Plm. 1 - BUKO SIPUNENAN

Salam

¹ Sibara kai Paulus, siukumakenen kalulut Kristus Jesus samba sibara kai Timoteus sarainanta, masiailiake Pilemon kilibet baga samba aleimai ka galajet

² samba kai Appia maniuta samba kai Arkhipus, aleita ka bagat pasaggangan samba ka sapaamian ka lalepnu:

³ Kiliu baga le ka kam samba aban sibara ka Taikamanua, Ukkuita samba sibara kai Tuhan Jesus Kristus masipaalei kam.

Pusurakat kalulut nuntut baga samba tonem bagat Pilemon

⁴ Sarat kusuraki le Taikamanuangku, senen kurepdep ekeu ka panindogatku,

⁵ akuarep poi nuntut bagam ka tubuda sia sipunenan samba tonem bagam kai Tuhan Jesus.

⁶ Panindogatku, bule pasambaatnu ka bagat tonem baga bailiu masibaraake puaagai ka simaeru ka talagata ka bagat Kristus.

⁷ Bulat abeu angkat bagaku samba pusuibiat kalulut nuntut bagam, lulut anukulaake bagada sipunenan, ale saraina.

Panindogat Paulus pagalaiat si Onesimus

⁸ Ia te lulunia, kenanen ka bagat Kristus bulat maeme aku masitoneake kekeu simateu galaiakenennu,

⁹ tapoi kalulut nuntut baga, maeru pei le kutiddou nia ka tubum. Aku nene, Paulus, simabaja, ai pei bagei kineneiget tupenjaraake kalulut Kristus Jesus,

¹⁰ kutiddou kekeu pagalaiat togaku sinutuakenenku ka bagat penjara, ia te si Onesimus.

¹¹ Siburu ta anai kaunu nia, kineneiget geti abeu kaunu nia samba kauku nia.

¹² Kukoiniake nia minca kekeu – nia, ia te kanuntuat bagaku –.

¹³ Siobaku le bai nia kuddu le nia ka tubuku, bule ipasikeli aku punu tubum burut katupepenjaraku kalulut Katuareman Simaeru,

¹⁴ tapoi ke ta teu bagam, ta koba kugalai apa pa, bui kele sipaksa le nugalai simaeru, ka teu baga le.

¹⁵ Baleu ia pa lulunia aitusaraake nia goiso ka tubum, bule nusilo nia teret buruburu,

¹⁶ taan kele pagugulet, tapoi saliu pei le pagugulet, kele saraina kilibet bagangan le, kaku mauktukngan aku, sara pei kekeu, ka pusirimanuaat samba leu ka bagat Tuhan.

¹⁷ Oto ke nuaddeake aku aleinu sikere tonem baga, oto silo nia kele aku.

¹⁸ Samba ke ai apa pa selenia ele utaknia ka tubum, kaku le addeake sangamberinia!

¹⁹ Aku, Paulus, masibulatnake nia ka surat sinurat kabeiku: Ai leu kubaya nia. (Puutaknu ka tubuku geti, ia te tubum, taan leu kukukua.)

²⁰ Ale saraina, eddangan kupuuktungi sibara kekeu ka bagat Tuhan: Kulaake bagaku ka bagat Kristus!

²¹ Tonem bagaku ka reddetnu, ia te akusuratnake surat nene kekeu, kuagai poi saliu pei le sikuaku nene nugagalaiake.

²² Ka bagat nene tarekngake pugogoiatku; kukaroni poi kalulut panindogatmui tutotoiliake aku ka kam.

Salam

²³ Sege salam Epapras kekeu, aleiku sangapenjara kalulut Kristus Jesus,

²⁴ samba sibara kai Markus, Aristarkhus, Demas, Lukas, aleiku sangagalajet.

²⁵ Kiliu bagat Tuhan Jesus Kristus masipaalei ketsatmui!