikei ka tai Jahudi paalei ka bangsa bagei ele tuguru ele mei ka lalepda. Tapoi aipatoilaan Taikamanua kaku, ta momoi kukua sara sirimanua sikatai ele simalolit.

²⁹ Ia te lulunia ta akukera tubuku moi kele anusogai aku. Oto kunounou kam, aponia lulunia anusogai kam aku se?”

³⁰ Kuanangan si Kornelius, “Epat ngagogoi situsasabau, ka tetere kele nene, bobo telu kasoibokat, amanindou aku ka lalepku. Sinulut rio sara sirimanua ka mataku, sipuleleppei simalatsat,

³¹ kuanangan, ‘Kornelius, aiarepingan panindogatnu Taikamanua samba anggainu airepdepman.

³² Oto koiniake sieei ka Joppe manogai si Simon sipuoni leu si Petrus; ai nia murauma ka lalep Simon tukang kulit, sikuddu ka bebet koat.’

³³ Koiniakekungan tebai sia rasogai ekeu, samba ka erut bagam amoian ekeu. Oto kineneiget amatarekngan kai sangamberimai ka matat Taikamanua masiarepmake sangamberi sitoneakenen Taikamanua kekeu.”

Ngantoman Petrus

³⁴ Lepa panibonangan si Petrus kuanangan, “Bulat akuseseakean, ta irarasei sirimanua Taikamanua.

³⁵ Senen sirimanua le ka senen bangsa sirepdep loto ka tubunia samba sigalai simaroipo nia te obaketnia.

³⁶ Anuagaian kam tiboiet sinegeakenennia ka tatogat Israel, ia te Katuareman Simaeru pagalaiat aban kalulut Jesus Kristus, ia te Tuhanda sangamberi sirimanua.

³⁷ Anuagaian kam sibabara ka sangalio Judea, barania ka Galilea, pasat pasiraukat singantomanakenen Johannes,

³⁸ ia te pagalaiat Jesus tai Natsaret, kipa aitulaji nia Taikamanua Ketsat Sipunenan samba gege. Mugejek nia masigalai simaeru samba masialeake sangamberi pinasaileu Sanitu, ipaalei poi nia Taikamanua.

³⁹ Kai te sipasimumuneng sangamberi sigalainia ka laggai Judea samba ka Jerusalem; lepa mateiakerangan nia sipattaakenen ka loina siliktenga.

⁴⁰ Tapoi ka gogoi sikatelunia suruakenangan nia Taikamanua samba ikau ipatoila tubunia,

⁴¹ ta ka sangamberi sirimanua, tapoi ka sipasimumuneng le sipilit Taikamanua kirenangan, ia te kai sipakomake nia samba sipaloake nia, lepa aitusuru ka simamatei.

⁴² Ia geti koiniakenangan kai masipaarep samba masimunengake ka sangamberi bangsa, nia le airioake Taikamanua bailiu Sipasiukum ka sangamberi sipuririmanua samba simamatei.

⁴³ Pagalaiat nia te aramunengake tai nabi: Senen simatonem baga ka tubunia, isilo katuappekat jo kalulut oninia.”

⁴⁴ Aititiboi tiboiet nene si Petrus sopsopnangan Ketsat Sipunenan sangamberida sipasiaarep tiboiet nene.

⁴⁵ Makiseinangan ka bagada sangamberi simatonem baga sibara ka tai Jahudi sipaalei si Petrus, araitco uuruakena Ketsat Sipunenan Taikamanua ka tubuda bangsa bagei,

⁴⁶ araarep poi rapanibo ka sene ngamata nganga samba raumunake Taikamanua. Lepa kuanangan si Petrus,

⁴⁷ “Ai pei le siooi masikeraake turau sia oinan tainene, sisilo Ketsat Sipunenan keleu sita?”

⁴⁸ Ia geti kuanangan iturau sia ka onin Jesus Kristus. Lepa tiddourangan kai Petrus, bule ikuddu pei le ka sia piga ngagogoi pa.