Pas. 6 - BUKO SIPUNENAN

Gideon

¹ Majorangan minca paamian Israel ka tubut Tuhan, bailiu Nia masiobaake bangsa Midian masipaoreiji sia pitu ngarura burunia.

² Tai Israel bulat maloto sia katubutda tai Midian, bailiu pulippputrangan ka bagat ngaliu samba ka kudduat bagei ka leleu.

³ Sarapei senen ilepa rapangurep sipumomone tai Israel, oi sia tai Midian sambatda Amalek samba sia sirimanua sabagei sibara ka isit kabelaiat sulu masisaggangi tai Israel.

⁴ Pusapourangan ka kudduatda tai Israel samba pakatairangan sangamberi siureman sedda aili ka kudduat sibokko Gaza isit kaiaman. Samba leu tarimeu biribiri, jaui samba kalideira paamian Israel abbitrangannia. Ta' anai berisara ralegeiake bailiunangan sia paamian Israel bulat ta'anai komenda.

⁵ Oi sia sirimanua simigi nenda pasamba tarimeura samba sapoura tadde'ra simakope igi. Sia sirimanua samba untadra simakope igi ta momoi ituadde. Oi sia masipakatai tobbou laggai nenda,

⁶ samba paamian Israel ta momoi ragalai apapa katubutda.

⁷ Lepa geti pusogarangan sapaamian Israel masitiddou kai Tuhan masiropmake sia masilawan tai Midian.

⁸ Koiniakenangan sara nabi katubutda si Tuhan. Kuanangan nabi nenda, “Kisene le ngangan Tuhan, Taikamanuan Israel:” Akubelaakean kam ka bagat paoreijat ka Misir.

⁹ Akuarauakean kam ka tai Misir samba ka sirimanua ka tobbou laggai nene sisaggangi kam. Akutuituiakean sia ka tobbou laggai nene kateteret anusagangi kam sia, lepa akekungan polakdra ka tubumui.

¹⁰ Alepaan Akukua ka tubumui aipoi Aku le Tuhan Taikamanuamui, samba leu et ta momoi nubuluiji kam sabulungandra bangsa Amori toboou laggainia kudduijietmui kineneiget nene. Tapoi ta anureddet kam parentaKu.”

¹¹ Ka sara gogoi oi sara Malaikat Tuhan ka laggai Ofra, lepa kuddunia ka tei loinat terpentin, bakkat Joas, sara sibara ka muntogat Abiezer. Togania sipuoni si Gideon, ai pabobo'bo gandum ka kudduat pasipionan anggur. Igalaiake nenda ka simalipput bule ta raitconia sia tai Midian.

¹² Patoilanangan tubunia Malaikat Tuhan ka tubunia samba kuanangan, “Ale silainge simagege! Si Tuhan masipaalei ekeu!”

¹³ Aleginangannia si Gideon, “Bojoian le tuan! Ke' bulatnia si Tuhan masipaalei kai, angoi sangamberinia nene iorak kai? Kaipangan sangamberi kiseiet sigalaiakenen Tuhan siburu samba sipumumuanakenendra sia taikebbukatmai pagalaiat kipa aibelaake sia ka laggai Misir si Tuhan? Kineneiget aikaddiuakean kai si Tuhan samba masiobaake rapaoreiji kai tai Midian.”

¹⁴ Lepa geti kaunangan si Tuhan parenta nene kai Gideon, “Ka bagat sangamberi ron tubum kenan le nubelaake tai Israel ka paoreijatda tai Midian. Aku te masikoiniake ekeu.”

¹⁵ Aleginangannia si Gideon, “Angoi aku le, Tuhan? Kaipa iooi kubelaake paamian Israel ka paoreijatda tai Midian. Ka addeat suku Manasye, muntogatku le sigoiso. Samba ka bagat keluargaku leu et bulat aku leu et sita' anai katukaunan.”

¹⁶ Kuanangan si Tuhan, “Tapoi Aku le masipaalei ekeu! Kalulut Aku le masiroropmake ekeu, momoi le numateiake tai Midian, kele nulaba sara sirimanua le.”

¹⁷ Aleginangannia si Gideon, “Ke bulatnia akusesengan pukatekat baga kamatat Tuhan, oto ake pei sara toggaiat katubukku, aipoi si Tuhan le sipasiake parenta nenda katubukku.

¹⁸ Panindogatku Tuhan bule nungena boiki sene, teret kupatarek komen ka tubut Tuhan.” Aleginangan si Tuhan, “Kauan, Kungena le ekeu teret nutoili.”

¹⁹ Iageti toili si Gideon lepa seunangan sangamuneng kambing sipuurau sibau, samba alanangan 10 kilo tapung, iageti galainangan roti sita' ragi. Kele ailepa nenda kaunangan akkula ka bagat karakjak, samba suania ai ka bagat pario', iageti sangamberinia nenda abbitnangannia samba patareknangannia ka tubut Malaikat Tuhan sipasingengena ka tei loinat terpentin.

²⁰ Kuanangan Malaikat Tuhan nenda, “Galakngake akkula samba roti nenda ka uddut bukku nene lepa uruakenungan suat akkula nenda ka uddutnia.” Galaiakenangannia si Gideon siripot apa siparentaakenen katubunia.

²¹ Lepa geti totoiakenangan kabeinia Malaikat Tuhan nenda, oto buttet tutura' ukkaakenennia le amasibekbek akkula samba roti nenda. Pujuluunangan bukku nenda, malabonangan akkula samba roti nenda sappru. Iageti mapepenangan Malaikat nenda.

²² Againangan kolou si Gideon aipoi siooi ka tubunia nenda iate bulat Malaikat Tuhan. Iageti sigalu loto kuanangan si Gideon, “Mateian te aku, ale Tuhan Sipulubeunan! Aipoi akupatiboakean MalaikatNu!”

²³ Tapoi kuanangan ka tubunia si Tuhan, “Ta' leu! Bui numaloto. Ta' mamatei ekeu.”

²⁴ Iageti galainangan sara kudduat pasibuluat sedda si Gideon samba oniakenangannia “Si Tuhan Bakkat Puaragat.” Kudduat pasibuluat nenda ai peile ka Ofra, iate laggaira tai Abiezer.

²⁵ Ka sinoibo nenda kaunangan parentania ka Tubut Gideon si Tuhan, “Ala' jaui simanteu jaui ukkuinu, iate jaui bulat simaeru si pitu ngarura. Ragat le kudduat pasibuluat sirioakenen ukkuinu addeat Baal, lepa ibuakenungan arigi sipasitutularatnake sabulungan Dewi Asyera ka be'bet kudduat pasibuluat nenda.

²⁶ Lepa rioakenungan simakolou sara kudduat pasibuluat ka uddut tobbou nenda. Lepa geti jaui simanteu nenda sangamberinia, bui ta nurarak addeat sangarubeiat buluakenen kai Tuhan. Pakeinungan arigi sipasitutularatnake Dewi Asyera siibuakenenu nenda addeat loina pasiraraknia.”

²⁷ Oto pilinangan pulu sia sapaguguletnia si Gideon, lepa ei sia masigalaiake siripot siparentaakenen Tuhan katubunia. Tapoi makope le poi lotonia ka saeppunia samba katubudra sia sikalaggaiatnia nenda, ta magegenia igalaiake nenda simapato. Oto galaiakenangannia ka teteret sinoibo.

²⁸ Kele aratusuru aimapato simancep sipulalaggai ka laggai nenda, itcorangan kudduat pasibuluat Baal samba arigi sipasitutularatnake Dewi Asyera abelean. Itcorangan leu et aipoi ka kudduat nenda aragalaian sara kudduat pasibuluat samba arararakngan leu et jaui simanteu sibailiu buluakenen.

²⁹ Parere'rangan ka pasasambadra, “Kasei amasigalai nene?” Kele arataikonia, seserangannia iate si Gideon togat Joas le amasigalaiake.

³⁰ Lepa kuarangan ka tubut Joas, “Airagatnakean togam kudduat pasibuluat Baal samba masiibuake arigi sipasitutularatnake Dewi Syera ka be'bet kudduat pasibuluat nenda. Kalulut nenda, ambit le togam nenda ibela sene, buita mateinia.”

³¹ Tapoi aleginangan si Joas ka sangamberi sipasilalawannia, “Taleu sangamberimui le mare're' ka Baal samba noba kam masiropmakenia? Kasei simare're' ka tubunia, tumateiake te geti gogoi nene! Ke Taikamanua Baal, eddangan sarania Baal masilawan si Gideon, aipoi siragat nenda iate kudduat pasibuluatnia.”

³² Kalulut aikua le poi si Joas, “Sedangan sarania Baal masilawan si Gideon, aipoi siibuakenen nenda kudduat pasibuluatnia.” Oto ka teteret nenda sirimanua masioniake si Gideon “Jerubaal”.

³³ Kateteret nenda sangamberi tai Midian, Amalek samba sangamberi suku bangsa bagei ka polak simangai isit kabelaiat sulu Jordan aparuruan sia. Talipokirangan bagat oinan Jordan, samba pusapourangan ka su'sut Jizreel.

³⁴ Tapoi si Gideon aisopsopmannia Ketsat Tuhan, bailiunangan ipiau trompet addeat masisogai sia sangamberi muntogat Abiezer bule raoi patadde pasambania.

³⁵ Nia leu et masikoiniake punutubu katubutda suku Asyer Zebulon, Naftali samba suku Manasye samba sia ka isit kabelaiat sulu samba leu et ka isit kabelekat sulu bagat oinan Jordan, bule sia leu patadde pasambania. Iageti oi sia sangamberidra masiropmake si Gideon.

³⁶ Lepa kuanangan si Gideon ka Taikamanua, “Tuhan, Ekeu masikua aipoi noba nupakei aku masibelaake paamian Israel.

³⁷ Ke kele kiseddangannia, oto ka uddut polak nene, kudduatmai simaturere masiboboake gandum, aku panganangngan siguntingan bulut biribiri. Ke mansep sarat bulut biribiri nene le isusuaiji tinobut, samba polaknia ta isusuaiji, oto nenda te toggaiatnia papakeinu aku masibelaake paamian Israel.”

³⁸ Iageti puailinangan kele nenda: Kele ka gogoi imapato simancep tusurunangan si Gideon samba piotnangan bulut biribiri nenda, bara oinan tinobut sangapulokat.

³⁹ Lepa kuanangannia ka Taikamanua, “Tuhan, bui nupugolu ke manibo aku sangaminca nene. Obaake le aku masigalai sara toggaiat minca ka siguntingan bulut biribiri nene. Tapoi ka nene geti buita sarat biribiri nene le magarak, tapoi polaknia ibailiu masua.”

⁴⁰ Soibonia nenda galainangan Taikamanua siripot sitiddou Gideon nenda, bailiunangan mansep simansep bulut biribiri nenda bulatnia magarak, tapoi polaknia amasuangan kalulut tinobut.