Plp. 1 - BUKO SIPUNENAN

Salam

¹ Sibara kai Paulus samba Timoteus, pagugulet Kristus Jesus, masiailiake sangamberi sipunenan ka bagat Kristus Jesus ka Pilippi, samba tai baja gareja samba sipasirorom.

² Kiliu baga samba aban sibara ka Taikamanua Ukkuita samba sibara kai Tuhan Jesus Kristus masipaalei kam.

Pusurakat samba panindogat Paulus

³ Senen kurepdep kam, sarat kukua sura ka Taikamanuangku.

⁴ Samba senen kutiddouake kam sangamberimui, sarat ka angkat baga le kupanindou,

⁵ kalulut paromanmui ka bagat masipaarep Katuareman Simaeru barania ka gogoi siboiki aili teret kineneiget.

⁶ Ka pagalaiat nene tonem le bagaku, nia sipasitataddaake galajet simaeru ka talagamui, iririuriuake ikappuluake nia teret ka gogoi Kristus Jesus.

⁷ Mateuan kupupaatuat kisedda ka tubumui sangamberimui, aipoi ai le kam ka bagat paatuatku, kalulut kam sangamberimui amurubeiatnan kam ka bagat kiliu baga sipanguruatnakenen kaku, ka teteret ai aku ka bagat penjara ele ka teteret pasialegiat samba masironake Katuareman Simaeru.

⁸ Aipoi Taikamanua le sipasimumuneng kaku kipa pasirerepdepku kam sangamberimui ka katet bagat Kristus Jesus.

⁹ Samba nene panindogatku, bule memei iuurau pei le nuntut bagamui samba puaagai samba sikut paatuat,

¹⁰ bule ioi nupili kam apa simaeru, bule numalina kam samba si ta kuat tubu aili ka gogoi Kristus,

¹¹ sun bua puroipoat, kalulut Jesus Kristus, katulatsanan samba katuumunan Taikamanua.

Pasimunengan Paulus ka bagat penjara

¹² Koba le nuagai kam nia sasaraina, sangamberi sibabara ka tubuku, aibailiuan pasiruei imakakara Katuareman Simaeru,

¹³ pat agairangan nia sangamberi sikuddu ka lalep kaisar samba sabagei, katupepenjaraku nene ia te kalulut Kristus.

¹⁴ Samba kalulut katupepenjaraku maigi sasaraina ka bagat Tuhan bara tonem bagada, memei itutuppai emenda masipaarep tiboiet Taikamanua si ta loto.

¹⁵ Kirenangan ai sabagei masipaarep Kristus kalulut tutut baga samba pajoggolat, tapoi ai leu sabagei masipaarep ka erut bagada.

¹⁶ Sia nene masipaarep sibara ka nuntut baga, raagai poi kalulut pasialegiat Katuareman Simaeru le aituake aku sene.

¹⁷ Tapoi sabagei geti masipaarep Kristus kalulut puuktungan tubu le, ta ka linat paatuat, ka bagada poi gagalaira kisedda masituppai oringenku ka bagat penjara.

¹⁸ Tapoi eddangannia, aipoi kenanen kipa pa, ele ka patajuat ele ka linat paatuat, kau le itupaarep Kristus. Ka bagat nene maangka le bagaku. Samba riuriu le angkat bagaku,

¹⁹ kuagai poi, kalepakat sangamberinia nene puaragatku le kalulut panindogatmui samba paroman Ketsat Jesus Kristus.

²⁰ Aipoi besiakenenku samba karonietku simakope ia te bui bara ailaku beri goiso, tapoi ka eme le, kele ka sanganantania kisedda leu kineneiget tupatoila latsat Kristus ka bagat tubuku, murimanua ele matei.

²¹ Aipoi kaku murimanua ia te Kristus, samba matei ia te uktuk.

²² Tapoi ke puririmanuangku ka polak bai, ia te mugalai masibaraake bua, oto apa pilietku, ta kuagai.

²³ Ruangasilania le iokkip aku: maola bagaku mei mukuddu ka Kristus – ia te bulat simaeru;

²⁴ tapoi mukuddu ka polak, ia pei le bulat besiakenen kalulut kam.

²⁵ Kalulut masikatonemi nene agaikungan, mukukuddu pei le aku kupaalei kam sangamberimui, pasituppai katuerukatmui samba angkat bagamui ka bagat tonem baga,

²⁶ bule memei itutuppai katuumunmui ka bagat Kristus kalulut aku, ke amoian aku minca ka kam.

²⁷ Sarat kau le siripot Katuareman Simaeru sibara ka Kristus puririmanuamui, bule ke moi aku itcokungan nia, ele ta moi aku arepkungan nia pagalaiat ron puririomui ka bagat sara ketsat, samba sisara paatuat masipaukeleake tonem baga sibara ka Katuareman Simaeru,

²⁸ bui raloto kam beri goiso tai saggakmui. Sangamberinia nene toggaiat pulangokat le ka sia, ka kam geti ia te toggaiat puaragat, samba sibara ka Taikamanua le nene.

²⁹ Aipoi atupanguruatnakean ka kam ta sarat mutonem baga ka Kristus, tapoi samba masiorik leu kalulut nia,

³⁰ makere kele paukeleakenen siitcomui kaku siburu, samba siarepmui kineneiget pagalaiat tubuku.