PSALMEN 148 - BUKO SIPUNENAN

Manua samba polak, umun kam si Tuhan

¹ Haleluya! Umun kam si Tuhan sibara ka manua, umun kam Nia ka kudduat simabuak!

² Umun kam Nia, ale sangamberi samalaikaNia umun kam Nia, ale sangamberi saladduNia!

³ Umun kam Nia, ale sulu samba laggo, umun kam Nia, ale sangamberi panyanyat simatoro!

⁴ Umun kam Nia, ale manua sisaliu sangamberi manua, ale oinan ka uddut manua!

⁵ Eddangannia sangamberinia masiumun onin Tuhan, aipoi Nia le sikau parenta, bailiu sangamberinia bara.

⁶ Nia simariuriu masirioake sangamberinia samba teret buruburu, samba masironake sitaioi tupasabau.

⁷ Umun kam si Tuhan sibara ka polak, ale sangamberi ulou bulat sabeu samba sangamberi ngaliu koat

⁸ ale obengan samba urat simakope leppet, tanai rusa samba kujuk, rusa talabari sigalaiake tiboietNia;

⁹ ale sangamberi leleu samba sangamberi tinambu, loinat buat kaju samba loinat pinilok:

¹⁰ ale sangamberi tarimeu simalia samba sangamberi tarimeu, sipungongoingoi samba paumauma sipukakappo;

¹¹ ale tai rimata ka polak samba sangamberi bangsa, sangamberi siabeu tiboi tubu samba sangamberi siuteake' polak:

¹² ale tailainge samba taiokko, saukkui samba sibau tubu!

¹³ Eddangannia sangamberitda masiumun si Tuhan, aipoi sarat oniNia le simabuak simalatsat, puaabeuNia sisaliu polak samba manua.

¹⁴ Ai buakngakean ban puroron paamianNia, bailiu urai pasiumun ka sangamberi sirimanua ka nuntuat bagaNia, ka tai Israel, paamian simalegre katubuNia!