Pas. 9 - BUKO SIPUNENAN

Abimelekh

¹ Ka sara gogoi ei si Abimelekh togat Gideon ka laggai Sikhem kudduatdra saepput inania. Sedda panibonangan katubutda, kuanangannia,

² “Kua pei katubutda sangamberi sipulalaggai ka Sikhem, kaipa bulat maeru: raparentaake si pitu pulu tatogat Gideon, ele sara le sia lepa? Parepdep kam sia leu et aipoi ai tipput tubukku katubutda.”

³ Iageti ei sia saepput ka muntogat inan Abimelekh nenda katubutda sia tai Sikhem masisegeake patonekat Abimelekh katubutda. Oto sipulalaggai ka Sikhem nenda masiteuake masitut si Abimelekh, aipoi arapaatu poi aipeile patabbarat tubutda.

⁴ Lepa geti kaurangan ka tubunia pitu pulu bulagat perak sialara sibara ka uma pasibuluat Baal-Berit. Oto bulagat nenda te aiupaiji si Abimelekh sangamungkuat sirimanua sitaiagai arat addeat rapatadde pasambania.

⁵ Lepa ei sia ka laggai ukkuinia ka Ofra. Sedda mateiakenangan pitu pulu sasarainania nenda ka uddut sara bukku. Tapoi si Jotam, togat Gideon sisuleket ta atumateiakenia ka sia kalulut amulipput le nia.

⁶ Oto parururangan sangamberi sipulalaggai ka Sikhem samba ka Bet-Milo, lepa ei sia ka be'bet loinat sokut ka tugu ka Sikhem. Sedda rioakerangan si Abimelekh ibailiunia rimata.

⁷ Kele aiarepnia si Jotam pagalaiat nenda, ei nia murio ka uddut leleu Gerizim, iageti pugereinangan ka ipora sirimanua nenda, “Arepmake kam aku, ale tai Sikhem, bule Taikamanua leu et masiarepi kam!

⁸ Ai sara sipuaaili parururangan sangamberi loina bule rapili rimatadra. Iageti kuarangan ka loinat zaitun, “Ekeuan le rimatamai.”

⁹ Aleginangan loinat zaitun, “Ah, ta kuoba, aipoi ke ibailiu aku rimatamui, buita muari aku masibarake tulat zaitun pakeiet masiabeuake sabulungan samba sirimanua.”

¹⁰ Iageti kuarangan sangamberi loina nenda ka loinat sileu, “Ekeuan te ibailiu rimatamai.”

¹¹ Tapoi aleginangan loinat sileu, “Ta' kuoba, aipoi ibailiu rimatamui buita muari aku masibaraake buat sileu simananam.”

¹² Kele ailepa nenda, sangamberi loina masikua ka tubut loinat anggur, “Nah, ekeuan te ibailiu rimatamai.”

¹³ Tapoi aleginangannia loinat anggur, “Kipa ioi kupuari masibarake suat anggur siangkaake bagat sabulungan samba sirimanua, kalulut addeat ibailiu rimatamui!”

¹⁴ Kalulut nenda paniborangan sangamberi loina ka tubut parou simarui, ‘Ekeuan te ibailiu rimatamai.’

¹⁵ Aleginangan parou simarui nenda, ‘Ke sibulatnia obamuinia masibailiuake aku rimatamui, konan kam mukunem ka teiku. Ke ta nuoba kam, oto ka sangamberi ratku simarui nene te geti ibela obengan masilabo isappru sangamberi loinat aras ka Libanon.’ ”

¹⁶ Riuriuakenangan ipanibo si Jotam kuanangan, “Oto pasiuudetnake si Abimelekh ibailiunia rimata pa, anugalai kam simaerut? Anugalaiakean leu kam bulat simateu ka tubut Gideon, ukkuiku samba ka saeppunia? Anusiliakean leu kam simaeru sigalai ukkukku

¹⁷ sipasasaggak addeatmui? Repdep kam, Aibuluakean engania masibelaake kam ka kupkumenda tai Midian.

¹⁸ Tapoi kineneiget anupujongan kam saeppu samba tatogat ukkuiku. Sangamberi tatogania anupamateian kam, sangamateijat pitu pulu sia ka uddut sara bukku. Si Abimelekh iate togat ukkuiku ka paguguletnia le. Tapoi rioakemuiannia ibailiu rimata Sikhem, sarat kalulut kababarania pei le tuppai tubumui.

¹⁹ Ke sigalaiakenenmui ka tubut ukkuiku, ka saeppu samba ka tatogania gogoi nene maroipo samba ka linat paatuat, kauan nupuangka kam baga pasamba si Abimelekh, samba nia leu et kau imangka bagania pasamba kam.

²⁰ Tapoi ke ta kisedda, eddangan ibela obengan sibara ka tubut Abimelekh masilabo isappru sipulalaggai ka Sikhem samba leu ka Bet-Milo leu et bela obengan masilabo isappru si Abimelekh.”

²¹ Lepa nenda putuituinangan si Jotam iageti kuddunia ka Beer, kalulut lotonia kai Abimelekh, sarainania.

²² Telu ngarura burunia iparenta Israel si Abimelekh.

²³ Lepa baraakenangan si Tuhan pakataikatda sia rubeiat Abimelekh samba tai Sikhem bailiu saggangirangannia.

²⁴ Aipuaili pagalaiat nene bule itusiliake katainia si Abimelekh samba tai Sikhem situbbuinia masimateiake si pitu pulu tatogat Gideon.

²⁵ Sia tai Sikhem nenda masipagalak sirimanua sipasigegetaake ka uddut leleu addeat masilaba si Abimelekh. Senen sirimanua situsasabau sedda rauraurangan sia sipasigegetaake nenda. Oto pagalaiat nenda segeakerangannia kai Abimelekh.

²⁶ Kateteret nenda si Gaal togat Ebed amoian sia simakere pasamba sasarainania addeat mulaggai ka Sikhem; samba sia tai Sikhem matonem bagadra ka tubunia.

²⁷ Ei sia masiappek anggur ka monen anggur, lepa galairangan lo' anggur, samba galairangan punen. Mukom samba pulorangan ka kudduat pasibuluijiat sabulungandra samba ai leu rapasusuppa si Abimelekh.

²⁸ “Kasei nenda si Abimelekh samba kasei sita tai Sikhem, iageti sita bailiu paguguletnia?” ngangan Gaal. Ta' pa' togat Gideon-nia samba wakilnia si Zebul aibailiuan pagugulet Hemor, ukkui Sikhem, taikebbukatta!” Oto kipangan le aibailiu sita paguguletnia?”

²⁹ “Ke aku masiute tai Sikhem nene, bulat ta an nanai tiboi tubut Abimelekh nenda! Kukukua ka tubunia, “Kauan konan! Abbit saladrum samba konan tapasaggak!” ”

³⁰ Pugolunangan si Zebul, siuteake laggai Sikhem, kateteret aiarep tiboiet Gaal nenda.

³¹ Koiniakenangan punutubunia ka tubut Abimelekh ka Aruma addeat masisegeake patonekat nene, “Si Gaal togat Ebed pasamba sasarainania amoian sambatda sia ka Sikhem samba masitubbui sipulalaggai ka Sikhem bule ralawan ekeu.

³² Kalulut nenda ekeu samba sirimanua simigi sipaalei ekeu buita mei kam mulipput ka mone kateteret sinoibo.

³³ Mancep simancep kateteret ibela sulu, saggangimuian laggai nenda sige'ge'. Samba ke bela si Gaal pasamba sirimanua sipaaleinia masilawan ekeu, nenda te teterem nusagganginia!”

³⁴ Iageti si Abimelekh pasamba sangamberi sirimanua simigi sipaaleinia tuitui sia kateteret sinoibo. Rubeirangan tubudra bailiu epat ngarubeiat iageti ei sia mulipput sibokko laggai Sikhem.

³⁵ Kateteret araitco si Gaal samba murio ka matatbaliu laggai, ta amauju si Abimelekh samba sangamberi sirimanua sipaaleinia bela sia sangamberidra ka kudduat pulippunandra.

³⁶ Itconangan sia si Gaal, lepa kuanangan ka tubut Zebul, “Itco! Ai sirimanua tugogorosot senen sibara ka uddut leleu!” Aleginangan si Zebul, “Ah, nenda ta sirimanua, nenda ailiggou ka leleu le.”

³⁷ Lepa kuanangan minca si Gaal, “Bulatnia, ai sirimanua tugogorosot sibara ka gilak leleu, samba sangamungkuat leu airaailiake baratda ka ipot loinat terpentin ka tugu!”

³⁸ Kuanangan si Zebul kai Gaal, “Nah, kineneiget kaipangan ngamangnu manibo nenda? Siboiki anukua, apangan le tarereddet ngangan Abimelekh nenda? Nene te sirimanua sipaloloinu nenda. Kauan belaake ekeu kineneiget saggangi sia!”

³⁹ Lepa abbitnangan si Gaal ka gerat tai Sikhem samba masilawan si Abimelekh.

⁴⁰ Tapoi si Abimelekh masisagganginia pat putuituinangan.

⁴¹ Kalepakatnia toili si Abimelekh ka Aruma, samba kuddunia sedda. Tuituiakenangan si Gaal pasamba sasarainania si Zebul rabela ka Sikhem, bailiunangan ta momoi rapulaggai sedda minca.

⁴² Pato'nia le sia tai Sikhem taddarangan masikaddiuake laggai raei ka mone samba pagalaiat nenda segeakerangannia kai Abimelekh.

⁴³ Iageti ruruakenangan sirimanua sipaaleinia si Abimelekh, samba rubeinangan sia bailiu telu ngamungkuat saladdu, lepa ei sia mulipput ka mone. Kateteret iitco sipulalaggai ka laggai nenda masiailiake mone, belania ka pulippunannia lepa mateiakenangansia.

⁴⁴ Oto ka sia si Abimelekh samba sirimanua sipaaleinia bela sia simaola masisaggangi ka matatbaliu laggai, rua mungkuat saladdu bagei masikukuru samba masimateiake sirimanua situtuitui ka mone.

⁴⁵ Riuriuakenangan pasaggak sangagogoi nenda si Abimelekh samba alanangan laggai nenda, mateiakenangan sipulalaggai sedda, lepa pakatainangan laggai nenda samba pakarapnangan garam.

⁴⁶ Kele araarepnia sirimanua sikukuddu ka bagat irip laggai Sikhem pagalaiat sibabara nenda, ei sia ka bagat lobok ka tei uma El-Berit mulipput.

⁴⁷ Lepa geti segeakerangannia kai Abimelekh aipoi sia sirimanua ka irip laggai Sikhem nenda aparuruan sia sedda.

⁴⁸ Kalulut nenda, si Abimelekh samba sirimanua sipaaleinia ei sia ka leleu Zalmon. Sedda tippunangan ran loina pasamba kampak, kaurangan ka ta'ta ran loina nenda masibairat, lepa geti koiniakenangan sirimanua sipaaleinia leu et ragalai simaola kele sigalaiakenennia.

⁴⁹ Iageti sene-senendra masitippu ran loina, lepa puenungrangan masitut si Abimelekh. Sangamberi ran loina nenda ruruakerangannia ka matat lobok kuil nenda, lepa laborangannia, oto sia tai Sikhem nenda aipeile sia ka bagania, Kalulut nenda, matei sia sangamberi sipulalaggai ka Sikhem nenda, ke' tuadde iaili sangaribu taimanteu samba tainanalep.

⁵⁰ Kele ailepa nenda ei nia ka Tebes si Abimelekh. Goiliknangan laggai nenda alanangannia.

⁵¹ Katalagat laggai nenda ai sara pujagoat simabuak simaron. Oto sangamberi sipulalaggai ka laggai nenda ei sia sedda. Guru' sia ka bagat pujagoat nenda samba kuksikrangan matatbaliu, lepa sakai sia ka pata.

⁵² Lepa geti oi si Abimelekh sedda addeat masisaggangi pujagoat nenda. Kele aisege ka matat baliu pujagoat nenda samba bule ilabonia,

⁵³ sara sinanalep masibeleake sara bukku pasigulunan ka ute'nia bailiu maragatnangan ute'nia.

⁵⁴ Olaakenangan si Abimelekh masisogai silainge sipasibabairat pamateinia samba kuanangan, “Golok lanjaunu samba mateiake aku, ta koba rakuania sirimanua aipoi aimateiake aku sara sinanalep.” Oto silainge nenda pununangannia pat matei.

⁵⁵ Kele araitconia tai Israel aipoi si Abimelekh amateian, sangamberidra toili sia.

⁵⁶ Kisedda te enungan Taikamanua aisiliake pukakatai sigakalaiakenen Abimelekh ka ukkuinia, kateteret aimateiake pitu pulu sasarainania.

⁵⁷ Samba si Tuhan masiukum leu et sia tai Sikhem kalulut kataira. Pagalaiat nenda maipo kele sikuania si Jotam togat Gideon pagalaiat sia kateteret aisuppaake sia.