Plp. 3 - BUKO SIPUNENAN

Puroipoat sipulelelek

¹ Pasilepania ale sasarainangku, kau imaangka bagamui ka bagat Tuhan. Ta maoru kaku masisuratnake minca pagalaiat nene ka kam samba masironake kam.

² Pagaba kam tubumui ka jojo, pagaba kam tubumui ka sipugagalai sikatai, pagaba kam tubumui ka sioba masisunat akkula.

³ Aipoi sita le sipususunat sipulelelek, sipanindogi Taikamanua ka bagat Ketsat samba sipuaangka baga ka bagat Kristus Jesus samba sitaikatonemi ka galaiakenen simatotoila ka uddut.

⁴ Kenanen kaku leu ai lulunia kukatonemi pagalaiat puakkulakat. Ke ai sabagei sikatonemi ka pagalaiat puakkulakat, sara pei kaku:

⁵ tusunat ka gogoi sikabalunia, sibara ka bangsa Israel, ka muntogat Benyamin, tai Ibrani sipulelelek. Ka pagalaiat pususurukat aku tai Parise;

⁶ kopet tuturuku, kukurukungan paamian; pagalaiat puroroipo masitutnake Surukat ta anai simagulai kaku.

⁷ Tapoi apa sibailiu puuktungan kaku siburu, kineneiget kuaddeake nia rugi kalulut Kristus.

⁸ Purugiatnan le kuaddeake sangamberinia, kalulut pasiaagai Kristus Jesus Tuhanku pei le malainge ka sangamberinia. Kalulut nia poi galakngakekungan sangamberinia nenda samba kuaddeake nia pora, bule kupuuktungi Kristus,

⁹ samba kukuddu ka tubunia, ta kalulut puroipoatku kalulut pasirereddet Surukat, tapoi ka puroipoat kalulut tonem baga ka Kristus le, ia te puroipoat sipanguruatnakenen Taikamanua kalulut tonem baga.

¹⁰ Kiddiet bagaku ia te masiagai nia samba geget katusuruatnia samba musara ka pangoringannia, bailiu makere aku ka bagat kamateiatnia,

¹¹ bule ka kalepakatnia aku leu tusuru ka simamatei.

Pabalau masiailiake ailiakenen

¹² Ta leu te kalelepana akuala nia ele kasusun eruku, kukuruakeku le nia, baleu moi leu kuala nia kalulut aku poi aialaan Kristus Jesus.

¹³ Ale sasaraina, beri aku leu ta kuaaddeake akualaan, nene le sigalaiakenenku: kukalipogi sangamberi ka teiteiku, ka mata le kuamiake,

¹⁴ samba pabalau masiailiake ailiakenen, bule kusilo panguruat, ia te pasogaiat sorga sibara ka Taikamanua ka bagat Kristus Jesus.

¹⁵ Oto sita simatua pupaatuanan, kau tapaatu kam kisedda. Samba ke ai ka talagamui bagei le paatuatnia, ai leu ipoiliat nia Taikamanua ka kam.

¹⁶ Tapoi kenanen kisedda kipa teret siailita ia te taririuriuake enungietta.

¹⁷ Ului kam aku ale sasaraina, samba lelekngake kam sia sipuririmanua kele kai sibailiu uluietmui.

¹⁸ Aipoi kele simareirei kukua ka matamui, samba kineneiget kukua minca pagalu sou, maigi sia sipuririmanua sibailiu saggak siliktengan Kristus.

¹⁹ Kalepakat puririmanuanda ia te pulangokat, taikamanuanda ia te balugura, pulatsananda ia te ailada, sarat pagalaiat polak le rapaatu.

²⁰ Aipoi bakkat laggaita ka sorga le, sibara sedda leu tangena kam Sipaarau sita, Tuhan Jesus Kristus,

²¹ sipasisisili tubuta sikatai nene imakere ka tubunia simalatsat, siripot gegenia siooi masisumake sangamberinia ka tubunia.