Plp. 2 - BUKO SIPUNENAN

Nganturat bule musara samba masipaepe tubu kele Kristus

¹ Oto kalulut ka bagat Kristus ai nganturat, ai pusuibiat nuntut baga, ai pasambaat Ketsat, ai nuntut baga samba katet baga;

² kalulut nene sutnake kam angkat bagaku ka bagat nene: bule sisara paatuat kam, sara nuntut baga, sikere baga, sara ailiakenen.

³ Bui tugalai masigaba uktuk tubu ele katuumunan siboboi. Tapoi bule ka epet paatuat senemui masiaddeake sabagei pei le abeu bele pei tubumui.

⁴ Samba senemui bui sarat uktuk tubunia ipasikeli, tupaatu leu sabagei.

⁵ Kau nupupaatuat kam kele pupaatuanan Kristus:

⁶ Kenanen makere nia ka Taikamanua, ta aiaddeake pukekerenia ka Taikamanua kele uktuk keraet,

⁷ tapoi aiputata le tubunia, putubuat pagugulet le aiala bailiu makere ka sirimanua.

⁸ Samba ka bagat pusisirimanuania, aipaepean tubunia samba masireddet pat matei, bulatnia teret matei ka loina siliktenga.

⁹ Ia te lulunia aibuakngake nia simakope Taikamanua samba aipanguruatnake ka tubunia oni sisaliu sangamberi oni,

¹⁰ bule ka onin Jesus murekkuk sangamberi bokkoloda sikuddu ka sorga, ka polak samba taikabaga,

¹¹ samba sangamberi lila masibulatnake: Jesus Kristus ia te Tuhan, katulatsanan Taikamanua Ukkui.

Riuriu le pasikeli kam puaragatmui

¹² Ale sasaraina kilibet bagaku, kele kipa reddetmui sanganantania, riuriuake kam nupasikeli kam puaragatmui ka bagat loto samba geret tubu, ta sarat ka teteret ai aku ka talagamui, tapoi sara pei kineneiget ka teteret areu aku;

¹³ Taikamanua le poi sibaraake ka bagamui puooba samba ioi nugalai kam siripot teu bagania.

¹⁴ Sangamberinia galai kam si ta ngungu samba paukelat,

¹⁵ bule si ta kuat tubu kam samba si ta lolit, tatogat Taikamanua si ta loloiet ka talagat reddenan sikatai paatuat samba simapepepe nene, bule nuputoro kam ka talagada kele panyanyat ka polak nene,

¹⁶ pagalu ainuukkaake kam tiboiet purimanuaiat, katuumunanku ka gogoi Kristus, bule ta masibbu pababalauku samba ta siboboi pusaggoatku.

¹⁷ Tapoi kenanen tupiliake logauku bailiu buluakenen samba panguruat tonem bagamui, maangka le bagaku samba muangka baga pasamba kam sangamberimui.

¹⁸ Kam leu buita muangka baga, muangka baga pasamba aku.

Timoteus samba Epaproditus

¹⁹ Tapoi kukaroni ka bagat Tuhan Jesus maruei le kukoiniake si Timoteus ka kam, bule imasanang paatuatku kuarep sibabara pagalaiat kam.

²⁰ Aipoi ta anai sabagei aleiku sikere paatuat kele nia, simauku baga masipasikeli kam.

²¹ Aipoi sangamberida sarat uktuk tubuda le ragagaba, ta ka Kristus Jesus.

²² Anuagaian kam topitnia, bulat kele toga ka ukkui le iromake aku ka bagat masipasikeli Katuareman Simaeru.

²³ Nia te kukaroni koiniakenenku simaruei, akuagaian bai kipa pagalaiat pakaroku,

²⁴ tapoi ka bagat Tuhan matonem bagaku, aku leu momoi aku simaruei.

²⁵ Tapoi kupaatu maeru le kukoiniake si Epaproditus ka kam, ia te sarainangku samba aleiku mugalai samba aleiku pasaggak sikoiniakenenmui masiromake aku ka galajetku.

²⁶ Aipoi bulat airepdepman kam sangamberimui samba mareureu bagania, kalulut aarepmui pubebesinia.

²⁷ Bulatnia, amabesi nia malegere matei; tapoi makate le bagat Taikamanua ka tubunia, samba ta sarat nia, aku leu, bui ituppai minca reureu bagaku.

²⁸ Ia te imaoola bagaku kukoiniake nia, bule imaangka bagamui nuitco kam nia samba imakula kaku reureu bagaku.

²⁹ Oto silo kam nia ka bagat Tuhan ka angkat baga, samba suru kam sirimanua kele nia nene.

³⁰ Kalulut galajet Kristus ai le goiso imatei samba ibuluake engania masisutnake simagulai pei le pasikelatmui ka tubuku.