Pas. 7 - BUKO SIPUNENAN

Si Gideon masikalaake tai Midian

¹ Ka sara gogoi si Gideon pasamba sangamberi siberikabaga sipaaleinia tusuru bulat simancep. Ailiakerangan bubuakat oinan Harod samba musapou ka be'benia. Pusapougadra tai Midian ikuddu ka isit bare sibara ka sia, ka su'su legret leleu More.

² Kuanangan kai Gideon si Tuhan, “Sirimanua simigi sipaalei ekeu makopeat le igi. Ta' kuoba masiake kamanangan ka tubudra ka tai Midian, aipoi lepa geti babara rapaatu aramamanang kalulut rondra le saradra, bailiunangan sia ta' raumunnake Aku.

³ Oto paagai le ka tubudra sirimanua simigi, ‘Kasei simaloto samba simasedde, buita' maola ikaddiuake leleu nene samba seddangan itoili ka lalepnia.’ ” Oto ai sia rua pulu rua ribu sitotoili; samba pulu ribu le' sia amulegei.

⁴ Lepa kuanangan minca kai Gideon si Tuhan, “Sirimanua sipaalei ekeu maigi peile. Abbit le sia ka bagat oinan. Sedda le geti Kupili sia addeatnu. Kebai Aku masikua ka tubum, sirimanua nene buita' mei pasamba ekeu; nia buita' mei pasamba ekeu. Tapoi kebai Aku masikua, sirimanua nene ta' momoi mei pasamba ekeu, nia ta' momoi mei pasamba ekeu.”

⁵ Iageti Abbitnangan sia si Gideon ka bagat oinan, lepa kuananagan kai Gideon si Tuhan, “Sirimanua sipasipopotpot oinan ka kabeinia kele jo'jo', buita nusaraake ka sirimanua sipulolo' sipurerekkuk.”

⁶ Oto ai telungotu sia sipasipopotpot oinan ka kabeinia; sangamberidra sabagei murekkuk le rapulo.

⁷ Lepa geti kuanangan kai Gideon si Tuhan, “Ka si telu ngotu sirimanua sipasipopotpot oinan nenda, Aku masiujaake geti kam samba masiake kamanangan ka tubumui ka tai Midian. Gugluake sabagei ratoili.”

⁸ Kalulut nenda koiniakenangan sia si Gideon sangamberi tai Israel sabagei toili sarat sia sitelu ngotungan le nenda. Sangamberi balut samba trompet alarangannia ka sia sitotoili nenda. Tai Midian ai sia ka su'su ka tei kudduatdra rapusapou tai Israel.

⁹ Soibo nenda kuanangan kai Gideon si Tuhan, “Gideon, suru! Kenan masisaggangi pusapougadra tai Midian. Aku masiake ka tubum kamanangan ka sia.

¹⁰ Tapoi ke maloto ekeu, na'na' le si Pura, paguguletnu nuei kam simakere ka pusapougadra tai saggak.

¹¹ Aileu geti nuarep aponia ratitiboi tai saggak, samba pagalaiat nenda geti sibaraake gegem masisaggangi.” Lepa ei si Gideon samba si Pura, ka pasongan pusapougadra tai saggak.

¹² Tai Midian, Amalek samba sangamberi sirimanua sabagei sibara ka polak simangai, aiparappingan sia kaipa le bara sia ka su'su nenda. Ituitco sia kele sit imungku tubunia. Sangamberi untadra bulat maigi kele igit ngai' ka be'bet koat.

¹³ Ka teteret aisege sedda si Gideon, ai sara sirimanua masititiboi pangamutetnia ka tubut aleinia, kuanangan sirimanua nenda kisene, “Amangamut aku, ai sangabaga roti situguguilu guru'nia ka pusapougatta, oto tuluinangan sara sapou. Maibunangan sapou nenda pat bailiunangan kere ka polak.”

¹⁴ Aleginangan aleinia, “Bulatnia, nene ta' anai bagei bulat lanjau Gideon togat Joas, tai Israel nenda! Katukolobatnia aikauan ka tubunia kamanangan ka sia tai Midian samba sangaliot pusapougat nene ka kabeinia.”

¹⁵ Kele aiarep si Gideon pagalaiat pangamutet sirimanua nenda samba katukolobatnia, purekkuknangan masipanindogi Taikamanua. Lepa geti toilinia ka pusapougadra tai Israel samba kuanangan, “Patarek kam tubumui! Aiakean kamanangan ka tubumui si Tuhan ka sangaliot pusapougadra tai Midian aiat ka kabeimui!”

¹⁶ Lepa rubeinangan si telungotu sirimanua sipaaleinia si Gideon ibailiu telu ngarubeiat. Ka senen sirimanua kaunangan trompet sara samba bulibuli sara ai ka bagania tutungan.

¹⁷ Kuanangan ka tubudra si Gideon, “Ke asegean aku ka pasongan pusapougadra tai Midian, lelekngake kam aku sipulelelek, samba galaiake kam apa sigalaiakenenku.

¹⁸ Kebai aku samba rubeiatku masipiau trompet, sangamberi leu et buita' masipiau trompetmui. Iageti sangamberimui buita' mugerei sigoilik pusapougat nenda. “Ka onin Tuhan samba ka onin Gidedon!”

¹⁹ Masiailiake tengamoi, si Gideon samba sirimanua ka rubeiatnia sege ka pasongan pusapougatdra tai saggak. Ka teteret nenda sirimanua sijago pusapougat nenda, simaruei le arasaili sipasijajago. Iageti si Gideon samba rubeiatnia masipiau trompet samba masiragatnake sangamberi bulibulitra.

²⁰ Kisedda leu rua ngarubeiat bagei masigalai leu et kisedda, iageti sia sangamberidra masiakkatnake tutungandra ka kabeira sikatciu, samba trompet ka kabeinia sikattoet addeat masipiau. Pugereirangan, “Lanjau ka onin Tuhan samba ka onin Gideon!”

²¹ Sangamberidra tenan le sia murio ka kudduatdra sigoilik pusapouga nenda. Oto sangamberi saladdudra tai saggak nenda pakaddonangan sia rapabalau sialei mugegerei.

²² Ka teteret airananauake trompet si Gideon samba sangamberi sirimanua sipaaleinia, galainangan si Tuhan saladrut tai saggak rapamatei pasasambadra sipakei lanjau. Pabalaurangan ka ipot Zerera sege ka reunan ka Bet-Sita samba laggai Abel-Mehola legret Tabat.

²³ Oto suku Naftali, Asyer, samba suku Manasye sia ka isit kabelaiat sulu kasedda leu et ka isit kabelekat sulu bagat oinan Jordan ai sogai leu et. Iageti kukrurangan saladdu Midian.

²⁴ Ia leu et ka sangaliot daerah simaleleu ka leleu Efraim, kaunangan katuareman pasogaiat nene si Gideon, “Konan gorosotnake kam masisaggangi tai Midian. Kudduiji kam bagat oinan Jordan samba sangamberi sapaknia sege ka reunan ka Bet-Bara. Bui' nuobaake kam tai Midian raputalipo sedda.” Oto sia tai Efraim leu et abbit, iageti kudduijirangan bagat oinan Jordan samba sangamberi sopaknia sege ka reunan Bet-Bara.

²⁵ Rua rimata Midian, iate si Oreb samba Zeeb aralaba'. Mateiakerangan si Oreb ka Bukku Oreb samba si Zeeb mateiakerangannia ka kudduat pasipionan anggur Zeeb. Sia tai Efraim nenda riuriu le rakukru tai Midian, iageti abbitrangan utet Oreb samba Zeeb ka tubut Gideon ka silat Jordan rubeiat ka belaiat sulu.