Pas. 4 - BUKO SIPUNENAN

Si Debora samba si Barak

¹ Kele ai tata' si Ehud, majorangan minca bangsa Israel ka tubut Tuhan.

² Oto obaakenangan si Tuhan rakalaake sia tai Jabin, rimatadra tai Kanaan sikukuddu ka laggai Hazor. Utet saladdu saladdunia iate Sisera sipulalaggai ka Haroset-Hagoyim.

³ Ai siba ngotu kereta pasaggaknia si Jabin sigalai sibara ka laba. Rua pulu ngarura burunia aipaoreiji tai Israel. Lepa geti pusogarangan masitiddou paroman ka tubut Tuhan.

⁴ Kateteret nenda siuteake tai Israel iate sara sinanalep sipuoni Debora, sinanalep Lapidot.

⁵ Simaturere ikukuddu si Debora ka tei loinat kurma, paoggangan Rama samba Betel ka simaleleu Efraim. Samba sedda te raooi tai Israel masitiddou nganturat ka tubunia.

⁶ Ka sara gogoi koiniakenangan sia masisogai si Barak, togat Abinoam sibara ka laggai Kades ka daerah Naftali. Lepa geti kuanangan kai Barak, “Nene parentat Tuhan, Taikamanua Israel, ka tubum:” Ruruake pulu ngaribu sia taimanteu sibara ka suku Naftali samba Zebulon, samba abbitnungan sia ka leleu Tabor.

⁷ Aile kugalai Sisera, utet saladdut Jabin, iailiake ekeu ka bagat oinan Kison sambatda saladdunia samba kereta pasaggaknia isaggangi kam, samba aile Kuake kamanangan katubumui ka bagat pasaggangan nenda.”

⁸ Kuanangan si Barak ka tubut Debora, “Ke moi bai ekeu, momoi leu et aku kaku, Tapoi ke taa', aku leu et ta kuoba mei.”

⁹ Aleginangannia si Debora, “Kauan, momoi le aku! Tapoi repdep, ta ekeu masisilo puaabeu. Ka sara sinanalep le si Tuhan masikalaa ke Sisera.” Iageti ei sia si Debora sambadra si Barak simakere ka Kades.

¹⁰ Kaunangan si Barak suku Zebulon samba suku Naftali ka Kades. Sipasitutut si Barak samba si Debora ka teteret nenda ai pulungaribu sia.

¹¹ Ka teteret nenda si Heber, tai Keni, aisaraakean tubunia ka bangsania (bangsa Keni siate keturunan Hobab, lakut Mose.) Ameiannia si Heber masigalai sapounia legret loinat terpentin ka Zaanaim, ta mareunannia ka Kades.

¹² Kele aiarep si Sisera, aipoi si Barak ameiannia ka leleu Tabor,

¹³ ruruakerangan si siba ngotu kereta pasaggaknia iageti ambitnangan sia ka Haroset-Hagoyim ka bagat oinan Kison.

¹⁴ Iageti kuanangan ka tubut Barak si Debora, “Kauat, kenannan! Si Tuhan masipaalei ekeu. Gogoi nene Nia masiake ka tubum kamanangan kai Sisera.” Iageti gorosot si Barak barania ka leleu Tabor sambada sipulu ngaribu saladdunia,

¹⁵ lepa geti saggangirangan si Sisera. Samba si Tuhan masipasaragai sangamberi saladdu samba sangamberi kereta pasaggaknia, bailiu si Sisera gorosot ka keretania, lepa pabalaunangan ituitui sipueenung.

¹⁶ Iageti kukrunangan si Barak sangamberi kereta pasaggak samba saladdutda tai saggak nenda sege ka Haroset-Hagoyim sangamberi saladdut Sisera nenda mateiakenangannia; ta anai sia sara aiobaake murimanua.

¹⁷ Tapoi si Sisera amutuituiannia iei ka sapou Jael, sinanalep Heber, tai Keni. Kalulut, Rimata Jabin sibara ka Hazor ai pasuruanganda pasamba saepput muntogat Heber.

¹⁸ Kele aioi si Sisera, silonangannia si Jael samba kuanangan, “Konan Tuan, guru'ake ekeu ka bagat sapouku; bui numaloto.” Iageti guru' si Sisera ka bagat sapou nenda lepa tabbonangannia si Jael komak garden bule imalipput.

¹⁹ Kuanangan si Sisera kai Jael, “Ake' goiso lo'ku oinan; maonggou aku.” Lepa si Jael bukanangan kudduat pasikoirikat susu, lepa kaunangannia kai Sisera, lepa geti tabbonangannia minca komak garden.

²⁰ Lepa kuanangan si Sisera kai Jael, “Kenan murio ka matatbaliu sapou. Ke ai sirimanua siooi samba parere' ka tubum taleu ai sirimanua sene, kuanungan ta anai.”

²¹ Kalulut kopet saggot tubunia si Sisera bailiu laulaunangannia sipulelelek. Alanangan si Jael sara panoko samba sangate'te' arigit sapou, lepa moileakenangan ilegreake tubunia ka si Sisera. Lepa geti punuakenangan arigit sapou ka piunia pat pukpuk aili ka polak.

²² Kele aioi si Barak masigaba si Sisera, silonangan si Barak si Jael, kuanangan ka tubunia, “Konan kupatoilania ka tubum sirimanua gabaetnu nenda.” Guru' si Barak samba si Jael simakere, lepa itconangan si Sisera amateiannia, amukangkangannia ka polak aian arigit sapou tuiibbi ka piunia.

²³ Gogoi nenda si Tuhan masikau kamanangan katubutda tai Israel kai Jabin, rimatadra tai Kanaan.

²⁴ Rimata nenda iapei imaburu iapei rapaoreinia tai Israel pat kalepakatnia mateiakerangannia.