Pugap. 1 - BUKO SIPUNENAN

Palelengan kaoijanan Ketsat Sipunenan

¹ Teopilus tuan sabeu, Ka bukoku siboiki akutiboian sangamberi sigalai Jesus samba ngantomannia barania ka panandaatnia,

² teret ka gogoi katusakaiatnia ka sorga, lepa aikau surukatnia ka geget Ketsat Sipunenan ka tubuda tai apostel sipilinia.

³ Lepa aiorik pangoringan, pakoinongnangan tubunia ka matada, samba maigi katuaggaiat aipatoila masibulatnake puririmanuania. Epat pulu ngagogoi ujunia aipatoila tubunia ka matada samba masitiboi pagalaiat Purimataat Taikamanua.

⁴ Kele araparuru sambada paneineinangan sia, “Bui nukaddiuake kam Jerusalem, tapoi ngena le kam sedda sinibalaakenen Ukkui, ia te sikuaku ka matamui.

⁵ Aipoi kai Johannes oinan le aikau masirau, tapoi kam geti Ketsat Sipunenan le turarau kam; taan mauuju gogoinia.”

Katusakaiat Jesus ka sorga

⁶ Ia geti nounourangan nia siparururu sedda kuarangan, “Tuhan, ia ne teterenia nurioake minca purimataatda tai Israel?”

⁷ Kuanangan ka matada, “Ta puukuketmui masiagai tetere samba gogoinia siteuakenen Ukkui siripot gegenia.

⁸ Tapoi nusisilo le kam ron, ke amoian Ketsat Sipunenan isopsop ka tubumui, bailiunangan kam simunengake aku ka Jerusalem samba ka sangalio Judea samba Samaria pat aili ka tutut polak.”

⁹ Lepa aitiboi nene tuakkatnangan ka matada, tabbonangan nia tanairusa, agou ka matada.

¹⁰ Airateteila manua katusakaiatnia, tulut rio ka bebera rua taimanteu sipuleleppei simabulau

¹¹ sipasikukua, “Kam tai Galilea, muririo kodda kam masiteila manua? Jesus nene, siala ka tubumui tusakai ka sorga, momoi le nia minca keleu siitcomui nia tusakai ka sorga.”

Sipasiului silit Judas

¹² Lepa toili sia sipasiului ka Jerusalem barada ka leleu sipuoni leleu Tula, simalegere ka Jerusalem; sioi tuenungi gogoi Sabat reunannia.

¹³ Sege sia, ei sia ka bilik ka pata kudduatda simareirei. Sia nene ia te si Petrus, si Johannes, si Jakobus samba si Andreas, si Pilipus samba si Tomas, Bartolomeus samba si Mateus, si Jakobus togat Alpeus, si Simon Selotes samba si Judas togat Jakobus.

¹⁴ Sia sangamberida amusarangan paatuatda manindou sambada tainanalep samba si Maria inan Jesus, samba sasarainan Jesus.

¹⁵ Ka sara gogoi purionangan si Petrus ka talagada sasaraina – ai sangotu rua pulu igida siparururu sedda – kuanangan,

¹⁶ “Ale sasaraina, ta moi ta ipuaili siniboi Surat Sipunenan sinibalaakenen Ketsat Sipunenan ka ngangan David pagalaiat si Judas, sibailiu utera sipasilalaba Jesus.

¹⁷ Atuaddeakean poi nia ka tubuta, aisiloan galajet pasikelat nene sambata.”

¹⁸ Si Judas nene aisakingan sangamata mone upat jonia, lepa bele nia sitululukke, pukpuknangan balugunia, marugutnangan tinanainia.

¹⁹ Sangamberi sikuddu ka Jerusalem le masiagai nene, ia te araoniake mone nenda ka nganganda Akeldama, tibonannia “Polak Logau”.

²⁰ “Atusuratnakean poi ka buko Psalmen kise, ‘Buita imatangeu lalepnia; bui ibara sikudduji nia.’ Atusurat leu et, ‘Sabageian le isisilo pasikelatnia.’

²¹ Oto buita ibara sara silinia aleimai, ia te sibara ka talagat sirimanua sipaalei kai sanganantania ai pei le Tuhan Jesus masipaalei sita,

²² barania ka pasiraukat Johannes teret ka gogoi aituakkatnake nia ka sorga masikaddiuake sita, ibailiu nia sipasimumuneng sambamai pagalaiat katusuruatnia.”

²³ Lepa rioakerangan rua sia, ia te si Josep sipuoni si Barsabas, oniakenenda leu Justus samba si Matias.

²⁴ Ia geti panindourangan kise, “Tuhan, ekeu le siagai paatuat sirimanua. Bule nusausau ka sirua nene kasei anupili

²⁵ masisilo galajet pasikelat, samba puaapostel sikaddiuakenen Judas situtuitui mei ka kudduatnia.”

²⁶ Lepa kaurangan ka tubuda surat kauktungan, kereknangan si Matias; lepa addeakerangan nia ka tai apostel sipulusara.