PSALMEN 108 - BUKO SIPUNENAN

Panindogat masitiddou kamanangan

¹ Urai. Psalmen David.

² Patuatku matarek, ale Taikamanua, Kuoba muurai, kuoba masiuraiake urai pasiumun. Tusurungan, ale ketsatku,

³ tusurungan, ale gambus samba kecapi, kuoba masisuruake pato simansep.

⁴ Kuoba musura katubum katalagat sangamberi bangsa, ale Tuhan, samba kuoba muurai katubum katalagat sangamberi suku bangsa;

⁵ kalulut malio peile riuriu katet bagam bele peile liot manua, samba riuiru topitNu siali sangamberi tanai rusa.

⁶ Patoilaan puaabeuNu ka manua, ale Taikamanua, samba pulatsananNu ka sangaliot polak.

⁷ Bule rabela sangamberi sirimanua pununtukietNu baga, arauakean pasamba kabeiNu sikattoet samba alegingan aku!

⁸ Amanibongan Taikamanua ka kudduat sipunenanNia: “Kabagat gerei pasaggangan Kurubeiake le geti Sikhem, samba Kukireki le geti engleu Sukot.

⁹ BakkatKu le Gilead, bakkat le Manasye, Efraim iate pukuneman utekKu Jehuda iate tutura purimataatKu,

¹⁰ Moab iate kudduat pasibuiatKu, katubut Edom Kuribbaiake tarangaiKu, samba kalulut Filistea mugora baga le Aku.”

¹¹ Kasei masiambit aku ka laggai simaron? Kasei masipalululu aku ka Edom?

¹² Ta pa Ekeu le, ale Taikamanua, siribbaiake kai? Ta amoi ekeu, ale Taikamanua, pasamba mungkuat saladdumai.

¹³ Ake le paroman kakai kusaggangi kai saggakmai, kalulut siboboi le pasiaraugat sibara ka sirimanua.

¹⁴ Pasamba Taikamanua tagalai le geti galaiakenen simakope gege, kalulut Nia le geti masipapeperaki sangamberi saggakta.