Pas. 8 - BUKO SIPUNENAN

Katukalaatda tai Midian

¹ Kuarangan tai Efraim ka tubut Gideon, “Kipa galainia ta anuna'na' kai kateteret anutuitui anuei masisaggangi tai Midian? Apa lulunia anugalaiake kisedda ka tubumai?” Kisedda belet bagatda katubut si Gideon.

² Tapoi aleginangan si Gideon, “Apa sigalaiakenenku ta leu makope beunan katukolobatnia ke' tupakireakenia ka sigalaiakenenmui. Kenanen goiso le sigalaiakenenmui, tapoi nia peile abeu katukolobat bele pei sangamberi sigalaiakenendra saladdu ka muntogatku.

³ Kam le aisese gege sibara ka Taikamanua bailiu oinangan numateiake kam si Oreb samba si Zeeb, rua sikebbukat ka Midian nenda! Tapakirenia ka nenda, apa le simaeru sigalaiku?” Kele ailepa aikua kisedda si Gideon, ta an amugolu sia minca.

⁴ Kateteret nenda si Gideon samba si telu ngotu sirimanua sipaaleinia sege sia ka silat bagat oinan Jordan. Amakopeat saggotdra tapoi ai peile raririuriuake masikukru tai saggak.

⁵ Lepa geti sege sia ka Sukot. Sedda kuanangan si Gideon katubutda sipulalaggai, “Ropmake kam nukau kam goiso komen katubutda. Amakopet saggotdra samba aipeile kai masikukukru si Zebah samba si Salmuna, rimatadra tai Midian.”

⁶ Tapoi sia sikebbukatnia ka Sukot nenda masialegi, “Ah, ta'pei amoi anulaba kam si Zebah samba si Salmuna, anutiddouan kam komen! Angoian le tukakau komenda sipaalei ekeu?”

⁷ Oto kuanangan si Gideon, “Maeru leu! Ke aiakean ka tubuku kamanangan si Tuhan kusaggangi kai Zebah samba kai Salmuna rabakngakekungan te geti ka tubumui rui sibara ka polak simangai!”

⁸ Lepa geti riuriuakenangan puenunganannia si Gideon segenia ka Pnuel. Sedda leu et tiddounangan komenda sipaaleiakenia. Tapoi alegiatdra tai Pnuel makere le alegiatdra tai Sukot.

⁹ Oto kalulut nenda kuanangan katubutda si Gideon, “Ke toili aku simaarau, oto ibuakekungan te geti menara laggai nene!”

¹⁰ Ujunia nenda si Zebah samba si Salmuna pasamba sangamberi saladdutda ai sia ka Karkor. Ka sangamberi saladdu sibara ka belayat sulu, pulu lima ngaribu le sia amulegei samba sangotu rua pulu ngaribu sia saladdunia amatei.

¹¹ Enunginangan Si Gideon pasongan polak simangai ka isit kabelaiat sulu Nobah samba Jogbeha lepa sagganginangan tai saggak sige'ge.

¹² Si Zebah samba si Salmuna, ruadra rimata Midian nenda tuitui sia, tapoi kukrunangan sia samba labanangan sia si Gideon, bailiu sangamberi saladrudra masaragainangan.

¹³ Iageti ka puenunganan itoili barania ka pasaggangan, enunginangan enungan panatarat Heres si Gideon.

¹⁴ Sedda labanangan sara sirimanua sibau tubu sibara ka Sukot, lepa rerenangannia oninda sia sikebbukat ka Sukot. Oto sirimanua nenda masisurat sangamberi oninda nenda addeat Gideon, sangamberidra pitu pulu piti sia.

¹⁵ Kele ailepa nenda ailiakenangan sikebbukat laggai ka laggai nenda si Gideon, lepa kuanangan, “Ai peile tebai nurepdem, anukeraakeake kam masiropmake aku, kalulut ta'pei akulaba si Zebah samba si Salmuna, ele” Ta' noba kam masikau komen katubutda sipaaleiake aku, aipoi kateteret nenda bulat amasaggongan sia. Itco kam, aikoinia si Zebah samba si Salmuna.”

¹⁶ Kele ailepa nenda alanangan rui samba te'teket simarui sibara ka polak simangai, lepa pabo'bokinangan sikebbukat laggai Sukot nenda.

¹⁷ Ka Pnuel leu et ibuakenangan menara samba mateiakenangan sangamberi sirimanua taimanteu ka laggai nenda.

¹⁸ Kele ailepa nenda parerenangan si Gideon ka tubut Zebah samba Salmuna, “Kipa putubuatdra sirimanua simateiakenenmui ka Tabor nenda?” Si Zebah samba Salmuna masialegi, “Sangamberidra kele makere ekeu, kele tatogadra tai rimata.”

¹⁹ Lepa kuanangan si Gideon, “Sangamberidra nenda sasarainangku, tatogat inangku. Ke ta numateiake kam sia, ka onin Tuhan sipuririmanua, ta leu te kumamateiake kam.”

²⁰ Lepa kuanangan ka tubut Jeter, togania si Gideon sikebbukat, “Mateiake sia!” Tapoi si Jeter mabau peile tubunia. Oto malotonia bailiunangan ta aigolok lanjaunia masimateiake.

²¹ Kuanangan si Zebah samba si Salmuna ka tubut Gideon, “Kauan, ke simanteu ekeu, bulat kabeinu le masimateiake kai!” Iageti rio si Gideon mateiakenangan sia, lepa paalakinangan sangamberi pulaingean ka lolokkat sangamberi untadra.

²² Lepa geti paniborangan ka tubut Gideon sapaamian Israel, “Anubelaakean kai ka bagat kupkumenda tai Midian. Kalulut nenda ekeu ibailiu utemai, ekeu samba muntogatnu.”

²³ Aleginangan si Gideon, “Taa'. Aku samba tatogakku ta' ibabailiu ute'mui. Si Tuhan le ute'mui.”

²⁴ Tapoi lepa geti kuanangan minca si Gideon, “Sarat sara le tiddogetku; subang sirauraumui ka tai saggak bulat nuaake le kam sangamberinia ka tubuku.” (Tai Midian katukelatdra masipakei subang mas; maker sabagei sikuddu ka polak simangai.)

²⁵ Alegirangannia, “Kauan, ka bagat angkat baga kuake kainia katubum.” Lepa geti nga'ngaakerangan sara komak, lepa senen sirimanua oi sia samba galakngakerangan sedda subang sirauraura ka tai saggak.

²⁶ Sangamberi subang sikaura kai Gideon kateteret nenda malegre rua pulu kilogram sane'nia, ta pei leu atuadde pulaingean inu, komak simaalit baga pakeietdra tai rimata Midian samba inu sikuddu ka lolokkat untadra.

²⁷ Sibara ka mas nenda, galainangan sara tularat sabulungan si Gideon, galakngakenangannia ka desania, iate ka Ofra. Sangamberi tai Israel ei sia sedda addeat masibuluiji tularat sabulungan nenda, bailiu taipuukurangan minca Taikamanua. Samba pagalaat nenda ibaiiu kele sesere kai Gideon samba ka sangalalepnia.

²⁸ Ta' an amoi ragalai tubudra tai Midian, arakalaakean sia tai Israel. Oto maaraunangan tobbou laggai nenda epat pulu ngarura burunia, burut ipurimanua peile si Gideon.

²⁹ Kele ailepa pasaggangan nenda, toili si Gideon ka laggainia samba kuddunia sedda.

³⁰ Tatogania taimanteu pitu pulu sia, aipoi sinanalepnia maigi.

³¹ Ai leu et sinanalepnia simalipput ka Sikhem; ka sinanalepnia simalipput nene ai sara togania simanteu aikau oninia Abimelekh.

³² Kele bulat aimabaja' si Gideon togat Joas nenda iapeite tata'nia. Rateiakerangannia ka puariat Joas ukkuinia. Puariat nenda ikukuddu ka Ofra, iate laggai muntogat Abiezer.

³³ Kele aitata' si Gideon, tai Israel ta'an matopit sia minca ka tubut Tuhan. Buluijirangan sabulungan Baal samba masibailiuake Baal-Berit sabulungandra.

³⁴ Ta'an amanindou sia minca katubut Taikamanua, Tuhan dra, sibelaake sia ka kupkumen sangamberi saggak sigoilik sia.

³⁵ Samba leu et ta raagai musura baga ka keluarga Gideon ka sangamberi sigalainia simaeru ka paamian Israel.